Kporom Hen Aôndo

Yehova Zough a Kwagh u Dedoo ken Ior

1 UTOR 14:13

“TER tev asema cii, man A kav hanma mhen cii.” (1 Kroniku 28:9) Mkaanem ma Aôndo yange na i nger ne lu sha u wasen se sha u se wuese mgbe u kwagh wase a gbe Yehova ishima kpishi la. Er se yen kpishi nahan kpa, Yehova zough a kwagh u dedoo ken asema a ase. Mkaanem ma yange i ôr sha kwagh u Abiya ken 1 Utor 14:13 la tese wang ér kwagh ne ka mimi.

Abiya lu hen ya u ifer ngee her kpishi yô. Ter na, Yerobiam, lu tor u Tartor u yange u undu mcivir u mimi yô. * Yehova wa ishima ér una ese ya u Yerobiam kera vindi vindi, “er or ka nan ese ihyôghonov” kera nahan. (1 Utor 14:10) Kpa Aôndo kaa ér i lu or môm tseegh hen ya u Yerobiam, i ii nan sha icivir ye—or shon yô lu Abiya, u lu uange kpoghuloo la. * Sha ci u nyi? Aôndo pase ér: “Ken a na yô, i wa zuan a kwagh u dedoo sha ishigh ki TER, Aôndo u Iserael, ken ya u Yerobiam.” (1 Utor 14:1, 12, 13) Mkaanem man pase se nyi sha kwagh u Abiya?

Abiya yange una lu or u civir Aôndo sha mimi shin una lu ga kpa, Bibilo pase se ga. Nahan cii kpa, i wa zuan a kwagh u dedoo ken a na. Kwagh u dedoo u i zua a mi ken a na ne lu kwagh u doon sha “ishigh ki TER,” man alaghga kwagh u dedoo shon bende a mcivir u Yehova. Akaangeren a mbatesen mba Mbayuda kaa ér, a̱ shi nan kpa Abiya zaan ken tempel u ken Yerusalem la, shin alaghga yange zenda mbakuran mba ter na ver sha u yangen Mbaiserael u zan ken Yerusalem la kera.

Er se fe kwagh u dedoo shon u Abiya er la jighilii ga nahan kpa, ieren na i dedoo la lu kwagh u kuman iwuese. Hiihii yô, yange er kwagh shon sha mimi. Kwagh u dedoo shon lu ‘ken a na’—inja na yô, lu ken ishima na. Sha uhar yô, kwagh u er la lu zegekwagh. Abiya tese ieren i dedoo ne shin er lu ‘ken ya u Yerobiam’ nahan kpaa. Orfantakerada ugen kaa ér: “Ior ka vea lu sha ajiir shin vea due hen icombor i wan ifer, kpa vea za hemen a ieren ve i dedoo nahan i doo kpishi.” Orfantakerada ugen di kaa ér kwagh u dedoo u Abiya lu eren la “due ken igbar . . . , vough er asan ka a mondo sha kwavaôndo tugh man er kon u sedar ka u hemba doon ashe ape ikyon igen cii i ndoor ikya kera nahan.”

Kpa kwagh u hemban cii yô, mkaanem ma ken 1 Utor 14:13 la tese se kwagh u doon kpishi sha kwagh u Yehova man kwagh u a keren hen a vese yô. Umbur wer yange i ‘zua a’ kwagh u dedoo “ken” Abiya. Ka inja er Yehova yange tôv ishima i Abiya zan zan mase zuan a kwagh u dedoo ken a na nahan. Aluer se kar ieren i Abiya sha ieren i tsombor na yô, orfantakerada ugen una kera kaa ga yô, Abiya lu er tagbede u a lu “hen atô u tihi u awen” nahan. Ieren i dedoo ne doo Yehova, nahan a ver or u hen tsombor u mbaaferev ne doo doo, gadia a wa zungwen un mhôônom.

Doo se kpishi u fan ser, se yina kpa Yehova zough a kwagh u dedoo ken a vese, u a gbe un kwagh kpishi yô. (Pasalmi 130:3) Er se fe nahan yô, kwagh ne a̱ wase se u kporom ikyua a Yehova, Aôndo u a tev asema a ase sha er a̱ lu ankwagh u dedoo u cuku kpa una zua a mi la.

[Ngeren mba shin kpe]