Kporom Hen Aôndo

“Ú Zua a Na”

1 KRONIKU 28:9

U FA Aôndo kpa? Alaghga se hen ser mlumun u sha mpin ne ngu ican ga, kpa ka nahan ga. Sha kpôô yô, u fan Aôndo la kua u fan ishima na vighe vighe man igbenda na cica cii. Ka sea fa un nahan yô se hingir u lun ikyua a na, nahan mlu wase a na la a bende a gbenda u se eren akaa ken uma wase la. Sha mimi yô, se fatyô u lun ikyua a na imba la kpa? Aluer ka u se fatyô yô, se er nan man se lu ikyua a na nahana? Se zua a mbamlumun sha mbampin mban ken kwaghwan u Tor Davidi wa wan na Solomon la. Kwaghwan shon ngu ken 1 Kroniku 28:9.

Nenge ase kwagh u yange za hemen ne. Davidi tema tor sha Iserael zulum anyom 40, man hen shighe la cii tar la za ikyura kpen kpen. Solomon, u gba u una kar a tema tor sha ityough nagh la lu gumor dege dege hen shighe la. (1 Kroniku 29:1) Shighe u Davidi bee iyol zurum u una kpe la, lu kwaghwan u nyi mase wan wan naa?

Davidi ôr kwagh a wan na, man kwaghôron na la tese mfe u un iyolna zua a mi ken mcivir u Aôndo yô, a kaa ér: “We wan wam Solomon, fa Aôndo u teru, civir Un.” A̱ shi nan kpa, Davidi lu ôron kwagh u mfe u fan kwagh u Aôndo kpuaa tseegh tsô ga. Hen shighe la nahan, Solomon vande lun or u civir Yehova, Aôndo u Davidi la. Shi hen shighe la nahan, i nger ityakerada i Ruamabera u ken Zwa Heberu la imôngo i kure, nahan a̱ shi nan kpa Solomon fa akaa a uicighan ngeren mban ôr sha kwagh u Aôndo yô. Orfantakerada ugen kaa ér ashighe agen yô ishember i ken zwa Heberu i “fa” la ka i ôr kwagh u “fan or vighe vighe.” Sha mimi yô, Davidi soo ér wan na a̱ er kwagh u un kpa yange lu un a inja kpishi yô, inja na yô a̱ ya ikyar vea Aôndo, a̱ lu a na kôôsôô.

Mlu u kôôsôô u Solomon una lu vea Aôndo nahan ne, una bende a mlu na jimin cii kua gbenda u a eren akaa ken uma na la. Davidi taver wan na ishima ér: “Civir Un [Aôndo] a ishima i môm man ishima i gbar gbar kpaa.” * Umbur wer Davidi yange vande kaan a wan na ér a̱ fa Aôndo cii ve mase kaan ér a̱ civir un ye. Or ka nana fa Aôndo sha mimi yô, nan hingir u civir un. Kpa gba u se civir Aôndo ke-ke-ke, sha asema ahar shin sha atseregh ga. (Pasalmi 12:2; 119:113) Davidi wa wan na kwagh ér a̱ civir Aôndo a ishima na jimin cii man a ishima i gbar gbar kpaa.

Er nan ve Davidi taver wan na ishima ér a̱ civir Aôndo a awashima u dedoo man a mhen u voughloo? Davidi pase ér: “Gadia TER tev asema cii, man A kav hanma mhen cii.” Yange gba u Solomon una civir Aôndo sha ci u á soo ér i̱ doo ter na Davidi, á na yum ga. Ior mba Aôndo a keren yô, ka mba i gbe ve ishima sha mimi u civir Un la.

Nahan Solomon dondo ikyav i ter na sha u kporom ikyua a Yehova kpa? Lu kwagh u Solomon una tsua u eren a ishima na yô. Davidi kaa a wan na ér: “Aluer ú ker Un yô, ú zua a Na; man aluer ú undu Un yô, Una ta u kera, Una hunde ishima a we gbem je.” Yange gba u Solomon una nôngo kwagh kpoghuloo sha er una fa Yehova, una hingir or u civir Aôndo, u lun ikyua a na yô. *

Kwaghwan u Davidi wa wan na Solomon la pase se wang er Yehova a soo ér se lu ikyua a na yô. Kpa gba u se “ker un” sha u timen ken Ruamabera sha er se hingir u fan un vighe vighe yô, ka nahan man se fatyô u lun ikyua a na ye. Se faan un yô, mfe la a̱ mgbegha se u civir un a ishima yase jimin cii man a ishima i gbar gbar kpaa. Sar Yehova u se̱ civir un sha imba gbenda ne, man á kuma u se civir un nahan vough.—Mateu 22:37.

[Ngeren mba shin kpe]