De Karen Iyol You sha Mbagenev Ga
Gbenda U Myer U Sha 2
De Karen Iyol You sha Mbagenev Ga
BIBILO TESE SE NYI SHA KWAGH NE? “Er tom wou tsembelee, ka nahan man u lu a kwagh u tan ihyagh a mi ye. Kpa de karen iyol you sha Mbagenev ga.”—Mbagalatia 6:4, Mgem u Bibilo i í yer ér Contemporary English Version la.
ER NAN VE KA I TAVER SE U DONDON KWAGHWAN NEE? Se mba soon u karen ayol a ase sha mbagenev, man ashighe agen ka i lu mba i hembe tumen ve iyol a vese la, se kar ayol a ase sha a ve ye, kpa ashighe kpishi ka i lu mba ve hembe se agee man inyaregh shin mfe la. Aluer kanyi je i ne ve se karen ayol a ase sha mbagenev kpa, ieren ne ngi i nzughul a nzughul a vese. Ka se hen sha lan ser mba fe or u nan gbe kwagh sha akaa a nan lu a mi shin sha kwagh u nana fatyô u eren la. Shi adooga ieren ne ia kende isharen i tômon akaa a mbagenev ken a vese shi ia na se ishima i gban gesa a mbagenev kpaa.—Orpasenkwagh 4:4.
Ú ER NENA? Nôngo u nengen iyol you er Aôndo kpa a nengen we nahan. De mnenge na a bende a gbenda u ú nengen iyol you la. “Gadia or nengen mluashe u ken won, kpa TER [“Yehova,” * NW] yô, nengen ken ishima.” (1 Samuel 16:7) Yehova fa er u gbe kwagh yô, kpa a fa kwagh ne ka sha u tôôn we karen sha uumace mbagenev ga, kpa ka sha u tôvon ishima you shi karen mbamhen ou kua asaren a ou man mbaawashima ou nengen er ve lu yô. (Mbaheberu 4:12, 13) Yehova fa mbamyen ou shi a soo ér we kpa u fa ve. Aluer u ngu karen iyol you sha mbagenev sha er wea gba kwagh kpa u fa yô, kwagh ne una na yô u hingir or u gengese iyol shin mlu wou una kuman we mayange ga. Nahan yô, hide a iyol ijime, fa wer ka hanma kwagh u ú lu eren cii u za ikyura ker ga.—Anzaakaa 11:2.
Kpa kanyi jighilii u er ve u gba kwagh sha ishigh ki Aôndo? Icighan jijingi yange mgbegha profeti Mika nger mkaanem man, ér: “Yô, A tese u, kwagh u dedoo, we or; tsô ka nyi TER A keren her a we, saa u eren kwagh u mimi man u soon u zungwen mhôônom, man u hiden a iyol ijime er u zenden vea Aôndo wou la gaa?” (Mika 6:8) Aluer u dondo kwaghwan la yô, Aôndo una wa u ikyo. (1 Peteru 5:6, 7) Man ka kwagh u hemban cii u una va a mkom ken uma wou je ne.
[Ngeren u shin kpe]
^ Kape i nger iti i Aôndo ken Bibilo je la.
[Foto u sha peeji 5]
Yehova ngu a fa er se gbe kwagh yô sha u tôvon mlu u ishima yase la