Ka Aôndo A Ne ior Tahav Mbu Lamen Ijô Igen Yee?

ORGEN u i yer un ér Devon yô, kaa nahan ér: “Kwagh ne taver mo zee, hanma kasua yô, icighan jijingi ngu a gba sha ior kpishi ken côôci yam, maa ve hii u lamen ijô kposo kposo sha ivande je. Man mbagen ken ve ka mba wan ijimba. Mo yô, m nôngon mer me er kwagh u vough hanma shighe. Nahan kpa, ka mea er msen mea sôn jijingi nan nan kpa m ngohol un sha won ga. Er nan ve kwagh a lu nahan sha wono?”

Gabriel kpa ze adua ugen u ior mba ken adua la ve senge ér ve mba ngohol icighan jijingi shi mba lamen ijô kposo kposo yô. A pase wener: “Kwagh u ka a zam iyol je yô, ka mea eren msen yô, mbagenev ve ngoron ve zaan mo ayôôso ato, kpa m kaven kwagh u ve lu ôron la sha won ga, shi ve ayol a ve kpa mba kaven kwaghôron ve la ga. Akaa a ka ve ôron la nga lun or môm a iwasen ga. M hen mer ma iyua i jijingi u Aôndo, i or zough a mi yô ka sha ci u eren ma kwagh u dedoo a mi.”

Kwagh u yange er Devon man Gabriel ne due a mpin u injaa ugen. Mpin shon yô ka un ne, Kwagh u ucôôci mbagenev nyian ve lamen ijô la due hen Aôndo jim je kpa? De se tôv se fa kwagh u iyua i Mbakristu mba sha derianyom u hiihii lu a mi i lamen ijô sha ivande la, tsô se zua a mlumun sha mpin ne.

“Ve Gba Ôron Kwagh Ken Ijô Igen”

Bibilo ôr se kwagh u nomso man kasev mbagenev mba yange i na ve tahav mbu lamen ijô igen i ve lu a vande henen i ga yô. Kwagh ne yange hii eren sha iyange i Pentekosti ken inyom i 33, shighe u Yesu Kristu kpe kera usati kar kpuaa la. Sha iyange la, “i iv” mbahenen mba Yesu mba ken Yerusalem mba kuman iorov 120 nahan “a Icighan Jijingi, ve gba ôron kwagh ken ijô igen.” Mbavannya mba ken ityar igen mba ve lu her mbara cii, “kondo ve iyol sha ci u hanma or nan lu ungwan er ve lu ôron kwagh ken zwa u nan yô.”—Aerenakaa 1:15; 2:1-6.

Bibilo ôr kwagh u mbadondon Yesu mba tsuaa mbagenev mba ve ngohol tahav mbu kpilighyol mbun yô. Ikyav i tesen yô, zum u Paulu iv a icighan jijingi yô, a gba lamen ijô kposo kposo sha ivande. (Aerenakaa 19:6; 1 Mbakorinte 12:10, 28; 14:18) Kpa nyityô iyua i sha icighan jijingi u Aôndo cii yô, i na i̱ sha u kuren awashima u dedoo a mi. Nahan yô, ka awashima u nyi ijô i lamen yange wase u kuren sha ashighe a i lu ngeren Bibilo laa?

Ijô i Lamen Lu Ikyav i Tesen Ér Aôndo Ngu a Mbakristu

Shighe u Paulu lu ngeren washika hen Mbakristu mba ken gar u Korinte, mba̱ ikyav tese ér  mbagenev ken ve lu a iyua i lamen ijô la, a pase ve ér, “ijô i lamen ne ka ikyav sha ci u . . . mba ve ne jighjigh ga la.” (1 Mbakorinte 14:22) Nahan yô, tahav mbu lamen ijô igen la kua shi uivande mbagen mba ve lu eren la, lu ikyav i tesen ior ér Aôndo lumun a nongo u Kristu u i ver u hegh ne shi ngu suen u kpaa. Uiyua mba sha ivande mban cii lu er ka ikyav i sha kpegbenda i tesen henpe or u keren mimi nana za ve nana zua a ior mba Aôndo a tsough ve la nahan.

Doo u se fa ser, ma ijiir i môm tsô kpa Bibilo kaa ér Yesu shin uprofeti mba ve lu cii man shighe u Mbakristu la lam ijô igen i ve vande henen i ga la sha ivande ga. Nahan yô, ikyav tese ér iyua i lamen ijô i̱ yange i na mbahenen mba Yesu ne lu sha ci u ityôkyaa igen kpaa.

Ijô i Lamen Lu Gbenda u Pasen Ior Loho u Dedoo

Sha shighe u Yesu hii tom na ica lu a gba ga la, a kaa a mbahenen nav ér ve pase loho u dedoo u Tartor u Aôndo hen Mbayuda tseegh. (Mateu 10:6; 15:24) Sha nahan yô, mbahenen mban hemban pasen kwaghaôndo sha ajiir a Mbayuda lu la. Kpa lu u kwagh a va gema ken hemen.

Yange i nder Yesu shin ku ken inyom i 33 la ica gba ga maa wa mbadondon un tindi ér ve “gema . . . akuraior cii a̱ hingir mbahenen.” Shi a kaa a mbadondon un ér, vea er shiada sha kwagh na “zan zan á ar ken ikighir i tar je.” (Mateu 28:19; Aerenakaa 1:8) U pasen loho u dedoo sha imba gbenda ngura nahan lu u saa vea fa ijô igen kpaa, a kera lu zwa Heberu tseegh ga.

Kpa, mbahenen mba tsuaa mbara kpishi gema lu mba “fan takerada yum . . . ga.” (Aerenakaa 4:13) Nahan vea er nan ve vea pase kwagh ken ityar i caa, i ve lu a vande ungwan kwagh u ijô i ken ityar la kpaa ga, shi ve fa u lamen i cuku tsô kpaa ga laa? Icighan jijingi yange na mbagen ken mbapasenkwagh mba lun a gbashima mbara tahav mbu lamen ijô i ve lu a vande ungwan i ga la wang.

Sha nahan yô, iyua i lamen ijô ne yange i kure mbaawashima mba hange hange uhar. Hiihii yô, kwagh ne lu ikyav i tesen ér Aôndo sue nongo u Kristu la. U sha uhar yô, kwagh ne lu ikyagh ki tomov ki injaa ki ki wase Mbakristu mba sha derianyom u hiihii mbara u eren tom u i na ve ér ve pase ior mba lamen ijô kposo kposo kwaghaôndo la. Kwagh u ucôôci kpishi ve lamen ijô ainge ne ngu wasen u kuren mbaawashima mban je kpa?

Ijô i Mbaaduav Kpishi Ve Lamen Nyian Ne Ka Ikyav i Tesen Ér Aôndo Ngu Suen Vee?

Aluer u soo u timin kpande u tesen ityô you ma kwagh u lun a iwasen nahan u tim u hana? U za tim u ken atô u an-iyou u cuku shinii? Mayange ga cii! Ijiir i í er kwagh u iyange i Pentekosti la kaa ér “ikpelaior” i mba karen gbenda nenge kwagh u lu zan hemen her atô u mbahenen mba ve lu lamen ijô sha ivande la. Nenge ase yô, kwagh ne na yô, “i seer ior er dubu utar nahan” sha iyengeior i ken nongo u Kristu sha iyange la! (Aerenakaa 2:5, 6, 41) Aluer nyian kpa ior senge ér mba lamen ijô igen sha ivande, kpa gema mba lamen i ken iyouadua ve tseegh nahan, a hii nan man kwagh ne una lu ikyav i ken igbar sha ci u mbananjighjighga laa?

Mkaanem ma Aôndo ôr kwagh u idya man “aeren a iyolough” agen ér nga hendan a iertom i icighan jijingi ken or, shi ma kaa ér “mba ve eren ambaakaa ne yô, vea ya dyako u tartor u Aôndo ga.” (Mbagalatia 5:17-21) Aluer u nenge ior mba aeren a ve a wanger ga mba lamen ijô yô, alaghga a lan u ishima u pine wer, ‘Aluer Aôndo na ior mba hanma shighe yô ve eren akaa a Mkaanem nam ma vende la icighan jijingi na nahan, kwagh ne ka vough je kpa, nzughul ga zee?’ A lu inja er i tim ikyav i shami ga hen gbenda ngi nzughul ior gbenda nahan.

Ijô i Lamen Ka Gbenda u Pasen Ior Loho u Dedoo Nyianaa?

Man awashima ugen u yange gba u iyua i lamen ijô ia wase u kuren ken derianyom u hiihii la di ye? Ijô i í lamen ken ucôôci nyian la ka gbenda u pasen ior mba lamen ijô kposo kposo loho u dedoo shinii? Umbur wer, ior mba yange ve va ken Yerusalem sha iyange i Pentekosti  u inyom i 33 la lu ior mba ken ityar kposo kposo, kpa yange ve ungwa ijô i mbahenen lu lamen sha ivande la, kwagh môm nzughul ve ga. Kpa mba ve lamen ijô nyian ne yô, ashighe kpishi ka ve ôron akaa a or a kav sha won ga yô.

Sha kpôô yô, gbenda u i lamen ijô ainge ne kaha kposo a iyua i icighan jijingi i̱ yange i na mbadondon Yesu mba tsuaa mbara. Jighilii yô, hii shighe u mbaapostoli kpe kera la je ma ngeren u mimi môm ngu u a tese ér or shi ngohol ma tahav mbu lamen ijô sha ivande nahan ga. Kpiligh mbaôron Bibilo iyol er i hii man kwagh a lu nahan ga. Gadia jijingi u Aôndo yange mgbegha apostoli Paulu, ôr kwagh u uiyua mba eren akaa sha ivande kua iyua i lamen ijô kpaa la ér: “Á va kar a mi kera.” (1 Mbakorinte 13:8) Tsô se fa mba ve lu a icighan jijingi nyian nena?

Ka Unô Ve Tesen Ér Mba a Icighan Jijingi?

Yesu yange fa dedoo je ér a veren nongo u Mbakristu je maa a kar a iyua i lamen ijô igen la kera. Er va zulum u Yesu una kpe la, a tsengaôron ikyav i a fa mbadondon un mba mimi sha mi gbem sha won yô. Yange kaa ér: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yohane 13:35) Sha kpôô yô, hen ivur shon i môm i Mkaanem ma Aôndo tsenga ôron ér a va kar a uiyua mba eren uivande kera la je, shi ma kaa her ér: “Dooshima been mayange ga.”—1 Mbakorinte13:8.

Dooshima ngu vegher u hiihii u “ityamegh” ki icighan jijingi u Aôndo la. (Mbagalatia 5:22, 23) Nahan yô, mba ve lu a jijingi u Aôndo sha mimi, nahan Aôndo a suen ve la, vea doo ayol a ve sha mimi. Kwagh ugen yô, bem ka vegher u sha utar u ityamegh ki jijingi la. Sha nahan yô, gba u ior mba ve lu a icighan jijingi nyian la vea lu ior mba lun a bem, mba ve nôngon kpoghuloo u dughun ieren i sangen a sange sha dooshima ken a ve kera, man ieren i nyaghen akuraior agen kua ipila i eren kpaa la.

Shi umbur kwaghôron u profeti, u Yesu ôr ken Aerenakaa 1:8 la. A tsengapasen ér mbahenen nav vea va ngohol agee, nahan vea pase kwagh na “zan zan á ar ken ikighir i tar je.” Yesu shi pase ér á er tom ne “zan zan mkurtar je.” (Mateu 28:20) Sha nahan yô, tom u pasen kwagh tar sha won cii ne ua za hemen u lun ikyav i a fa mba icighan jijingi a ne ve agee mimi yô.

Ú nenge nena? Ka nongoior u hana u nenge wer mba a icighan jijingi nyiana? Ka unô ve lu a aeren a tesen ér mba umen ityamegh ki jijingi, hemban cii je yô ieren i dooshima man bem, nahan ugomoti kposo kposo ve lu tôvon ve a ican sha ci u ve venda u nôngon ityav sha tar jimin ciilii? (Yesaia 2:4) Ka unô ve palegh aeren a iyolough, inja er idya nahan, shi ve dughun mba ve eren ambaakaa ne, kpa ve vende u geman asema la hen atô ve kera? (1 Mbakorinte 5:11-13) Ka unô ve pasen loho u dedoo sha tar cii ér ka Tartor u Aôndo tseegh u lu ishimaverenkeghen i uumacee?—Mateu 24:14.

Mbangeren magazin ne mba kaan gbar gbar nahan ér, ieren i Mbashiada mba Yehova zua sha gbenda u Bibilo i pase kwagh u ior mba ve lu a icighan jijingi la. Yô, nôngo hoghol a ve sha er u fa iyol you aluer mimi je Aôndo una lu a ve yô.