Gbenda U Myer U Sha 5

Kure Mgbe Wou u ken Jijingi La

BIBILO TESE SE NYI SHA KWAGH NE? “Saan mba ve lu mbaibanave ken jijingi [shin “mba ve fe mgbe ve u ken jijingi,” NW] la iyol.”—Mateu 5:3.

ER NAN VE KA I TAVER SE U DONDON KWAGHWAN NEE? Ukwaghaôndo mbá udubu udubu, man ukwaghaôndo mban kpishi mba tesen ior igbenda kposo kposo i vea kure mgbe ve u ken jijingi la yô. A er nan ve u fa u a tesen ior mimi shi a eren ishima i Aôndo jim jim laa? Mbangeren ityakerada mba zan gwa mbagenev kaa gbar gbar ér u̱ nan Aôndo jighjigh shi civir un la ka ityumbulugh, man ka kwaghbo je kpaa. Magazin u i yer ér Maclean’s la sav ôron mnenge u ornyimanaôndo ugen u a ze gwa kpishi yô, ér: “Ityesen i Mbakristu ve tesen ér, uma saa sha akaa a se nengen a mi shi se ongo man a se benden ave kua sha akaa a mbatôvon sha akaa ve tesen la tseegh ga la, na yô . . . uma wase ne kera ngu a inja ga, man shi ka ityôkyaa i ior ve nômbo ikyôr eren aferakaa je ne.”

Ú ER NENA? Time sha akav a á tese ér Aôndo ngu la. (Mbaromanu 1:20; Mbaheberu 3:4) De lumun wer or môm nana yange u u̱ keren mbamlumun sha mbampin mba hange hange la ga, er mbampin mba dondon mban nahan: Se mba uma sha ci u nyi? Uma ngu shin kuu? Er nan ve ican i yan i dumbur yum nahana? Kanyi Aôndo a soo hen a mo? Kwagh u hange hange u una wase u ve ú zua a mkom u tsôron yô, ka u zuan a mbamlumun mba kuman ken atô sha mbampin mban.

Nahan kpa, de gbe lumun hanma kwagh u mbagenev ve er u tsô ga. Mkaanem ma Aôndo wa u kwagh ér u̱ er tom a ‘mhen wou’ sha er u kar u fa kwagh u Aôndo lumun un yô. (Mbaromanu 12:1, 2) U er nahan yô, iniôngon you la ia saa gbilin ga. Aluer u tôô shighe u ngu ôron Bibilo shi dondon kwaghwan u Bibilo yô, u palegh mbamzeyol, shi u pande ishimanyian, shi u seer zuan a mkpeyol ken uma wou kpaa. Se mba ôron kwagh ne ka zwa ga. Ior umiliôn umiliôn mba ve dugh sha ajiir kposo kposo yô, zua a mtsera sha u henen mimi sha kwagh u Aôndo man mbaawashima nav. Ikyav i tesen yô, ôr kwagh u ior mbagenev mba i ter ve sha peeji 18 zan zan 21 ken magazin ne tsô u nenge.

U nguren zuan a mtsera sha u dondon kwaghwan u Bibilo u injaa la yô, u hemba civir Aôndo cii. Yô, hen ase Bibilo vea Mbashiada mba Yehova. Aluer u er nahan yô, alaghga we kpa u lumun a kwagh u Paulu yange ôr ne, a kaa ér: “U civir Aôndo man kwagh a kuman we yô, mtsera ngu sha mi vese.”—1 Timoteu 6:6.

[Foto u sha peeji 8]

Kar fa kwagh u Aôndo a lumun un yô