Kporom Hen Aôndo

“A Zamber a TER”

ORGEN u yange mbamaren nav yese un ken mcivir u Aôndo kpa va de u civir Aôndo yô kaa ér, “m nenge mer m hôngor kpishi.” Or ne yange va soon ér una gema uma na una hide hen Aôndo yô, a gba cian ér mayange Aôndo una de un asorabo a na ga. Kpa orsholibo u gema ishima ne zua a msurshima ken kwagh u i nger ken Bibilo sha kwagh u Manase ken takerada u 2 Kroniku 33:1-17 la. Aluer we kpa u nenge wer u hôngor kpishi sha ci u asorabo a u vande eren ken uma wou la yô, alaghga we kpa u zua a msurshima sha kwagh u Manase la.

Yange i yese Manase hen tsombor u civir Aôndo. Ter na, Hesekia lu môm ken utor mba ken Yuda mba hemban doon inja cii. Aôndo yange seer ayange a uma u ter na, anyom nga kar atar yô maa i mar Manase. (2 Utor 20:1-11) A̱ shi nan kpa, Hesekia yange nenge wan na ne ér ka iyua i un zough a mi sha ci u mhôônom ma zungwen ma Aôndo yô, nahan a tese un u soon mcivir u wang u Aôndo la. Kpa ka hanma shighe cii ônov mba mbamaren vev ve civir Aôndo la ve dondon ikyav i mbamaren vev la ga. Manase kpa kape yange kwagh na lu je la.

Manase yange kom anyom 12 yô, ter na saa ku. Kwagh ka a er i vihi yô, Manase “er kwaghbo sha ishigh ki TER.” (Ivur 1 man 2) Lu mbawasenmhen mba mcivir u mimi gba ve ishima ga la yange ve mgbegha gumor u lu tor ne hingir u eren akaabo nahan yee? Bibilo pase se ga. Kwagh u i̱ er se yô, i̱ kaa ér Manase tume ityough ken akombo a civir kpoghuloo shi lu tor u wan tswam kpishi. Yange ta atse a nanden nagh sha mi sha ci u mbaaôndo mba aiev, shi kôron ônov nav naan nagh a mi shi eren ahir kpaa, shi a maa eev ken tempel u Yehova ken Yerusalem. Er Yehova, Aôndo u yange er ivande ve i hingir u va maren Manase la zer tan tor u taver ityough ne icin nahan kpa, a norom her.—Ivur 3-10.

Ken masejime yô, Yehova na ian nahan i kôr Manase i kange un sha mshirim i yem a na ken Babilon. Hen shighe u Manase lu uikyangen ken Babilon la, a zua a ian i hiden henen sha uma na. Yange mase nengen er ieev nav mbi lun a uma ga shi lun a tahav kpaa ga la mbi kanshio u kuran un yôô? Yange hide hen sha akaa a ter na u cian Aôndo la tese un shighe u lu iyev laa? Se fa jighilii ga, nahan cii kpa Manase gema inja hen shighe la. Bibilo kaa ér: “A zamber a TER, Aôndo na, a hire a iyol na ijime tsung je . . . A sôn Un.” (Ivur 12 man 13) Kpa or u yange er asorabo a vesen imba ne nahan, Aôndo una de un asorabo na mimi je kpa?

Mgemshima u Manase u mimi ne yange kôr Yehova ken ishima. Aôndo ungwa zamber na la, nahan “A hire a na hen Yerusalem ken tartor na.” (Ivur 13) Manase nôngo sha afatyô na cii hide sôr akaa a yange er shami ga la; á kar a mcivir u akombo ken tartor na cica cii kera, shi a taver ior nav asema ér “ve̱ civir Ter.”—Ivur 15-17.

Aluer u nenge wer u hôngor kpishi sha ci u asorabo a u vande eren ken uma wou la, nahan gande u Aôndo una de u a yô, kwagh u Manase la a̱ taver we ishima. Ngeren u a er kwagh na ne ka vegher u Mkaanem ma Aôndo a ne i nger la. (Mbaromanu 15:4) Sha kpôô yô, Yehova soo ér se fa ser un ‘keghen iyol u den kwaghbo.’ (Pasalmi 86:5) Ka isholibo i se er la kwagh a gbe Yehova sha mi keng ga kpa ka mlu u ishima yase la. Orisholibo u nan er msen hen Yehova a ishima i zungwen tsung, shi nan de asorabo a nan shi nan kange ishima sha u eren kwagh u vough yô, alaghga nan kpaa ‘Yehova una ver ato sha zamber’ u nan la er Manase kpa yange zamber a na ve ver ato nahan.—Yesaia 1:18; 55:6, 7.