Washika U Ken Tar U Mexico

“Er Se Lu Kweior u India Nahan Kpa Se Doo Yehova Ishimaa?”

ORGEN u lamen zwa u O’dam yange a hungwa sha uwo ashighe agen a sen shin geri sha u va keren ijodo i una er yô. Iti i or ne ér Melesio. Yange una va shin geri yô, a nyôr mbamkombo mba Mbakristu shi a tôô ityakerada i pasen Bibilo a za na ior nav. Or ne yange zamber ér i̱ tindi or nana za hen ijiir ve, nana za seer tesen ve Bibilo.

Ior mba i yer ve ér O’dam la, ka nongoior u ú lu sha ityouv mbi iwoogh, vegher u ken imbusutarimese i tar u Mexico yô. Ijiir ve la gba ica a nongo u Kristu u Mbashiada mba Yehova u ú hembe lun ikyua a ve la kuma er ukilomita 240 nahan. Iyange igen yô, se mbagenev se mough ser se za ior mban inya.

Se mough shin pikôôpu ken gar u Durango, se tôô utenti man akpa a yaven sha mi man kwaghyan u una kuma se u yan ayange atar yô kua peturuu. Se mough sha ahwa anyiin sha use, se naha mato sha an-gbenda u kôndon sha uwo, u lun ihyundu ihyundu zan zan kuma ahwa anigheni; se yem zan zan gbenda la za kpum. Ape gbenda la kpum la lu ijiir i nyôron ken tar u O’dam je la. Ijem igen gema lu se sha hemen kua uwo ugen.

Nahan se undu pikôôpu yase la hen agar agen, se tôô ikyav yasev se gba zenden angahar senen shin ijem la; se zende zan zan kuma ahwa atar. Se mba za nyer shimi yô, se haa afo, shi se zende se sange ikyon se keer usu sha u yangen inyamkyume u van ikyua a vese, maa se yav, kpa or wase môm gema lu per lu kenden usu la, ahwa nga kar atar yô un kpa va yav orgen di gema mough, se za hemen u yaven musan ker nahan zan zan sev kar aven.

Kpernan sev mbu aven yô se mough pepe pepe se gba unden uwo la. Igbenda i kiriki lu kpishi, nahan se tsume gbenda acin imôngo. Orgen ken nongo wase ne fa u lamen zwa u O’dam la kpuaa, nahan se lu pasen ior kwaghaôndo hen uya mba ve lu sha gbenda la. Kwagh er u kpiligh se iyol yô, ior lu kaan a vese ér ior mbagenev mba ken angar u Los Arenales, ijiir i se lu zan her la, mba ve kaan ér ve mba Mbashiada mba Yehova yô, shi ior mban mba nyer mbamkombo mba henen Bibilo hen angar shon. Kwagh ne kpiligh se iyol, kpa gema lu loho u taver se ishima.

Se zende gbem angahar hughum se, se za mase nyôron hen angar u Los Arenales la. I maa ayou sha akam a inyaagh sarem sarem hen ijiir ne shi i er haav mbu ayou ne sha ikpande; ijiir ne ngi a makeranta ga  shi ngi a usu u latriki kpaa ga. Er ior mba hen tar ne ve lu ica hiinii a ior mbagenev yô, mba ken ibanave kpishi; kwaghyan ve yô ka bredi u sha ikyuleke man akaayan agen kpuaa tsô. Se zua a Melesio hen ijiir ne, gumor ne lu zenga zenga nahan. Doo un kpishi u zuan ashe a vese. A kua a vese a va a vese hen ya na u i maa un akuma akuma yô, tsô a gba ôron se er un eren msen hanma iyange ér Yehova a̱ tindi Mbashiada nav sha u ve va tese tsombor na kua ityô na O’dam Bibilo yô. A kaa wener ka vea pine un mbampin kpa un fatyô u nan mlumun sha mi cica cii ga.

O’dam mba eren kwaghaôndo u i yer ér shamanism la. Mba eren kwaghaôndo ve ne a ikyav mbi ahiriv er ingyur i iguve man akuhe nahan, shi mba civir akaa a igbetar kpaa. Shi mba cie mbaahiriv vev mba ve bumen ve ve ngohol ve akaa la je gande. Melesio pase se ér yange un za ken geri kwagen la, un za fe ér Yehova ka Aôndo u mimi yô, un hide un va hembe akombo na cica cii un haa kera. Ityô na hen ér mbaaôndo vev vea tsaha un sha u wuan un. Kpa er kwagh môm tsô er un ga yô, ve mase kaven er Yehova á hembe lun a tahav a mbaaôndo vev mbara yô. Nahan ve hii u zan mbamkombo mba Melesio nyôron vea tsombor na sha u henen Bibilo a ityakerada yase i pasen Bibilo la.

Melesio kaa ér: “M kaa a ve mer, kwagh u hiihii yô, gba u vea nande akpagher a ve man ieev vev mbira cica cii.” Ior kpishi de u cian tsav, nahan iyenge i ior mba ve hii van mbamkombo mban la lu seer a seer zan zan hemba iorov 80. Se mba ongo nahan yô kpiligh se iyol, tsô se nenge ser doo u se yila ior mkombo atetan la je. Nahan se tindi ior sha anyinya hen mba ve vanden kohol hen ya u Melesio hanma shighe la sha u ve za lôhô ve mkombo ne. Shin er lu sha iyange i tom shi shighe vese ga nahan kpa, iorov 25 va mkombo ne sha angahar man sha ujaki mba kiriki.

Tsô ior gba pinen mbampin, se di se lu nan ve mbamlumun ken Bibilo, Melesio gema lu tafinta wase. Ve pine mbampin amba er: “Er se lu kweior u India nahan kpa se doo Yehova ishimaa?” “Ongo mbamsen mba se eren ken zwa u O’dam laa?” “Er se lu ica a ugeri nahan kpa, shighe u Armagedon una va la, Yehova una nenge sha a vesee?” Yange doo se kpishi u pasen ior mba hiden a iyol ijime mban ken Bibilo ser Yehova we mbaasemaleghlegh ikyo, aluer ka zwa u nyi je ve lamen shin vea gba ica a ior nan nan kpaa. Ve zamber a vese ér se̱ tindi or nana va seer tesen ve akaa ne.

Se mba been mkombo la yô, se kar kwaghyan u se lu a mi la vea azende a ase a he ne. Tugh ile hen shighe ne, shi wuhe kôr sha ityouv mbi iwoogh ne kpishi; nahan er ve na se ruumyol ugen u í lu maan ave ér se tsa ker yô, doo se kpishi. Kpernan sev mbu aven yô, ve za ver se gbenda, ve kar a vese hen icerengbenda igen, se yem ape se ver pikôôpu yase la, maa se hide ken gar u Durango; se vôr kpishi kpa gema saan se iyol.

Sha kpôô yô, yange lu se kwagh u civirigh u zuan a ior mba asema a mimi, mba i sar ve u henen kwagh u Aôndo u mimi shi civir un shin er ve kpishi ve fe u ôron shin ngeren zwa Ishpania ga nahan kpaa! Er yange se za hen ijiir ne se hide la, Mbashiada mbagenev ataratar kpa za her, ve tsa her kuma kasua utar. Ve wase iorov 45 mba i gbe ve ishima u civir Yehova yô, sha u ve fa kwagh u Yehova. Ve mban cii mba ze mbamkombo nduuluu.

Kwagh u dedoo ugen kpa ngu u i doo u se fa yô. An-shôôpu u i lu un tseegh a lu hen angar u Los Arenales la de u teen ior taav. Ityôkyaa yô, ior kpishi hen ijiir ne mba henen Bibilo, nahan ve cii ve de u man taav. Shi ve mba yange ve er ivaa sha tindi ga yô, ve hide ve zua ivaa ve sha tindi vough.

[Foto u sha peeji 28]

Melesio vea kwase na man mbayev nav mba kasev unyiin kua ngô na kem

[Ufoto u sha peeji 29]

Bibilo i henen kua mkombo u Mbakristu u hen angar u Los Arenales la

[Ape i zough a foto ne yô u sha peeji 29]

Servicio Postal Mexicano, Correos de Mexico