Kanyi i lu Loho u Dedoo?

“Loho u dedoo . . . ne”—MATEU 24:14.

GBA u Mbakristu vea pase “loho u dedoo u tartor” ne sha u ôron mbagenev kwagh u ú, shi pasen ve ér Tartor la ka gomoti u una va hemen tar sha perapera yô. Nahan kpa, i ôr kwagh u “loho u dedoo” ken Bibilo sha igbenda igen kpaa. Ikyav i tesen yô, Bibilo ôr kwagh u “loho u dedoo u myom” (Mbaefese 1:13); man “loho u dedoo u Aôndo” (Mbaromanu 15:16); kua “loho u dedoo u Yesu Kristu” la kpaa.—Marku 1:1.

U ngeen kwagh ga yô, se fatyô u kaan ser loho u dedoo ne wa akaa a mimi a Yesu yange ôr man mbahenen nav nger inya la cii cica ker. Cii man Yesu kôndo yem sha yô, a kaa a mbadondon nav ér: “Nahan yô, za nen, za gema nen akuraior cii a̱ hingir mbahenen, eren nen ve batisema ken iti i Ter man Wan man Icighan Jijingi, tesen nen ve u kuran akaa a M we ne kwagh sha mi cii.” (Mateu 28:19, 20) Sha nahan yô, tom u Mbakristu mba mimi saa sha u za ôron mbagenev kwagh u Tartor tseegh ga, gba u vea ver ishima u geman ior hingir mbahenen kpaa.

Ucôôci mba eren nena sha gbaa ne? Ior kpishi fa kwagh u a lu Tartor la ga, nahan vea fatyô u tesen ior kwagh u ú vough ga. Kpa mba gem mba pasen ior akaa a doon ve u ungwan sha kwagh u mde u asorabo man jighjigh u nan ken Yesu. Shi mba keren u geman ior asema sha u kuren mbamgbe vev shin sha u maan ayouacii man imakeranta man uya sha ci mbaatsanev. Shin er alaghga uerdoo vev mban vea seer iyenge i ior ken côôci nahan kpa, vea wase ior u geman hingir Mbakristu mba mimi, mba ve nôngon sha gbashima ér vea dondo akaa a Yesu yange tese la ga.

Orgen u timen sha akaa a kwaghaôndo nger wener: “Mbakristu kpishi mba ve fe kwagh u Bibilo tsema tsema shin ve hemen mbaadua yô lumun ér, mimi je gba u ma se lu geman ior sha u ve hingir mbahenen mba Yesu shi ma se lu tesen ve u eren akaa a Yesu yange wa se kwagh sha mi la cii. . . . Kera kpa, Yesu yange wa se kwagh sha ikyaa ne wanger wang. Ka se se lu eren kwagh u yange kaa la ga ye. U nôngon tsô kpa se mba nôngon ga. Shi ikyav tese ér se fa er se kar ve se er kwagh ne ga.”

Shi ior mba zan adua u fada kpishi mba i tôv ve ken tar u Amerika yô, lumun ér gba u Mbakatoliko cii vea pasen loho u dedoo. Nahan cii kpa, hanma ve cii nôngo u lumun ér gbenda u hemban doon u eren kwagh ne yô, ka u za ôron ior loho shon ga, kpa ka u eren aeren a dedoo sha er aa lu mbagenev ikyav i dedoo yô. Kwase ugen ken mba yange i tôv ve la kaa ér: “Ka u zeren ôron kwagh a ior la i lu Ivangeli i pasen ga. Ka se ayol a ase i gbe u se lu Loho u Dedoo ne ye.” Mbagberen magazin u i yer ér U.S. Catholic, mba yange ve tôv ior mban la kaa ér, taver mbagenev u ôron ior kwagh u jighjigh ve u nan la sha ci u “gwa u bo u côôci ve i̱ sember zuan a mi sha ijimba i í gem eren ken côôci la, kua atesen a côôci a wanger ga la kpaa.”

Bishôp ugen ken kwaghaôndo u Methodist kaa wener ucôôci mba ken kwaghaôndo na pav ker kposo kposo shi ve hingir nzughul nzughul, nahan kera mba a gbashima sha tom ve ga, shi i kera fa mkposo ve a ior mba ken tar ga. Nahan a pine sha imo i lanshima wener: “Shin ka unô jim ve kom u vea pase loho u Tartor neo?”

Bishôp ne yange na mlumun sha mpin na ne ga. Kpa mlumun ban sha mpin ne ga. U zua a mlumun ne ken kwaghngeren u a dondon ne.

[Mkaanem ma sha peeji 6]

Loho u dedoo ne ka loho u Tartor u Aôndo kua loho u myom u i zuan a mi sha jighjigh u nan ken Yesu Kristu la