Mpin U Mbaôron Takerada Ne . . .

Mbashiada mba Yehova mba lumun ér i̱ sôr ve twer je he?

▪ Yesu yange kaa ér, “ka mbadedoo kwagh a gbe ve a ortwer ga, saa mba angev mbu ker ve la tseegh.” (Mateu 9:12) Kwagh u Yesu ôr ne tese ér Ruamabera yange se u nengen a mbatwerev sha u ve er se twer ga. Sha nahan yô, Mbashiada mba Yehova mba lumun icigh kua shi twersôron. Ve soo u lun gbong gbong shi tsan ayange kpishi kpaa. Jighilii yô, Mbashiada mba Yehova mbagenev ka mbatwerev er Luka, Orkristu u ken derianyom u hiihii la kpa lu ortwer nahan.—Mbakolose 4:14.

Nahan cii kpa, Mbashiada mba Yehova mba eren twer u ú hendan a atindi a Bibilo la ga. U tesen ikyav yô, mba lumun awambe a tan ga sha ci u Bibilo tswer ieren i yan awambe sha u wasen iyol la. (Genese 9:4; Levitiku 17:1-14; Aerenakaa 15:28, 29) Mkaanem ma Aôndo shi yange se u eren twer u i sôron u sha “tahav mbu ahiriv” shin akombo la.—Yesaia 1:13, NW; Mbagalatia 5:19-21.

Mbatwerev kpishi mba eren twer u waren uuma mba iorov sha gbenda u Bibilo i yange la ga. Twersôron shon u Mbashiada mba Yehova kpishi ve lumun a mi la, ashighe kpishi ka u hemba doon a twersôron u ú hendan a atindi Aôndo la.

Sha kpôô yô, ior mba a mbamnenge kposo kposo sha kwagh u twersôron. Gbenda u sôron twer u ua wase orgen la, alaghga ua lu orgen di a inja ga. Nahan yô, alaghga a gba u oruange u nan soo u eren twer u ua wase nan la nana nenge a mbatwerev uhar sha er nana fa twersôron u ú hembe doon sha ci u nan yô.—Anzaakaa 14:15.

Ka hanma Orshiada u Yehova cii nana tsua gbenda u nan soo ér i̱ er nan twer la kwaghmôm a Mbashiada mbagenev ga. Mkaanem ma Aôndo na ian ér hanma Orkristu nana fatyô u tsuan kwagh u imoshima i nan i lumun a mi la, aluer kwagh shon per tindi u Bibilo ga yô. (Mbaromanu 14:2-4) Nahan yô, gba u hanma or nana tôv sha gbenda u i soo u eren nan twer la nana nenge aluer u hendan a imoshima i nan i Bibilo i tsaase i la ga yô.—Mbagalatia 6:5; Mbaheberu 5:14.

Hanma Orshiada yô, doo u nana nenge ian i nan lu a mi i tsuan twer u sha ishima i nan la vough er nan ngu orderaba u nan lu nahan mato ve nan za nôôr hen akaharagbenda a ior ve ngee her nahan. Aluer nan gba dondon umato mba ve lu nan sha hemen la tsô, nan ngu yemen ayem ayem yô, alaghga nana er aikyôr u vesen. Deraba u fan kwagh yô, nana pande ayem, nana yenge cii ve nana mase yemen ye. Nahan sha kwagh u twersôron kpa kape Mbashiada mba Yehova ve tsuan twer u vea er la torough torough ga je la, shi mba gbe dondon mnenge u ior tsô ga. Kpa ka ve tôv sha igbenda i eren twer i ve soo u tsuan la shi ve hen sha kwagh u atindi a Bibilo a tese la cii ve ve mase tsuan kwagh u vea er ye.

Sha kpôô yô, Mbashiada mba Yehova wuese tom u mbatwerev ve eren kpoghuloo la, kua shi gbashima u ve lu a mi sha kwagh u eren ior twer la kpaa. Shi doo ve kpishi er mbatwerev ve ve ior a mpeveryol sha u sôron ve iangev nahan.