Akaa A Van A Msaanyol Hen Tsombor

Tese Ônov Ou Inja i Dedoo

Ngô ugen ken tar u Mexico, u i yer un ér Loida * yô, kaa ér: “I gema karen mbayevmakeranta ijubu i yaven a or, nahan agumaior hen ér u yaven a mbayevkasev ka kwagh u bo ga; ve hen ér er ve yav a wanyekwase a ijubu la je zayol ngu sha kwagh la ga.”

Ngô ugen ken tar u Japan, mba yer un ér Nobuko, a kaa ér: “Yange m pine wan wam u nomso mer aluer un vea ijende na i kwase mba imôngo ve uhar tseegh nahan una er nena? A kaa a mo ér, ‘M fa ga.’”

SHIGHE u wan wou u nomso shin u kwase lu henen a hen zende la, yange u tôôn ashe ou sha a na kera kpa? Alaghga je yô, yange u yisa ajiir a ken iyou you, ape ikyar i usu u latriki lu la, shi u ver akaa a horon zwa ape una fatyô u aren her ga yô, shi alaghga u yisa tsembe u unden sha mi nyôron ken iyou you la kpaa. U er akaa ne cii sha u wan wou a̱ de vihin iyol ga yô.

Aluer wan wou u a lu hian a hia or la kpa, ka kwagh u ican ga u nengen sha a na nahan ma i doo u sha wono! Ishima hemba nyian we sha kwagh na hegen. Alaghga u ngu henen ken ishima wer: ‘Wan wam u nomso gema nengen ufoto mba jimbagha?’ ‘Wan wam u kwase ngu tindin ior a ufoto nav mba a lu idyelegh ker la sha hanseeti na shinii?’ Shi alaghga u pine iyol you mpin u ka a cier mbamaren iyol kpishi ne, ‘Wan wam ngu yaven a mbayevkasev shin ngu yaven a ioro?’

U Kuran a Kura Wan Wou Hanma Shighe la a Wase U Ga

Mbamaren mbagenev mba den ér ahumbe a ta ônov vev mba ve lu hian a hia la iyol ga, ka ve shi lun ikyua a ve sha u vea fa hanma kwagh u ve lu eren la. Mbamaren kpishi mba ve eren nahan la mase kaven ér ieren ve ne na yô, wan ve la hingir u yeren ve kwagh u a lu jim la. Wan ve u nomso shin u kwase la hingir u fan igbenda i yeren ieren shon i mbamaren vev ve nôngon ér vea yange ve u eren la.

Sha kpôô yô, u veren ashe sha wanye hanma shighe la ka kwagh u una wase nan la ga. Yehova Aôndo iyol na pendan ashe sha ior mba a gbe la hanma shighe sha u una nôngo yô ve̱ ungwan imo na ga, nahan doo u we ormaren kpa u eren a wan wou nahan ga. (Duteronomi 30:19) Nahan u kôrcio u wasen wan wou u nan lu hian a hia la u eren akaa a dedoo nena?—Anzaakaa 27:11.

Kwagh u vesen u una wase u yô, ka u lamen a ônov ou hanma shighe, man u hiin iliam ne a ve shighe u ve lu iyev la je. * (Anzaakaa 22:6) Nahan shighe u vea  va kuma anyom pue-kar, vea ngure ganden la kpa de gbe uwer u lamen a ve ga. Er u lu ormaren yô, doo u a lu we jighilii je wan wou una zuan a mkaanem ma mimi sha ikyev you ye. Alicia, wankwase ugen ken tar u Ingila, kaa ér: “Ior kpishi hen ér se mba hembe soon u lamen a azende a ase sha kwagh u yaven a or, kpa ka mimi ga. Mbamaren asev ka vea lam a vese sha itinekwagh ne nahan i doo se. Se na jighjigh ser vea ôr se kwagh u mimi.”

Ityôkyaa i Í Gbe u Vea Lu a Aeren a Dedoo Yô

Mbayev ka vea nguren vesen yô, i gba u vea seer fan kwagh u yavaor, a kera lu di u fan gbenda u kwase ka nan wa iyav shi nan mar wan la tseegh ga. Shi a gba u vea fa u eren “tom sha mkav u ken ishima, [a] hoghor ve u paven kwagh u dedoo a kwagh u bo.” (Mbaheberu 5:14) U ngeen kwagh ga yô, gba u vea fa kwagh u a lu ieren i vough sha kwagh u yaven a or la shi vea dondo ieren i vough ne kpaa. U tese wan wou u a lu hian a hia la aeren a vough nena?

Hii timen sha aeren a we iyol you u lumun a mi la. U tesen ikyav yô, alaghga u na jighjigh taveraa wer idya, inja na yô ka u or yaven a kwase u nan ga shin kwase yaven a nomsoor u a lu nom u nan ga la, ka kwaghbo. (1 Mbatesalonika 4:3) Alaghga ônov ou fa er u lumun a ieren ngin nahan ga yô; adooga je yô vea fatyô u teren avur a Bibilo a a sue jighjigh wou u nan ne yô. Aluer u pine ve kwagh sha kwagh ne yô, alaghga vea na mlumun fese ér idya i eren ka kwaghbo.

Kpa kwagh ne saa heela ga. Takerada u i yer ér Sex Smart la pase ér alaghga agumaior agen aa senge ér a lumun a mnenge u mbamaren vev sha kwagh u idya la. Takerada ne kaa ér: “Ishima ka i ta ve akperan, nahan ve fatyô u lun a mnenge ve sha kwagh ne jighilii ga. Ka vea tagher a ma mlu u taver abu, a gba u vea tsua kwagh u vea er yô, i taver ve u fan kwagh u a lu u vough man u a lu u shami ga la, nahan ve kera fa kwagh u vea er jighilii ga, maa ve hingir u gban ken mzeyol u vesen.” Ka sha nahan man i gbe u mbayev vea lu a aeren a vough ye. Nahan u wase wan wou u a lu hian a hia la u lun a aeren a vough nena?

Pase ve aeren a vough a we u lumun a mi la wang. U nenge wer ka ior mba ve vese ayol a ve tseegh i gbe u vea yaven ayol a ve yee? Aluer ka mnenge wou la yô, pase wan wou u a lu hian a hia la mnenge ne wang shi pasen un hanma shighe kpaa. Takerada u i yer ér Beyond the Big Talk la kaa ér, kwaghtôvon ugen tese ér, “hen uya mba mbamaren ve pase ônov vev mba ve lu hian a hia la wang ér ve lumun a idya i agumaior a eren la ga cii yô, ônov mbara mba fe nyôron ken ieren i yaven a mbayevkasev shin mbayevnomso la ga.”

Kpa er se vande pasen nahan, aluer u pase wan wou u nomso shin u kwase aeren a vough a u lumun a mi la tsô maa un kpa una dondo a je ga. Nahan kpa, aluer u pase tsombor wou aeren a vough a u soo wer u lu a mi la wang yô, kwagh ne una wase ônov ou u tsuan aeren a vough a vea lu a mi yô. Man kwaghtôvon tese ér shighe u ônov ve lu hian a hia la ka a̱ taver ve u lumun anza a dedoo a mbamaren vev la je kpa, ken hemen yô ve kpishi ka ve hingir u dondon a.

KAR KWAGH NE: Hii iliam a wan wou sha kwagh u i sember ôron sha abaver yô, nahan pase nan aeren a we u lumun a mi la. U tesen ikyav yô, aluer i ôr sha abaver ér aferaior kighir kwase yav a nan yô, u fatyô u kaan a wan wou wer: “Vihim kpishi er nomso mbagenev ve nzughul a kasev nahan. U hen wer anza a dang angela nahan ve za fa a hana?”

Tese ve hanma kwagh u mimi u ú fe sha kwagh u yaven a or cii. Icintan ka kwagh u hange hange. (1 Mbakorinte 6:18; Yakobu 1:14, 15) Nahan kpa, Bibilo tese jighilii ér u yaven a kwase ka iyua i hen Aôndo, ka kwaghhônon u Satan ga. (Anzaakaa 5:18, 19; Icam i Hemban 1:2) Aluer u ngu ôron ônov ou mba ve lu hian a hia la akaa a bo a a lu ken kwagh ne tseegh yô, vea hingir u lun a mnenge u vough ga, u Ruamabera a lumun a mi ga la sha itinekwagh ne. Gumkwase ugen ken tar u France, u i yer un ér Corrina yô kaa ér: “Mbamaren av ka ve shi tan mo icin sha kwagh u idya i eren; kwagh ne na yô m ngu a mnenge u kpeegh sha kwagh u yavaor.”

Pase ônov ou hanma kwagh u mimi sha kwagh u yaven a or cii. Ngô ugen ken tar u Mexico u i yer un ér Nadia yô, kaa ér: “M nôngon u ôron ônov av mba ve lu hian a hia hegen ne hanma shighe mer, u yaven a kwase shin nomsoor ka kwagh u doon u sha gbaaôndo, shi Yehova Aôndo er kwagh ne sha ci u uumace ve ember uma yô. Kpa gba u saa a lu ior mba ve vese ayol a ve tseegh vea yav ayol a ve ye. Aluer se er a iyua ne sha inja yô se zua a msaanyol, kpa aluer se nzughul a i yô se ya ican.”

KAR KWAGH NE: Kwagen u shi u lamen a wan wou sha kwagh u yaven a or yô, kure kwaghôron shon sha gbenda u dedoo. I de cier we iyol u pasen nan wer u yaven a or ka iyua i dedoo i Aôndo a ne se, i̱ nan kpa nana va zua a mi ken hemen zum u nana er kwase shin nana vôso nom u nan la ga. Tese wer u ngu a vangertiôr ken wan wou wer  nana za hemen u kuran tindi u Aôndo sha kwagh u yavaor zan zan shighe la.

Wase wan wou nana nenge a akaabo a a lu ken idya i eren la. Hanma kwagh u agumaior a soo u tsuan u eren ken uma ve cii yô, gba u vea fa akaa i gbe u vea tsua la shi vea fa mtsera man mvihi u a lu ker la, ka nahan man vea tsua kwagh u dedoo ye. De henen wer u agumaior fan kwagh u a lu u dedoo man u bo la tseegh kpa kuma ga. Kwase Kristu ugen ken tar u Australia u i yer un ér Emma yô, kaa ér: “Ka mea hen sha akaa a yange m er sha lan shighe u m lu iyev la nahan, m mase kaan mer aluer or fa atindi a Aôndo tseegh maa tese ér nan lumun á je ve ga. Ka a inja u nana fa mbamtsera mba nana zua a mi sha u kuran a man akaa a bo a nana zua a mi aluer nan per a la.”

Bibilo ia fatyô u wasen, sha ci u í sue atindi a ken Bibilo kpishi sha mkaanem ma tesen kwaghbo u i isholibo i ve a mi la. U tesen ikyav yô, Anzaakaa 5:8, 9 wa agumaior kwagh ér ve palegh idya ‘sha er aa gema icivir ve aa na mbagenev ga’ yô. Er avur ne a tese nahan, agumaior aa a eren idya la nga a vihi inja ve i dedoo man jighjigh u ve ne Aôndo la kua icivir ve kpaa. Nahan mbayevkasev mba ve lu a inja i dedoo shi ve ne Aôndo jighjigh shi ve soo ihyeen ga yô, vea soo u vôson agumaior angara nahan ga. Aluer wan wou u a lu hian a hia la gbidye kwar nenge er u peren atindi a Aôndo la i lu kwagh u una fatyô u vihin un iyol shi nan un ishima vihin shi vihin mlu na vea Aôndo yô, kwagh ne una seer taver un ishima u kuran atindi shon. *

KAR KWAGH NE: Ôr wan wou u a lu hian a hia la anzaakaa a aa wase un u nengen a iwasen i atindi a Aôndo yô. U tesen ikyav yô, u fatyô u kaan wer: “Usu u yôron kwaghyan a mi ka u dedoo; kpa usu u nanden ikyô ka u bo. Kanyi i lu mkposo u iusu i ihiar nee, man mlumun wou ne zua sha kwagh u atindi a Aôndo a we sha kwagh u yaven a or la nena?” Ôr wan wou u a lu hian a hia la kwagh u i nger ken Anzaakaa 5:3-14 la sha er u wase un u kaven akaabo a idya i eren i ve a mi la yô.

Gumor ugen u lun anyom 18, u ken tar u Japan, u i yer un ér Takao yô kaa ér, “M fa er i gbe u me eren kwagh u dedoo yô, kpa hanma shighe yô ka m shi nôngon a asaren a iyolough.” Agumaior a kwagh ve a lu nahan cii yô, ishima i̱ gba ve shimi, gadia mba tswen ga. Apostoli Paulu, u yange lu Orkristu u civir Aôndo tsung la je kpa, kaa ér: “Ka a saren mo u eren kwagh u dedoo yô, kwaghbo kpaa a lu a mo her.”—Mbaromanu 7:21.

Doo u ikyaior ia fa ér ka hanma shighe cii mnenge u nôngon a asaren a bo ken ishima la i lu kwaghbo ga. Iniôngon ve ne ia mgbegha ve vea gbidye kwar a fa injaor i ve soo u hingir yô. Ia wase ve u henen sha mpin ne, ‘M soo mer me kôôm uma wam, me eren akaa a dedoo, sha u ior ve fam er m lu or u lun a inja i dedoo shi civir Aôndo sha mimi kpa, shin m soo mer ior ve fam ér m ngu or u dondon aeren a dang a mbagenev, shin or u dondon asaren am hanma shighee?’ Aluer wan wou ngu a aeren a dedoo yô, una fatyô u nan mlumun sha mpin ne sha inja.

[Ngeren mba shin kpe]

PINE IYOL YOU WER . . .

▪ Ka akaa a nyi nahan a tesem ér wan wam u a lu hian a hia la ngu a inja i dedoo?

▪ M hembe ôron wan wam kwagh u yaven a or sha gbenda u tesen mer kwagh ne ka iyua i Aôndo a ne uumace shin ka kwagh u Satan a hônon ior a mi?

[Ngeren u kiriki u a lu sha peeji 20 la]

Kwaghwan u Bibilo Ngu a Inja Nyian Kpaa

Takerada u i yer ér Parenting Teens With Love and Logic la kaa ér, “Kwaghwan u Bibilo sha kwagh u yavaor la ngu a inja nyian kpaa. Hegen u agumaior man agumaukase a lu tagher a mbamzeyol mba idya i eren i̱ ve a mi, er iyav mbu wan hen ya man angev mbu AIDS kua iangev mbigenev mbi sha idya nahan la, kwaghwan u Ruamabera u a kaa ér i̱ lu mba ve vese ayol a ve tseegh ve yaven ayol a ve la . . . ngu a inja kpen kpen, ka gbenda u yaven a or u ú lu a mzeyol shio shi u hembe doon kpaa je ne.”