Kporom Hen Aôndo

“Tom u Ave Ou Ua Sar U”

OR U doon se ishima ka nana ya ican zan zan nana kar kpen nahan i vihi se kpishi. Ka se zungwe ku u nan la tsung. Doo se kpishi u fan er Yehova Aôndo, un u a gbe se la, a lan ijungwen yase ga nahan. Heela tseegh ga, sar un tsung u hiden nan mbakpenev uma sha tahav nav mbu hemban cii mbura. Nenge ase er mkaanem ma Yobu yange ôr ken Yobu 14:13-15 ne ma ne se ishimaverenkeghen yô.

Ka kwagh u yange za hemen je ne. Yobu, or u lun a jighjigh u nan taveraa yange ya ican—akaa a na saa cica cii, shi ônov nav mba doon un ishima mbara kpe purututu shi Yobu gba angev mbu nyoon tsung. Er lu ken mnyoon kpishi yô, a vaa a Aôndo a kaa ér: “Kpe ahii, ma U yerem shin Sheol [uwar u uumace jimin cii]” la. (Ivur 13) Yobu yange nenge Sheol ér ka ijiir i una lu ve una kera ya ican ga yô. Una lu shin Sheol er ka kwagh u injaa u Aôndo a koso yô, nahan una kera ya ican ga shi una lu ken mnyoon kpaa ga. *

Lu u Yobu una lu shin Sheol gbem sha wono? Yobu na jighjigh nahan ga. A za hemen a msen na la ér: “Kpe ahii . . . ma U verem shighe, ma U shi U umbur mo!” Yobu lu a ishimaverenkeghen a akperan shio ér mlu na shin Sheol la una lu hira tsô, shi Yehova una hungur un ga. Yobu tôô shighe u una lu shin Sheol la kar sha “mnenge u sha ican” na—inja na yô, a gba u una kegh shin Sheol kpee je. Una kegh a kuma shighe nena? A kaa ér: “Zan zan mdugh wam una kar kuman.” (Ivur 14) Inja i mdugh la yô, ka u duen shin Sheol kera—u ôron sha gbenda ugen yô, a nder un shin ku kera!

Er nan ve Yobu yange na jighjigh ér mdugh na la una va? Sha ci u yange fa er ishima ka i lu Orgban se u se doo un ishima la ker sha kwagh u mbacivir un mba mimi mba ve kpe mbara yô. Yobu kaa ér: “Ú yila, mo me gema me vengese; tom u ave Ou ua sar U.” (Ivur 15) Yobu kav er un lu tomaveegh u Aôndo yô. Un u a ne uumace uma, u yange i jire Yobu ken sagh sha tahav nav la, una fatyô u hiden nan Yobu uma shighe u una kpe kera la.—Yobu 10:8, 9; 31:15.

Mkaanem ma Yobu man tese se kwagh u mhôônom ma kôron ma Yehova a lu a mi la: Yehova lun kôôsôô a mba ve gem ayol a ve ve we sha ikyev na sha u á maa ve vea hingir ior mba doon sha ishigh nagh er Yobu nahan la. (Yesaia 64:8) Ior mba civir Yehova sha mimi gba un kwagh kpen kpen. “Sar” un kpishi u hiden nderen mbajighjigh nav mba ve kpe la. Nahan yô, orfantakerada ugen kaa ér, “sha mimi yô,” ishember i ken zwa Heberu i í gem i ér “sar” ne “i̱ hemba pasen isharen i or ka nan lu a mi ken ishima tsung sha u eren ma kwagh la a hanma ishember igen cii.” Sha mimi yô, Yehova umbur kwagh u mbacivir un mba ve kpe la tseegh tsô ga, sar un kpishi u hiden nan ve uma kpaa.

Kwagh u doon yô, Yehova yange nenge ér doo u una pase awashima na u a soo ér una va nder mbakpenev shin ku la ken takerada u Yobu, u ú lu môm ken ityakerada i Bibilo i yange i hii ngeren la. * Kwagh ne una fatyô u wasen se u wan ishima zum u or kpe se yô. Er nan u seer henen kwagh u Aôndo u dooshima ne man gbenda u ú wa iyol you sha ikyev na sha u a̱ maa u ú hingir or u ú va nenge a mkur u awashima na ne ga?

[Ngeren mba shin kpe]