Tese Ônov ou

Yange Doo Aôndo kua Azende a Na Ishima

OR MÔM kpa nan fa iti i wankwase la nyian ga. I fa un hegen ka sha iti i ter na tseegh, ka Yefeta je la. De ase se ôr ken Bibilo se fa kwagh u or ne vea wan na u kwase la. Wan u Yefeta ne yange doo Yehova ishima, shi azende a na kpa soo kwagh na kpishi.

Se fatyô u ôron kwagh u Yafeti kua wan na u kwase ne ken Bibilo, ken takerada u Mbaajiriv ityough 11. Er Yefeta lu or u civir Aôndo sha jighjigh yô, a̱ shi nan kpa yange tesen wan na u kwase la akaa a ken Ruamabera hanma shighe.

Yefeta lu uma cii man shighe u Mbaiserael, nongoior u Aôndo la, sôn ér i̱ na ve tor u nana hemen ve ye. Yefeta lu or u taver iyol shi fan ityav mbi nôngon kpaa. Nahan Mbaiserael kaa ér a hemen ve vea za nôngo ityav a Mbaamon, ikyurior i wan ndor a ve, i i lu nôngon ityav a ve la.

Yefeta yange soo wener Aôndo a hemen un una za hemba Mbaamon ityav, nahan a er iceghzwa a na. Yefeta kaa ér aluer Yehova wase un, un hemba ityav mbira yô, nyityô or u nana hii duen sha u va keghen un gbenda, zum u una hide hen ya na cii yô, nana lu kwagh u Yehova. Lu u or la nana za eren tom ken tabernakel u Aôndo sha ayange a uma u nan cii. Tabernakel lu ijiir i ve civir Aôndo her sha ayange la yô. U fa or u yange nan hii duen sha u va keghen un gbenda kpa?— *

 Een, lu wan u Yefeta u kwase ne je za due ye! Kwagh ne vihi Yefeta kpen kpen. Lu a wan môm tseegh. Kpa vande eren iceghzwa a Yehova, shi lu u una kure i kpee. Wan na u kwase la kende her je kaa ér: “Terem, u bugh zwa a TER; yô, er a mo sha kwagh u a dugh ken zwa wou yô.” Tsô a kaa ér i na un shighe iwer ihiar sha er una za sha iwo una za vaa yô. Hii nan ve kwagh ne vihi ve yum nahana? Ka sha ci u yange gba u aluer ka u una kure iceghzwa i ter na ne yô, una kera vôso nom ga shi una mar wan kpaa ga. Nahan cii kpa, a de ér asaren a na iyol na a hemba gban un kwagh ga. Yange soo u ungwan imo i ter na shi tilen sha mimi hen Yehova kpaa. U nenge wer ieren na ne yange ia na a saan Yehova kua ter na iyol ga he?—

Yafeti maa na wan na u kwase ne gbenda vea azende a na iwer ihiar. Zum u za hide yô, ter na kure iceghzwa la sha u tindin un ér a za er tom ken tabernakel u Aôndo ken Shilo sha ayange a uma na cii. Hanma inyom yô, ônkasev mba Iserael ve duen ve zaan ken Shilo sha u za taver wan u Yefeta u kwase ne ishima.

We u fa mbayev mba ve ne mbamaren vev civir shi Yehova a doo ve ishima kpa?— Doo u ú seer fan amba a mbayev la shi u kôr ijende a ve kpaa. Aluer u dondo ieren i wan u Yafeti u kwase ne, u ngu ungwan kwagh shi u ngu a ieren i mimi yô, u zua a azende a dedoo. U na a saan mbamaren ou iyol, shi u doo Yehova ishima kpaa.

Ôr ken Bibilo you

Duteronomi 6:4-6

Mbaajiriv 11:30-40

1 Mbakorinte 7:37, 38

[Ngeren u shin kpe]