Er U Er Ve U Vihin Inyaregh A Hemban Ki U Zough A Mi La Ga Yô

INJAKWAGH igen kaa er: “Ka wea lu a ikyondo ga ú de ave sha kor.” Injakwagh ne wase se u fan ser gba u se vihin inyaregh a hemban inyaregh ki se zuan a mi la ken inya ga. Shin er i lu inja er kwagh ne taver ga nahan kpa, u̱ eren sha kwaghwan ne shi zuan a iwasen ker la ka kwagh u zange ga. Luun er ior mba nôngon u dondon kwaghwan u injaa ne yô, ma ve kera nyer ken zayol u inyar kpishi ga ase je. Kpa vea er kwagh ne nena? Ka han se fatyô u zuan a akaawan a wasen se? Bibilo ngi a kwaghwan u injaa, u una wase se sha gbaa ne yô. De se sav nengen sha akaa a Bibilo i er la.

Akaawan a Bibilo A Aa Wase Se Yô

Bibilo ngi a akaawan kpishi a aa wase u ú vihin inyaregh you sha inja yô. De se time sha agen kpuaa. Ôr tsô u nenge, aluer wea lumun wer mimi je akaawan ne aa fatyô u wasen we u vihin inyaregh er tahav ou mbu kom la ga yô.

Ver inyaregh sha kwagh u ú soo u eren la. Cii man u̱ fa u vihin inyaregh sha inja yô, a gba u ú fa inyaregh ki u zough a mi man kwagh u ú vihin ki sha mi la kpaa. Bibilo kaa ér: “Mbamhen mba ortseenshima, ka sha u kwagh ma a ngee yô, kpa hanma or u nan torough kwagh yum yô, ka ken ibanave nan lu zan ye.” (Anzaakaa 21:5) Mbagen ka ve ver imbulugh ve waan inyaregh ker. Ka ve ver imbulugh u sha hanma kwagh u ve vihin inyaregh sha mi cii, er “kwaghyan” man “Haya u ya” shin “Akondo” nahan. Wea lu eren kwagh ne sha gbenda u kiriki ne shin a lu gbenda u vesen u hemban ungun kpa, kwagh u vesen yô, fa kwagh u u vihin inyaregh you sha mi yô. Ishima i hemba lun we sha akaa a a lu hange hange la, i de lu uyôughyôughmbaakaav ga.

Palegh u tômon kwagh u or. Ior kpishi ken ityar i lun a kwagh ave ga ka ve tômon akaa a ior mba ken ityar i i lu a kwagh ave ve lu a mi la. Hide sha ior asange asange kpa, mbakpishiv ka i sar ve u lun a akaa a mbawanndor a ve ka ve sôôn ve a mi la. Kwagh ne una fatyô u lun imeen. Adooga mbawanndor a ve mbara je kpa vea fatyô u yamen kwagh la sha inyaregh vev keng ga. Inja na nan man ú dondo or ityô ken ibume, ú za nyôr ken zayol u inyara? Bibilo ta icin ér: “Or u nan we [hua] yô, nan kumbur sha u hingir ornyar, nan kera fa ase er ibanave ia va tser nan ga.”—Anzaakaa 28:22.

Eren akaa ken uma wou akuma akuma. Yesu yange wa mbadondon un kwagh ér ve ver  ishe ve “dedoo.” (Mateu 6:22) Aluer mlu wou kuma u yan ishu i ombor shi man mngerem tseegh, man u ngu veren ishima wer u maan pepesuupu sha bia yô, u ngôôr nyôron ken zayol u nyar ga. Banke ugen u i yer ér Asian Development Bank la pase ér, ken tar u Philippines yô, hanma iorov utar cii, or môm ken a ve nan nôngo u kungun ican; ken tar u India di mba kungun ican hemba iyenge, inja na yô, mba fetyô u zuan a inyaregh ki kuman er ₦205 nahan ken iyange ga. Shighe u ior ve lu ken imba ibanave ngira nahan yô, ka a inja u vea ver ishima sha akaa a a hembe lun hange hange la. Shi ior mba ken ityar i lun a kwagh ave la je kpa kwaghwan ne una wase ve u panden mbamzeyol mba sha kwagh u inyar kpishi.

Wea zua a akaa a hange hange la yô, i̱ kuma u. Kwaghwan ne za ihyan i môm a kwaghwan u i we ér se eren akaa ken uma wase akuma akuma la. Bibilo wa se kwagh sha gbaa ne ken 1 Timoteu 6:8 ér: “Aluer sea lu a kwaghyan man akondo yô, i̱ kuma se.” Mbagenev ken mba i hembe saan ve iyol ken tar ne mba a inyarev keng ga; nahan kpa, mba zough a mkom sha kwagh u ve lu a mi la, man ka inyaregh tseegh ga, kpa ka mdoo u tsombor ve man azende a ve a doo ve ishima la.—Anzaakaa 15:17.

Palegh anzô a gba dang dang. Sha kpôô yô, kwaghôron u Bibilo ne ka u mimi, a kaa ér: “Mbanyarev ka ve tema tor sha mbaatsanev, man or u yan injô yô, ka kpan u or u nan injô la”! (Anzaakaa 22:7) Shin er alaghga mbamlu mbagen vea na or nana fatyô u palegh injô ga nahan kpa, mba ve gbe gban injô tsô ér vea yam kwagh u ve soo la, ashighe kpishi ka ve tagher a zayol u inyar u vesen. Orgen ken tar u Philippines, mba yer un ér Eric, a kaa ér: “Ka mea za u yamen kwagh sha injô yô, m hemba yamen ngeen a shighe u m lu yamen sha inyar la. Ka mea va gema kimbin yô, inyaregh ki m ver sha ci u akaa agen la cii ki bee.” Nenge imba er i doo u se wa ikyo tsung, shighe u se lu tôôn kwagh sha injô la sha wono!—2 Utor 4:1; Mateu 18:25.

Koso inyaregh cii man u yam kwagh ye. Shin er alaghga mbagen vea nenge ér u̱ koson inyaregh cii man yamen kwagh la ka ieren i yan tsegh nahan kpa, gema ka môm ken igbenda i hemban doon, i ia wase or u palegh zayol u inyar yô. U eren nahan la wase ior kpishi u palegh injô man uzayol mba injô i̱ ve a mi la, er u kimbin lua u vesen u ka i wa sha injô la nahan, man kwagh ne ka a na or nan hingir u vihin inyaregh seer sha hanma kwagh u nan yam la. Bibilo ôr kwagh u iyôn ér ngi a “kwaghfan,” gadia ngi “koson iyiav mbi i sha shighe u sunda” sha ci u kper ken hemen.—Anzaakaa 6:6-8; 30:24, 25.

Hen Kwagh hen Mbagenev

Alaghga akaawan a Bibilo a se lam sha mi ne aa doo u ungwan kpen kpen, kpa mimi je nga wasen ior u eren kwagh er tahav vev mbu kom laa? De se nenge kwagh u ior mba yange ve dondo akaawan ne ve a wase ve u nengen sha mbamtaver mba sha kwagh u inyar doo doo yô.

Diosdado, ter ugen u lun a ônov unyiin pase ér zayol u inyar u ityar kpishi i tagher a mi semberee ne na yô, hemba taver un u nengen sha mbamgbe mba tsombor na cii. Nahan kpa, a  gema a kav er i doo u una burun inyaregh una veren sha akaa a un soo u eren la vough vough yô. A kaa ér: “Ka m bur inyaregh ki m zuan a mi la cii m ver vough vough, shi m nger akaa a m soo u vihin inyaregh sha mi la cii shin inya.” Ka kwagh u orgen u i yer un ér Danilo kpa ka a er je ne. Un vea kwase na ve lu eren ankpenga u cuku, kpa kpenga ne va gba. Nahan kpa, er ve koson inyaregh sha akaa a ve soo u eren yô, mba kuren mbamgbe vev vough vough. Nahan a kaa er: “Se fa inyaregh ki se zuan a mi ken uwer yô, shi se fa ki se vihin ken uwer kpaa. Er se fe akaa ne nahan yô, ka se lam sha kwagh u inyaregh ki i gbe u se vihi sha akaa agen la dike dike.”

Mbagenev ker gbenda u vea vihi inyaregh a hemba kwagh u ve ver ér vea vihi la ga yô, nahan ve nenge ér doo u vea pande u vihin inyaregh kpishi sha akaa agen. Kwasecôghol ugen u lun a ônov utar, mba yer un ér Myrna, a kaa ér: “Mo vea ônov av se de u zan mbamkombo mba nongo u Kristu sha umato mba kuran pasenja, hegen ka se za angahar.” Myrna nôngo kwagh sha u tesen ônov nav er i doo u vea eren kwagh ken uma ve akuma akuma yô. A kaa ér: “M nôngo mer me ver ve ikyav i dedoo sha u dondon kwaghwan u a lu ken 1 Timoteu 6:8-10, u a tese er i doo u kwagh u or lu a mi la una kuman nan la.”

Ter ugen u lun a mbayev uhar, mba yer un ér Gerald; ka kwagh u un kpa a er je la. A kaa ér: “Ka sea tema Bibilo i henen hen tsombor wase yô, se ôr kwagh u Mbakristu mba ve ver ishima sha kwagh u a hembe lun hange hange la, ka ikyar i ve ye vea Yehova la je la. Kwagh ne va a kwagh u dedoo kpishi, gadia mbayev asev mba za gbe kitô sha ibumekwagh ga.”

Kwase ukwa ugen mba yer un ér Janet, ngu eren tom u tesen ior Bibilo hanma shighe ken tar u Philippines. I sember den un tom, kpa ngu vihin inyaregh er tahav nav mbu kom la. A kaa wener: “Ka m kôr iyol yam tsaha ve m er kwagh ne ye, shi m vihin inyaregh yagh sha akaa a a hembe lun a inja la tseegh. M kera keren u za yamen kwagh ken ushôôpu mba taver kwagh ishe ga, ka m keren mba ve teen kwagh ishe guda la. Aluer mba teen kwagh sha ishe i alaha yô, me za keren u yamen sha ishe i taver mer nyi? Shi m gbe nengen a kwagh tsô maa yamen ga.” Janet nenge er i lu a inja u koson inyaregh sha ci u ken hemen yô. A kaa ér: “Inyaregh ka kia neer yô, kia lu cuku nan nan kpa, m koso ki her sha er kwagh a va gba aburabur kpa me kure yô.”

U Fatyô u Eren Kwagh er Tahav Ou Mbu Kom La

Sha kpôô yô, mbagenev kav ér, shin er Bibilo i lu takerada u u hembe haren sha u wasen se sha akaa a ken jijingi nahan kpa, ngi a akaawan a lun se a inja sha akaa a iyolough kpaa. (Anzaakaa 2:6; Mateu 6:25-34) Aluer u ngu dondon akaawan a i er ken ngeren ne, shi u ngu henen kwagh sha ieren i mbagenev mba ve zough a mtsera sha u dondon akaawan ne yô, we kpa u fa u eren kwagh er tahav ou mbu kom la. Aluer u er nahan yô, u war atsan man ishimanyian i ior umiliôn imôngo ve lu ker nyian la.

[Mkaanem ma sha peeji 10]

‘Ka se lam sha kwagh u inyaregh ki se fatyô u vihin la dike dike’

[Mkaanem ma sha peeji 11]

‘Se de u zan mbamkombo mba nongo u Kristu sha umato mba kuran pasenja, hegen ka se za angahar’

[Mkaanem ma sha peeji 11]

‘M gbe nengen a kwagh tsô maa yamen ga’