Akaa a Van a Msaanyol hen Tsombor

Gbenda u Wan u Maren A Benden a Ivese La

Charles kaa ér: * “Mo vea Mary yange se ember mar u wan wase u kwase la je zua ga. Kpa iwer ngi kar kpuaa yô, m kera gba yaven tsembelee ga. Yange se vande wan ago a yesen un tsembelee, nahan kpa, ica i gba ga tsô ago a se wa la cii kera lu se a iwasen ga.”

Mary kaa ér: “Yange m maren wan wase yô, m kera gba fantyô u eren kwagh ugen môm ga. Ica gba ga tsô, ishima kera gba lun mo sha kwagh ugen ga saa kwagh u atumba a ken fidin a me va na un la, shin ibyôr i me va musan un la, gayô er me va kumbur un una de mliam la. Mgem u ken uma wam ne yange lu kwagh u kiriki ga. Iwer yange i kar imôngo cii ve, ivese yam vea Charles hide lu er shighe u se lu a mar wan ga la ye.”

IOR kpishi nenge ér u maren ônov ka môm ken akaa a a hemban nan or msaanyol cii. Bibilo kaa ér ônov ka “injar” i Aôndo a ne yô. (Pasalmi 127:3) Mbamaren mba ve hii mar, er Charles man Mary nahan, fa ér mbayev vea fatyô u geman mlu u ken ivese kpoo. Ikyav i tesen yô, alaghga kwase u nan hii mar yô nana ver ishima sha wan u nan kpishi, je yô a kpiligh nan iyol er wan u nan u he ne ka una kine a kine kpa ishima i yina nan yô. Or u nan hingir ter u he la di, adooga a kpiligh nan iyol er kwase u nan a hingir u varen a wan ve u he la kôôsôô yô, shi alaghga ishima ia za nan iyol er kwase u nan a gbe den u veren ishima sha a nan kpoo yô.

Sha kpôô yô, alaghga mar u wan u hiihii la ua seer van a mbamgem ken ivese. Tom u lun ormaren la ua na yô, alaghga ishimanyian i nom shin kwase la ia hingir u duen ken igbar, kua mbamzeyol vev mba ve fetyô u sôron ga la kpaa.

Mbamaren mba ve hii mar la vea er nan ve vea kôrcio u nengen sha wan ve u he la ken atô u aniwerev mba hiihii, mba ka i gba u vea ver ishima ve cii sha mbamgbe nav laa? Kanyi nom man kwase vea er ve vea za hemen u lun kôôsôô? Shighe u ayôôso a gbe hen atô ve sha kwagh u gbenda u yesen wan yô, vea sôr a nena? De se time sha mbamtaver mban, shi se time sha gbenda u akaawan a Bibilo aa fatyô u wasen mba ve vese ayol a ve la u sôron mbamzeyol mba shon la kpaa.

MTAVER U HIIHII: Ka i va gba kpoo u a gema nengen sha wan a hanma orgen cii.

Wan u he ka nan ya ngô u nan shighe shi ka nan zer henen sha kwagh u wan u nan la gbem.  Alaghga nana zua a mkom kpishi ken ishima er nan lu nengen sha wan u nan tsembelee la. Kpa adooga nom u kwase la di, una nenge ér i ta un kera. Nom ugen ken tar u Brazil, iti na ér Manuel, a kaa ér: “Mgem u yange hemba taver mo u lumun a mi cii yô, lu mde u kwase wam de u veren ishima sha a mo, kpa gema hemba veren ishima na cii sha wan wase la. Sha hiihii la kwase wam yange hemba veren ishima sha ivese yase la, kpa ica gbe ga yô, kwase wam hingir u hemban veren ishima sha wan wase la.” U nôngo a imba mgem u ken ivese ne nena?

▪ Kwagh u vesen u una wase yô: Wa ishima. Bibilo kaa ér: “Dooshima we ishima, lu sar sar.” Dooshima “keren kwagh na iyol na tsô ga, nyoon ishima ga.” (1 Mbakorinte 13:4, 5) Shighe u nom man kwase ve mar wan u he yô, kanyi ve cii vea er ve vea fatyô u dondon kwaghwan nee?

Nom u lun a kwaghfan ka nan tese ér kwase u nan doo nan ishima sha u henen sha gbenda u mar ka u bende a kwase sha iyol man ken ishima kpishi la. Aluer nom er nahan yô, nana fa ityôkyaa i í ne ve ashighe agen mlu u kwase u nan ngu a kôr a gema kpoo yô. * Ter ugen ken tar u France, iti na ér Adam, ngu a wan u kwase u lun iwer 11, a kaa ér: “Ashighe agen kwase wam ngu a gba uren tsô, kwagh ne ka a na i taver mo kpishi u wan ishima a na. Kpa ka m nôngo m umbur er i lu mo jighilii ishima i lu vihin un a mo ga yô. Kpa, ka sha ci u mbamtaver mba mlu wase u he ne a ve a mi la.”

Ashighe agen ka i taver kwase wou u nengen a iwasen i u lu nôngon wer u na un laa? Aluer kwagh ngu nahan yô, ishima i de vihin we ker fese ga. (Orpasenkwagh 7:9) Kpa gema wa ishima, vande veren mkpeyol u nan hiihii, i de lu u wou ga, nahan u palegh ishimanyoon.—Anzaakaa 14:29.

Hide sha vegher ugen di yô, kwase u kaven kwagh nana nôngo a taver orya u nan ishima ken tom u nan u he, u lun ter la. Nana de ér nom u nan kpa a nengen sha wan; nana wa ishima nana tese nom u nan u musan ibyôr shin haan atumba ken fidin, shin er adooga nana fa u eren akaa ne tsembelee sha hiihii la ga nahan kpaa.

Ngô ugen u lun anyom 26, mba yer un ér Ellen, yange kav ér gba u una sôr gbenda u un eren kwagh a nom na la. A kaa ér: “Yange gba u me pande m-uv u m uven iyol sha wan wase la. Shi yange i gba u me umbur iyol yam mer shighe u nomom a lu nôngon ér una er sha mbamhen mba m dugh a mi sha igbenda i una nenge sha wan la yô, doo u me kera ker ngegh ngegh ga.”

KAR KWAGH NE: Ne kasev, aluer orya wen er akaa a nengen sha wan agenegh sha gbenda u ne eren la ga kpa, palegh ieren i puun nen nan shin hiden kimbir eren kwagh u nan er la. Wuese nomou sha kwagh u a er sha afatyô na cii la; ka nahan man una seer lun a vangertiôr shi u taver un ishima u nan we iwasen i u soo la ye. Ne Noov, pande nen u vihin shighe sha akaa a a lu hange hange ga la, sha er ne seer zuan a shighe u wasen kwase wen yô, hemban je yô, shighe u kwase wen a mar ica i lu a gba ga la.

MTAVER U SHA UHAR: Ikyaryan i nom vea kwase la ka i ndôhôr.

Ivôron i mnyam ma tsere tse tsere kua mbamzeyol mba aburabur ka ve na yô, i taver mbamaren mba ve hii mar la kpishi u zan hemen u lun kôôsôô ayol a ve. Ngô ugen ken tar u France, u i yer un ér Vivianne, a lu a ônov uhar yô, pase ér: “Sha hiihii la, yange m ver ishima sha tom u ngo la je m nôngo u hungur a tom wam u kwaseya la.”

Sha vegher ugen yô, alaghga nom nana kav er iyav mbu kwase u nan nan we la mbu bende a nan, sha iyol man ken ishima nahan ga. Wan u ne sember maren la una fatyô yan shighe kua agee a ngise ne lu a mi u yaven a ayol a en, shi taver ayol a en asema la. Sha nahan yô, nom man kwase vea er nan ve wan u doon ve ishima, u una fatyô u nengen sha iyol na ga la, una va ve a mpav ga?

▪ Kwagh u una wase yô: Hide taver nen dooshima wen la. Bibilo ôr kwagh u ivesegh ér: “Or  ka nan undu ter u nan kua ngô u nan, nan var ken kwase u nan, ve hingir iyôgh i môm.” * (Genese 2:24) Awashima u Yehova Aôndo yange lu u ônov ve undun mbamaren vev shighe u ve we ikyondo yô. Kpa hide kwase man nom yô, Aôndo soo ér mlu u ve lu iyôgh i môm la a lu gbem sha won. (Mateu 19:3-9) Aluer nom man kwase mba ve hii mar la kav inja i kwagh ne yô, una wase ve u zan hemen u tsuan akaa a kwagh a hembe gban sha mi la nena?

Vivianne, u se vande ôron kwagh na la kaa ér: “Yange m hen sha mkaanem ma ken Genese 2:24 mara, nahan ma wasem u kaven mer m hingir ‘iyôgh i môm’ vea orya wam, ka vea wan wam ga. Yange m nenge mer gba u me taver ivese yase.” Ngô ugen u a lu a wan u kwase u lun anyom ahar yô, mba yer un ér Theresa, a kaa ér: “Ka mea hii u nengen mer m kera ngu lun kôôsôô a nomom ga yô, fese je maa m hii u veren ishima sha a na tsembelee, ka a gba u me er nahan shighe kpuaa ken hanma iyange je kpaa.”

Aluer u ngu nom yô, kanyi u fatyô u eren sha u taver ivese youwe? Kaa a kwase wou wer a doo u ishima. U ôron nahan cii yô, tese dooshima la sha u eren a na kundu kundu. Nôngo kpoghuloo kwase wou a de henen ér alaghga un doo u ishima ga ze. Ngô ugen u lun anyom 30, iti na ér Sarah, a kaa ér: “Gba u kwase nana za hemen u fan ér nan doo nom u nan ishima shi nan gba un kwagh kpaa, shin er iyol i nan i gem sha ci u iyav mbu nan we la nahan kpaa.” Ter ugen ken tar u Jamani, u lun a ônov mba nomso uhar, iti na ér Alan, a tese er i gbe u a nengen sha mbamgbe mba kwase mba ken ishima yô. A kaa ér: “Ka m nôngo mer me sue kwase wam shighe u kwagh a ze un iyol cii.”

Se lan er ka a mar wan u he ve kwagh ne a tagher myav u kwase vea nom yaven ayol a ve la ga yô. Nahan gba u nom man kwase vea lamen a ayol a ve sha mbamgbe vev. Bibilo kaa ér, mbamgem mba ka ve va sha kwagh u kwase vea nom yaven ayol a ve la ka ve na yô, i gba u vea “zua zwa” sha kwagh shon. (1 Mbakorinte 7:1-5) Kwagh ne tese ér gba u vea lamen a ayol a ve. Gbenda u i yese u shin aeren a hen ijiir i u vese her la aa na yô, alaghga a taver we u lamen a kwase wou shin nomou sha kwagh u yaven ayol a en. Nahan kpa, imba iliam ne ngi hange hange sha shighe u nom vea kwase ve lu henen a hen tom ve u lun mbamaren la. Mhôônom ma kôron we a orgen la, shi waan ishima a nan, shi eren kwagh a nan sha mimi kpaa. (1 Mbakorinte 10:24) Aluer u er nahan yô, ne palegh anyiman, shi kwagh ne una seer taver dooshima u hen atô wen la.—1 Peteru 3:7, 8.

Shi nom man kwase vea seer taver dooshima u hen atô ve la sha u wuese ayol a ve. Nom u lun a kwaghfan nana kav er kwase u nan hii mar la ka nan er ityom kpishi i nom ngu a nenge a mi ga yô. Vivianne kaa ér: “Shin er ka m nengen sha wan zan zan nahan kpa, ashighe kpishi ka i lum er sev av m er kwagh môm ga tsô tugh kar ilen nahan!” Er kwase u kaven kwagh ka nan zer nengen sha wan zan zan nahan kpa, nana̱ ver ishima sha er nana laha iwasen i nom a lu nan tsombor la ga yô.—Anzaakaa 17:17.

 KAR KWAGH NE: Ne ungôôv, aluer gba sha mi yô, er nen icin mnya shighe u wan wen a lu yaven la. Ne er nahan yô, ne hide ne wa agee iyol, nahan ne seer lun a tahav mbu nengen sha ivese yen. Ne uter, shighe u i gbe sha mi cii, mough nen tugh, na nen wan kwaghyan shin musan nen un ibyôr, sha er kwase wen una mem yô. Taver dooshima u ú lu a mi sha kwase wou la hanma shighe sha u ngeren mkaanem ma doon kpuaa veren un, shin tindin un a loho sha hanseeti gayô lamen a na sha telefon. Er ne vese ayol a en yô, ver nen shighe u ne uhar tseegh ne lamen yô. Lam nen sha kwagh wen, i de lu kwagh u wan tseegh ga. Nôngo ikyaryan yen i taver, nahan a hemba lun ne zange u nôngon a mbamtaver mba mbamaren ve tagher a mi la.

MTAVER U SHA UTAR: Ú lumun a gbenda u i lu yesen wan la ga.

Alaghga nom man kwase vea mase kaven ér gbenda u yange i yese ve la na yô, ka ve gba anyiman ayol a ve. Ngô ugen ken tar u Japan, iti na ér Asami, man nom na, iti na ér Katsuro, yange ve tagher a zayol ne. Asami kaa ér: “Yange m nenge mer Katsuro haa iyol inya a wan wase u kwase la ngee gande, un di gema lu nengen ér mo ka m tsaha wan wase u kwase la i ngee yum.” Ne er nan ve ne palegh anyiman ayol a ene?

▪ Kwagh u una wase yô: Lamen nen ayol a en shi suen nen ayol a en kpaa. Tor u fan kwagh, Solomon, yange nger ér: “Iyolgengese ngi ne num tsô; kpa mba ve ngohol mhen u mimi yô, kwaghfan ngu her a ve.” (Anzaakaa 13:10) U fa gbenda u orya wou shin kwase wou ka a soo u yesen ônov la za kighir nena? Aluer ne de ner saa ne va mar wan man ne lam sha akaa a a bende sha kwagh u myese u wan jighilii la yô, alaghga ne va kav ner ne hide ne mba hendan a hendan kwagh ayol a en, a u ma ne lu keren gbenda u hemban mtaver shon tsembelee la.

Ikyav i tesen yô, ka mbamlumun sha mbampin mba ve dondo shin heen mba nyi ne gbe zwa môm sha mini: “Se tese wan wase u yan kwagh sha inja man u yaven sha inja nena? Doo u hanma shighe u wan ne a vaa tugh cii yô se kôr unu? Se nôngo a mbamtaver mba ve lu ken u tesen wan u zan akôngo ken ihyungwa la nena?” Akaa a ne tsough u eren la aa lu kposo a akaa a mbamaren mbagenev ve tsough la je ka u henen a hen ga. Ter ugen u lun a ônov uhar, iti na ér Ethan, a kaa ér: “Aluer kwagh due yô, gba u ne lam sha mi imôngo sha er ne gba zwa môm yô. Aluer ne er nahan yô, ne fatyô u zuan ave nengen sha mbamgbe mba wan wen.”

KAR KWAGH NE: Time sha igbenda i yange mbamaren ou tese u shighe u ve lu yesen we la. Tsua aeren man mbamnenge vev mba u soo wer u dondo shighe u ú lu tesen wan wou la. Shi tsua aeren man mbamnenge vev mba u soo u palegh la kpaa, aluer mba yô. Lam a nomou shin kwase wou sha akaa a u tsough u eren la.

Wan Una Fatyô u Geman Mlu u ken Ivese sha Gbenda u Dedoo

Gba u shighe a kar cii ve, tom wen u he u lun mbamaren la ua hoghol ne ye, di vough er or ka nana wa akôv a he ve i gba u nana wa ishima shi shighe a kar cii ve a hoghol nan a mi nahan. Nahan kpa, shighe a karen yô, ne lu a vangertiôr.

Wan u yesen una bende a ishima i ú ver sha ivaa you la shi una gema mlu u ne lun imôngo kôôsôô la gbem sha won. Nahan kpa, kwagh ne shi una bugh u gbenda u lun a aeren a injaa. Aluer u dondo akaawan a injaa a Bibilo i we la yô, we kpa kwagh wou una lu er ter ugen u i yer un ér Kenneth la nahan. A kaa ér: “Ônov mba yesen wasem vea kwase wam kpen kpen. Hegen yô, hanma wase nan kera keren kwagh u nan iyol i nan tseegh ga, shi se hemba soon ayol a ase shi se fa u wan ayol a ase ikyo hemba ave a tse.” Hanma or je kpa nana soo mbamgem mban ken ivese i nan.

[Ngeren mba shin kpe]

PINE IYOL YOU WER . . .

▪ Kanyi m er ken kasua u a sember been la u tesen ikyarem mer m ngu a iwuese sha kwagh u a er sha ci u tsombor wase laa?

▪ Ka hanma shighe yange m mase lamen iliam i sôngo sôngo vea kwase wam shin orya wam se uhar, i̱ i̱ har sha kwagh u wan u yesen ga?