Ishimaverenkeghen Ngi sha ci u Mba Ve Kpe Laa?
Hen Kwagh Ken Mkaanem Ma Aôndo
Ishimaverenkeghen Ngi sha ci u Mba Ve Kpe Laa?
Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.
1. Ka ishimaverenkeghen i nyi i̱ lu sha ci u mbakpeneve?
Shighe u Yesu nyôr ken gar u Betani ikyua a Yerusalem la, huror na Lasaru vande kpen kera kuma ayange anyiin je. Yesu za hen uwar la vea Marta man Maria, anmgbianev mba kasev mba orkpen la. Ica i gbe ga yô, ikpelaior va kohol her. Nenge er yange a saan Marta man Maria iyol shighe u Yesu nder Lasaru shin ku la sha wono!—Ôr Yohane 11:20-24, 38-44.
Marta na jighjigh ér a va nder mbakpenev shin ku. Ior mba civir Yehova cii yange ve fa ér ken hemen yô, Aôndo una va nder mbakpenev vea hide a lu uma sha tar, man ve fa kwagh ne ica gba.—Ôr Yobu 14:14, 15.
2. Mlu u mbakpenev ngu nena?
Orumace ngu a jijingi u ka a due ken a nan a za lu ape gen shighe u nan kpe ga. (Esekiel 18:4) I gba se ken mlu u yolough u i er un sha vuulevu yô. (Genese 2:7; 3:19) Shighe u se kpe yô, mhirinim asem kpa ka ma kpe, nahan mbamhen asev cii ve saa ishe. Sha nahan yô, shighe u i nder Lasaru shin ku la kpa ôr ma kwagh u yange un kpe ve er un ga, sha ci u mbakpenev fa ma kwagh ga.—Ôr Pasalmi 146:4; Orpasenkwagh 9:5, 10.
Kwagh ne tese wang ér mbakpenev mba ye ican ga. Nahan ityesen i i kaa ér zum u or ka nana kpe yô Aôndo a tsaha nan ken igyamusu la, ka i aiegh. Ngi vihin a vihi Aôndo iti. Ieren i nanden or ken usu la vihi Aôndo ishima kpishi je.—Ôr Yeremia 7:31.
3. Se fatyô u lamen a mbakpenevee?
Mbakpenev mba lamen ga. (Pasalmi 115:17) Kpa alaghga shighe u mbatyomov mba hemban ato ve lu lamen a or yô, vea tsugh nan ér ve mba jijingi u ma orkpen. (2 Peteru 2:4) Yehova yange ieren i or keren ér nana lam a mbakpenev la.—Ôr Duteronomi 18:10, 11.
4. Ka unô a va nder ve shin ku?
Ken tar u he u u lu van la, a nder ior umiliôn imôngo mba ve lu shin iwar la vea hide a lu uma. Zan zan kua mbagen ken mba yange ve lu eren akaabo ken mlan sha ci u ve fa ishima i Yehova ga la kpa a va nder ve.—Ôr Luka 23:43; Aerenakaa 24:15.
Mba a nder ve mbara vea zua a ian i henen mimi sha kwagh u Aôndo shi tesen ér ve na Yesu jighjigh sha u ungwan imo na. (Mpase 20:11-13) Mba a nder ve man vea er akaa a dedoo yô, vea ember uma gbem sha won sha tar. Nahan kpa, mbagenev ken ior mba a va nder la vea za hemen u eren akaa a bo. Nahan mnder ve la una gema a hingir “mnder u ijirôron.”—Ôr Yohane 5:28, 29.
5. Mnder u shin ku wase se u fan nyi sha kwagh u Yehova?
Ka er Aôndo a tindi Wan na a va ne uma na sha ci wase ve, i hingir u a fatyô u nderen se shin ku ye. Sha nahan yô, mnder u shin ku la ka gbenda u Yehova a tese se dooshima man mlumun u sha mhôôn na yô.—Ôr Yohane 3:16; Mbaromanu 6:23.
Wea soo u seer zuan a iwanger yô, ôr ityough 6 man ityough 7 ki takerada u Bibilo Tese Ér Nyi Jimi? ka Mbashiada mba Yehova ve gber u ye.
[Foto u sha peeji 26]
Yange i gba Adam sha vuulevu