Mlu U Or Ka A Lu Nena Ve I Kaa Ér Nan Kungu Icana?

ICAN i kungun ka bokwagh kpen kpen. Or ka nana kungu ican yô, nan ban a kwaghyan man mngerem kua ijiir i tsan man inyaregh ki sôron angev, shi gbenda u keer usu kpa u er nan ican shi nan lu a gbenda u henen makeranta ga. Ican bende a ior biliôn môm sha tar, nôngo u kuman er iyenge i ior mba ken ityar i i lu ken veghertar u Amerika la jimin cii. Nahan kpa, ior kpishi sha ajiir agen er shin Ityôtar i Yuropa kua Imbusutarimese i Amerika nahan, mba a nenge a or u kungun ican ga. Nahan yô, de se ôr kwagh u ior mbagenev mba ve kungu ican yô.

Orgen ken tar u Rwanda ken veghertar u Afrika mba yer iti na ér Mbarushimana, ngu vea kwase na man mbayev vev utaan. U sha ataratar la kpe angev mbu iyolhian. Mbarushimana kaa ér: “Terem yange mar se ataratar, nahan a kar kwar sha tsa na a na hanmô wase. Tsa wam yange ndahar kpishi, nahan m mough vea tsombor wam se yem se za lu hen geri ugen. Mo man kwase wam se mba eren tom u tôôn awen man waarawa ken aba. Iyou yase ngi a windou sha mi ga. Ka se za kese mngerem shin ijôr igen hen tashan u dasenda. Ashighe kpishi ka se ya kwagh kwa môm tseegh ken iyange, kpa tom ka ua lu ga yô, iyange la jimin cii se ya kwagh ga. Ka a hingir nahan yô, m due m undu ya; sha ci u me fatyô u ungwan er ônov ve lu vaan mo ijen ga.”

Orgen mba yer iti na ér Victor, un vea kwase na, Carmen mba ser akôv. Mba hen geri ugen ken tar u Bolivia vea mbayev vev utaan; geri la ngu ikyua a geri ugen ga. Ve kôr haya hen ruum iyou môm ken iyou i zinki igen i lun icaver icaver, i peven ahura sha uha shi lun a use u latriki ga. Yange gba u una er wan na u kwase kwaghteman sha ci u makeranta na ngee a ior gande, akaateman yina. Shi ka i gba u or ne vea kwase na vea zende a kuma ukilomita 10 ve, vea za tav ikyôn i va yôron iwer shi jiidi mngerem ma man ye. Carmen kaa ér: “Se mba a ihyungwa i akôngo ga. Nahan ka i gba u se yem shin kpe u ifi u i ee iyol shimi shi i hee ihyôghonough shimi yô. Mbayev asev ka ve shi gban angev.”

Orgen u i yer iti na ér Francisco yô vea kwase na Ilídia mba ken agar, ken tar u Mozambique. Ve mar ônov utaan, kpa u môm yange kpe angev mbu iyolhian shighe u i za a na iyouci kpa i venda u kôron un gambe eren un twer yô; mba unyiin mba uma her. Tsombor ne ka u kaha cinkafa kua atsaka hen antsa ve i kuma u vea ya iwer itiar. Francisco kaa ér: “Ashighe agen ka sea kaha kwagh kpa, icegh ki saa kwagh la ashe  shin mbaiv ve va ii, nahan m gber msongom m za tee mbamaankwagh, m zua a inyaregh. Shi ka se zende ahwa ahar se za tav ikyon ken toho. Mo vea kwase wam ka se tôô akagh ahar se va a mi, se ver i môm her sha ci u yôron a mi ken atô u kasua jimin, igen la di se tee.”

Or môm ken atô u hanma iorov utaankaruhar yô nan ngu yan ican, er Mbarushimana man Victor kua Francisco nahan, kpa ior mbagenev ubiliôn imôngo gema mba a inyaregh kpishi, kwagh ne na yô ior kpishi nenge ér kwagh nzughul ken tar ne gba ica. Mbagenev nôngo ér vea er kwagh sha kwagh ne. I pase iniôngon ve man ishimaveren ve la ken ngeren u a dondo ne.

[Foto u sha peeji 3]

Carmen man ônov nav uhar, mba kesen mngerem shin ifi