Kporom Hen Aôndo

Zum u Mbabeenyol Vea Hide a Hingir Yev La

KA AN ken a vese nan soo ican i iyolbeen i ve a mi laa, er kwavyolough u zulugh, man u kera nengen shin ungwa tsembelee ga, kua anu a kunden nahana? Alaghga u pine wer, ‘Er nan jim ve Aôndo a gbe se shi a ne se ian i ember uma shighe u se lu iyev la ve shi ka a de ér se bee iyol se hingir u tagher a mbamzeyol mba iyolbeen la keng-ne?’ Doo u se fa ser ka awashima u Aôndo sha ci wase ne ga. Kpa se doo un ishima, nahan a wa ishima u va karen a iyolbeen her a vese kera! Nenge ase mkaanem ma yange i ôr a tertamen Yobu ne, ma ken Yobu 33:24, 25.

Nenge mlu u Yobu lu sha mi ne, yange lu orjighjigh u doo Yehova ishima yô. Satan yange huna mtil sha mimi u Yobu la a mfe u Yobu shio, a kaa ér ngu civir Aôndo ka sha ci u mkpeyol na tseegh. Er Yehova na Yobu jighjigh shi fa ér Un ngu a tahav mbu been a hanma mzeyol cii yô, a na Satan ian ér a kar Yobu. Satan maa “haa Yobu avav a nyoon, hii shin akevangahar a na je, ar sha ihaghtyou na.” (Yobu 2:7) Inyam i Yobu gba azôô, kwavyolough na gba ijumbu shi hingir il, gba bughun kera. (Yobu 7:5; 30:17, 30) Nenge imba ican i Yobu yange ya la sha wono! Nahan kpa, jighjigh u Yobu tenger ga, a kaa ér: “Zan zan me kpe je kpaa, me gbihi mimi wam ga.”—Yobu 27:5.

Nahan kpa, Yobu tsume sha kwagh u vesen ugen. Zum u va nenge ér un zulum ken ku yô, a hingir u keren ishô iyol na ngeen ganden, “a na ishô iyol na sha ishigh ki Aôndo.” (Yobu 32:2) Orshua u Aôndo, Elihu, kôôm Yobu. Kpa Elihu shi ôr Yobu loho u dedoo u Aôndo tindi un yô, a kaa ér: “Yima [Yobu, a̱] de senen shin ihungwa [shi uwar] ga, M zua a ipaan ve; zum la inyam [na] ia hingir hegh á hemba i wanye kpaa; [una] hide [una] hingir er sha ayange a [a] lu iyev la yô.” (Yobu 33:24, 25) Mkaanem mara yange ma a na Yobu ishimaverenkeghen kpee je. Kera lu u una za hemen u yan ican zan zan ku na ga. Aluer Yobu gema ishima yô, a doo Aôndo u ngohol ipaan í a na sha ci na la shi karen a ican na la kera kpaa. *

Yobu hide a iyol na ijime lumun mkôôm la, shi gema ishima kpaa. (Yobu 42:6) Ikyav tese ér Yehova yange lumun ipaan la sha ci u Yobu, nahan á de ér ipaa la i̱ cir kwaghbo na la shi i̱ bugh gbenda u Aôndo una bee un angev shi una na un injar kpaa yô. Nahan Yehova “ver Yobu ken masejime doo doo, hemba mver u tsuaa la.” (Yobu 42:12-17) Nenge er yange a yôhôr Yobu iyol, shighe u Aôndo ver un doo doo sha igbenda kpishi, shi angev nav mbu ndôhôrshima mbura bee, nahan inyam na hide hingir ‘er sha ayange a a lu iyev la’ sha wono!

Ipaan i Yehova ngohol sha ci u Yobu la yange lu un a iwasen gbem sha won ga, gadia lu ken myen her shi va hingir u kpen kpaa. Se mba a ipaan i i hembe doon cii yô. Yehova tese se dooshima sha u nan Wan na Yesu, sha u a paa se yô. (Mateu 20:28; Yohane 3:16) Mba ve ne ipaan la jighjigh cii mba a ian i va lun uma ken paradiso shin tar gbem sha won. Aôndo una kar a iyolbeen her atô u uumace mba nan jighjigh kera ken tar u he u u lu van la. U nenge wer doo u ú seer henen fan kwagh u i gbe u ú er ve u va lu uma shighe u “inyam” i mbabeenyol “ia hingir hegh á hemba i wanye” la gaa?

[Ngeren u shin kpe]