Hen Kwagh Ken Mkaanem Ma Aôndo

Ú Kporom Ikyua a Aôndo Nena?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Aôndo ongo mbamsen ciili?

Yehova ngu lôhôn ior mba ken akuraior cii ér ve kporom ikyua a na ken msen. (Pasalmi 65:2) Kpa ka hanma msen cii a keghen ato a mi ga. U tesen ikyav yô, shighe u Mbaiserael nômbo ikyôr u eren akaabo la, Aôndo ungwa mbamsen vev ga. (Yesaia 1:15) Shi ongo mbamsen mba or u nan nzughul a kwase u nan kpaa ga. (1 Peteru 3:7) Nahan cii kpa, Aôndo una ungwa mbamsen mba mbaasorabo je kpaa, aluer ve gema ishima yô.—Ôr 2 Kroniku 33:9-13.

2. Se er msen nena?

Msen ka kwagh u civirigh hen a vese shi ka môm ken igbenda i se civir Aôndo yô. Sha nahan yô, gba u se eren msen hen Yehova tseegh. (Mateu 4:10; 6:9) Er se yen yô, gba u se eren msen ken iti i Yesu, sha ci u ka un a lu “gbenda” ye. (Yohane 14:6) Yehova soo ér se kôr mbamsen ken ityo se kimbir shin se nger ve shin takerada se ôron ga, kpa a soo ér se eren mbamsen ken mkaanem asev, er i lu se shin ishima la.—Ôr Mateu 6:7; Mbafilipi 4:6, 7.

Mbamsen mba se er i dugh sha ga je kpa, Orgban se ongo. (1 Samuel 1:12, 13) A soo ér se eren msen sha hanma ian cii, er pepe man tugh, kua shighe u se ye kwagh man shighe u se tagher a mbamzeyol nahan.—Ôr Pasalmi 55:22; Mateu 15:36.

3. Mbakristu mba kohol imôngo sha ci u nyi?

Ka zange u kporom ikyua a Aôndo ga sha ci u se mba hen atô u ior mba ve ne un jighjigh ga shi kwagh kpa a gbe ve cuku sha ityendezwa na i van a bem shin tar la ga yô. (2 Timoteu 3:1, 4; 2 Peteru 3:3, 13) Sha nahan yô, gba u se kohol a mbananjighjigh a vese imôngo, se taver ayol ase asema.—Ôr Mbaheberu 10:24, 25.

U fatyô u kporom ikyua a Aôndo, aluer u kôr ijende vea ior mba a doo ve ishima yô. Mbamkombo mba Mbashiada mba Yehova ka ve bugh or gbenda u zuan a mtsera sha jighjigh u nan u mbagenev.—Ôr Mbaromanu 1:11, 12.

  4. U kporom ikyua a Aôndo nena?

U fatyô u kporom ikyua a Yehova sha u gbidyen kwar sha kwagh u ú hen ken Mkaanem nam la. Hen sha ityom na man gbendatesen na man uityendezwa nav. Aluer u ngu eren msen shi gbidyen kwar yô, kwagh ne una wase u u wuese dooshima man kwaghfan u Aôndo la sha mimi.—Ôr Yosua 1:8; Pasalmi 1:1-3.

Saa u na Aôndo jighjigh ve u kporom ikyua a na ye. Kpa jighjigh u nan ngu er ma kwagh u uma u i gbe u a koson un nahan. Gba u hanma shighe yô, u koson jighjigh u nan wou la sha u hiden gbidyen kwar sha atôakyaa a a ne ve u ne jighjigh la.—Ôr 1 Mbatesalonika 5:21; Mbaheberu 11:1, 6.

5. U kporom ikyua a Aôndo la una wase u nena?

Yehova we mba a doo ve ishima la ikyo. Ngu a kura ve sha nyityôkwagh i ia fatyô u vihin jighjigh ve u nan man ishimaverenkeghen ve i va lun uma gbem sha won la kpaa. (Pasalmi 91:1, 2, 7-10) Ngu a ta se icin sha akaa a aa fatyô u vihin mkpeyol man msaanyol wase u se lu ker la. Yehova tesen se gbenda u uma u hemban doon cii.—Ôr Pasalmi 73:27, 28; Yakobu 4:4, 8.

Wea soo u seer zuan a iwanger yô, ôr ityough 17 ki takerada u Bibilo Tese Ér Nyi Jimi? ka Mbashiada mba Yehova ve gber u ye.