Ityôkyaa i Yange Ior Soo Kwagh u Dorka Yô
Tese Ônov ou
Ityôkyaa i Yange Ior Soo Kwagh u Dorka Yô
SE CII ka se soo ser ior ve soo kwagh wase. We kpa, u soo wer ior ve soo wee?— * Bibilo ôr se kwagh u Dorka, kwase ugen u yange ior soo un kpishi yô.
Dorka lu ken Yopa, gar ugen u lu hen kpezegemnger u Mediterenia yô. Mough ken Yopa kar yem ken Yerusalem kuma ukilomita 56 nahan tseegh. Dorka ne lu môm ken mbadondon mba Yesu mba sha ayange a tsuaa la.
U hen wer, lu nyi i na ve ior soo kwagh u Dorka kpishi nahana?— Bibilo kaa ér yange er akaa a dedoo kpishi shi naan ior uiyua mba dedoo kpaa. A̱ shi nan kpa, yange er akondo a dedoo sha ci u kasev mba côgholov, kasev mba noov vev kera lu uma ga la. Shi yange lam a ior kpishi sha kwagh u Yehova, Aôndo u mimi, vough er Yesu kpa er nahan.
U fa kwagh u vihin u yange er Dorka kpa?— Yange gba angev tsung, maa a kpe. Azende na cii ure kpishi. Nahan ve tindi ior hen ape apostoli Peteru lu la, ijiir la gba ica kuma ukilomita 16 nahan. Ior mbara za kaa un ér a va fefa. Peteru za ar yô, a unde a za sha iyou i sha, ape Dorka lu la. Kasev mbara cii lu vaan, shi ve lu tesen un akondo a Dorka er ve la.
Peteru maa kaa á ior cii ér ve due ken won. Peteru kua mbaapostoli mbagenev vande eren uivande, kpa mô ve môm lu a vande nderen or shin ku ga. Kanyi u hen wer Peteru una er hegene?—
Peteru gure ikyua henpe ikyom i Dorka lu la, maa a er msen hen Yehova. Nahan a kaa a Dorka ér a mough sha. Tsô Dorka mough sha! Peteru kôr un sha uwe, mough a na sha. Tsô a yila kasev mba côgholov kua shi ior mbagenev mbara cii, a kende un a na ve. U nenge a ve ken ishima you er ve cii i saan ve iyol kpishi kpa?—
De ase se nenge kwagh u ú fatyô u henen ken mnder u yange i nder Dorka shin ku la yô. Kwagh môm u kwagh ne a tese yô, aluer u ngu wasen ior yô, ior mba u wasen ve la kpishi vea soo u. Kpa kwagh u hemban cii yô, Aôndo una soo u shi kwagh wou una hungur un mayange ga. Mayange je una hungur a akaa a dedoo a u eren a ior la ga. Shi una va na u injar i uma u tsôron, nahan u lu ken msaanyol ken tar na u he u perapera la.
ÔR KEN BIBILO YOU
[Ngeren u shin kpe]
^ Aluer u ngu ôron ngeren ne vea wanye u kiriki yô, anhwange u i kper heen tiônôô ne ka u umbur we ér gba u ú mem, shi u taver nan ishima nana̱ pase u mnenge u nan.
Kwagh Ugen u Alaghga Shi Una Doo U Yô
IYOUKURA
Doo u Se Umbur Yesu Kristu Nena?
Ka shighe u Yesu lu ankyundan la tseegh i doo u se umbur un yee? Ka unô ve lu “mbafankwagh” mba yange ve va u nengen a na laa? Yesu ngu eren nyi hegene?
IYOUKURA
Ishima Ia Fatyô u Vihin Aôndo—Kwagh u Se Er Ve a Saan Un Iyol Yô
U vande fan wer ieren iyou ia na a saan Aôndo iyol shin ishima ia vihi unuu? Fa er Adam man Ifa yange ve na Yehova ishimavihin yô.
IYOUKURA
Peteru man Anania Er Aie—Se Hen Nyi sha Kwagh Laa?
Tôv fa er i hii ve iorov uhar yange ve er aie, kpa i de u môm kwaghbo na, ugen la i de un ga yô.
IYOUKURA
