Kporom Hen Aôndo

Ngu a Umbur “Er Se Lu Vuulevu” Yô

KWASEKRISTU ugen yange nger kwagh sha kwagh u asorabo a ngise er yô kaa ér: “Yange m na jighjigh mer Yehova una dem asorabo am cii ga, shi m hen mer ishima ia nam ibo gbem ku wam.” Sha kpôô yô, aluer imoshima ngi nan or ibo yô, nana tôô ikyav mbi yuhwan kpen kpen. Nahan cii kpa, Bibilo ôr kwagh u una fatyô u surun mbaasorabo mba ve gem ishima la asema, nahan heghem ve ikyav mbi ve tee ken ishima la yô. Time ase sha mkaanem ma orpasalmi Davidi a nger ken Pasalmi 103:8-14 la.

Davidi yange fa er ‘Yehova a zungu mhôônom’ shi a “zehe gbem ga” yô. (Ivur 8-10) Aôndo ka una zua a ityôkyaa i zungwen mhôônom yô, a zungwe wuee, man vindi vindi. Davidi u fa atsam a dughun tsembelee la, yange tôô mhôônom ma Aôndo a zungu kpishi la kar sha igbenda itiar.

‘Er Sha a gbe ca a kar tar sha nahan, kape erdoo Na kpaa a kehe a mba ve cie Un la.’ (Ivur 11) Ka sea kenger sha kwavaôndo tugh yô, se fatyô u fan er u gbe ica a tar kpishi la ga. Nahan Davidi wase se u fan er mhôônom ma zungwen ma Yehova ma ngee kpishi yô. Mhôônom man ka vegher ugen u dooshima u mimi u Yehova la. Orfantakerada ugen kaa ér, “ka mba ve cian” Aôndo, ve “hiden a iyol ijime ve, shi i doo ve u tesen icivir sha hemen na” la, Aôndo a zungu ve mhôônom ye.

‘Er ica i ityoughkitaregh a ityôtar nahan, kape ngu A pav akaabo ase a vese la.’ (Ivur 12) Ityoughkitaregh gba ica a ityôtar kuma nena? Er se hen ser gba ica kpishi za kighir la cii. Takerada ugen u pasen kwagh u Bibilo kaa ér: “Tôô ase wer u wa akper u ngu purugh er u fatyô la cii, yemen sha ityoughkitaregh, nahan hanma kwa u u gbidye akper yô, ka u seer gban ica a ityôtar.” Davidi ngu kaan a vese heen ér, Aôndo ka una de se asorabo a ase yô, a ver á ica a vese er se fetyô u henen la cii.

‘Er mhôônom ka ma kôr ter a ônov nahan, kape Yehova kpaa mhôônom ma ker Un a mba ve cie Un la.’ (Ivur 13) Davidi, u un iyol na kpa lu ter la, yange fa er ka i lu ma ter u lun a dooshima ken shima a ônov mba nan yô. Mhôônom ka ma kôr imba ter la a ônov mba nan, hemban cii je yô, shighe u ve lu ken mnyoon yô. Davidi na se ibumun ér ter wase u sha u a lu a dooshima la zungu ônov nav mba shin tar mhôônom, hemban cii je yô, shighe u ve gem asema, ve ‘zamber shi ve ure tsung’ sha ci u asorabo a ve la.—Pasalmi 51:17.

Davidi yange karen mhôônom ma Yehova sha igbenda itiar been yô, a tese kwagh u ngu a mgbegha Un u zungwen uumace mba ve yen la mhôônom yô. A kaa ér: ‘Un yô, A fa mlu wase, A umbur er se lu vuulevu je yô.’ (Ivur 14) Yehova fa er i er se sha vuulevu, nahan se yen shi se taver ga yô. Er Yehova a fe mlu wase u isholibo la yô, a “kegh iyol u den [se] kwaghbo,” aluer se gema ishima sha mimi yô.—Pasalmi 86:5.

Mkaanem ma Davidi a er sha kwagh u mhôônom ma zungwen ma Yehova la bende a we je he? Kwase u se er kwagh na sha mhii u ngeren ne la, yange time sha kwagh u Bibilo i er sha mkegh u Yehova a keghen iyol u den kwaghbo la, nahan kwagh la mgbegha un u kaan ér: “M hii u nengen mer mimi je me fatyô u kporom ikyua a Yehova, shi m nenge mer i shirim ikyav mbi mbi lu imoshima i nan or ibo la kera.” * Er nan u seer henen kwagh u mhôônom ma Aôndo man kwagh u ú er ve una zungwe u mhôônom ga? Aluer u er nahan yô, alaghga we kpa a lu u er mba shirin we ikyav mbin iyol kera nahan.

[Ngeren u shin kpe]

[Mkaanem ma sha peeji 23]

“M hii u nengen mer mimi je me fatyô u kporom ikyua a Yehova, shi m nenge mer i shirim ikyav mbi mbi lu imoshima i nan or ibo la kera”