Kporom Hen Aôndo

“Tere, . . . U Fam”

“OR KA nana fa ér or môm wa nan ikyo ga shin i kav mlu u nan ga yô, ka i vihi nan i hemba hanma kwagh cii.” * Mlu wou zua sha mkaanem ma i er sha heen nee? I lu nahan u nenge wer or môm wa u ikyo ga shin i kav zayol wou ga vee? Aluer ka nahan yô, u fatyô u zuan a ishimasurun ken mkaanem man, ér: Yehova we mba civir un ikyo tsung, je yô, ngu a fa hanma kwagh u a eren ve ken ityom ve i ayange ayange la cii. Mkaanem ma Davidi ma i nger ken Pasalmi 139 la pase mimi u kwagh ne wang.

Er Davidi fa dedoo ér Aôndo wa un ikyo yô, a kaa ér: “TERE, U tôvom, U fam.” (Ivur 1) Heen ne, Davidi ter ishember i doon kpishi, i i tese ikyav i kwagh ne wang yô. Ishember i ken zwa Heberu i i gem ér ‘tôv’ la ngi ôron kwagh u timen keren awen (Yobu 28:3), shin nengen ma tar dedoo (Mbaajiriv 18:2), shin timen sha atôakaa a ijirigh vighe vighe (Duteronomi 13:14). Sha kpôô yô, Yehova fa mlu wase vindi vindi inja er a time sha hanma vegher man hanma hua u uma wase nahan. Davidi wase se u fan ér Aôndo we mbacivir un ikyo. Ngu a tôv ve, nahan a fa kwagh ve asange asange.

Davidi seer pasen er Aôndo a tev kwagh vindi vindi yô. A kaa ér: “Mtem wam man mmough wam kpaa We U fa, U fa mhen wam ken ica je.” (Ivur 2) Sha vegher ugen yô, a fatyô u kaan ér Yehova ngu “ica,” a tema sha usha. Nahan cii kpa, ngu a fa shighe u alaghga se kur tom sha iyange been, se va tem inya, shin se nder pepe, se yem eren ityom yase i ayange ayange la. Shi a fa mbamhen asev man asaren a ase kua mbaawashima asev kpaa. Ishima yange nyian Davidi sha imba mtev u Aôndo tôv kwagh na kembe kembe laa? Ei, yange gema saan un a saan iyol er i tôv un vindi vindi nahan yô. (Ivur 23, 24) Hii nan ve lu nahana?

Davidi yange fa ér Yehova tôvon mba civir Un a awashima u dedoo. Davidi ôr kwagh ter awashima ne, nahan a nger ér: “U tôv zende wam man myav wam, U fa igbenda yam cii.” (Ivur 3) Hanma iyange yô, Yehova nengen a ‘igbenda yase cii;’ akaa a se eren sha lan la, kua ityom yase i dedoo la kpaa. Hembe veren ishima sha kwagh u bo shin u dedoo? Ishember i ken zwa Heberu i̱ i gem ér “tôv” la, shi a fatyô u geman i ér “u tsaan kwagh” shin “u peer kwagh,” er orsule ka nan peer samuyia nan haa apusu kera sha er nana zua a sam u dedoo nahan. Ishember i ken zwa Heberu i̱ i gem ér “fa” la, shi a fatyô u geman i ér “u umbur kwagh.” Yehova ka una time sha akaa a mba civir un ve ôron shi ve eren hanma iyange la yô, a koso kwagh u dedoo u ve er la ken ishima. Sha ci u nyi? Sha ci u ngu a soo u umbur iniôngon i ve nôngon ér vea er ishima na la.

Pasalmi 139 tese se ér Yehova we mbacivir un ikyo. Tôvon ve shi kuran ve ken ityom i ve eren ayange ayange la. Sha nahan yô, a fa mbamzeyol mba ve tagher a mi la, shi a kav mnyoon u ken ishima u alaghga mbamtaver mban vea va ve a mi la kpaa. Ishima mgbegha u civir imba Aôndo u a we mba civir un ikyo ne kpa? Aluer ishima mgbegha u eren nahan yô, lu a vangertiôr wer, mayange ‘tom wou ua hungur Yehova ga, shin dooshima u u tese sha ci u iti Na la kpaa ga.’—Mbaheberu 6:10.

[Ngeren u shin kpe]