Hen Kwagh Ken Mkaanem Ma Aôndo

U Er Nan Ve U Fa Kwaghaôndo u Mimi?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Kwaghaôndo u mimi ngu môm tseeghele?

Yesu yange tese mbadondon un ér kwaghaôndo u mimi ngu môm tseegh. Ngu er gbenda u zan ken uma nahan. Yesu ôr kwagh u gbenda la kaa ér: “Mbazuan a mi mba kpeghee tsô.” (Mateu 7:14) Aôndo lumun a mcivir u a har sha Mkaanem nam ma mimi mara tseegh. Mba ve civir Aôndo sha mimi mbara cii mba a jighjigh u nan môm.—Ôr Yohane 4:23, 24; 14:6; Mbaefese 4:4, 5.

2. Ukwaghaôndo kpishi senge ér ve mba Mbakristu sha ci u nyi?

Uprofeti mbaaiev vihi Kwaghaôndo u Mbakristu shi ve tôô un hingir gbenda u keren mbamtsera vev a mi. Er Yesu tsengapasen nahan, sha ashe yô mba er ka “iyôngo” nahan, kpa aeren a ve gema nga er ugbaseela mba ijen i ker ve nahan. (Mateu 7:13-15, 21, 23) Kwaghaôndo u Mbakristu u aiegh ne yange hii shighe u mbaapostoli mba Yesu kpe bee la.—Ôr Aerenakaa 20:29, 30.

3. Ka akaa agen a nyi nahan nga a na mcivir u mimi a due kposoo?

Mbacivir Aôndo sha mimi ka ve lumun ér Bibilo ka Mkaanem ma Aôndo. Ka ve nôngo ér vea dondo akaawan a Bibilo. Sha nahan yô, kwaghaôndo u mimi kaha a kwaghaôndo u a har sha mbamhen mba iorov la. (Mateu 15:7-9) Mba civir Aôndo sha mimi mba pasen kwagh môm, mba yem mba za eren ugen kposo ga.—Ôr Yohane 17:17; 2 Timoteu 3:16, 17.

Mbaeren kwaghaôndo u mimi mba civir iti i Aôndo, i i yer ér Yehova la. Yesu yange pase hanma or iti i Aôndo. Yange wase ior sha u ve fa Aôndo shi tese ve u eren msen ér i tsegha iti Aôndo. (Mateu 6:9) Ka kwaghaôndo u nyi a yer sha iti i Aôndo ape a lu laa?—Ôr Yohane 17:26; Mbaromanu 10:13, 14.

  4. U fa mba ve civir Aôndo sha mimi la nena?

Mbakristu mba mimi mba pasen ior kwagh u Tartor u Aôndo. Aôndo yange tindi Yesu ér a va pase kwagh u Tartor. Ka Tartor u Aôndo tseegh u lu ishimaverenkeghen i uumace ye. Yesu yange za hemen u pasen kwagh u ú zan zan iyange i kar kpen la. (Luka 4:43; 8:1; 23:42, 43) Yange kaa a mbadondon un ér ve̱ pase kwagh u Tartor u Aôndo. Aluer or va u pasen we kwagh u Tartor u Aôndo nahan, ka kwaghaôndo u nyi u hen tsô wer nan due kere?—Ôr Mateu 10:7; 24:14.

Mbadondon mba Yesu mba ior i botar ne ga. Mba eren pati shin mba nenge inyum kpaa ga. (Yohane 17:16) Heela tseegh ga, mba dondon aeren man anza a bo a tar ne ga.—Ôr Yakobu 1:27; 4:4.

5. Ka ikyav i vesen i nyi i fe Mbakristu mba mimi sha mini?

Mbakristu mba mimi doo ayol a ve tsung. Ve hen ken Mkaanem ma Aôndo u nan ior cii icivir. Shin er ashighe kpishi kwaghaôndo u aiegh ngu a sue ityav mbi ityar mbi nenge la tsung nahan kpa, mba civir Aôndo sha mimi yô, mba eren nahan ga. (Mika 4:1-4) Kpa mba ve eren kwaghaôndo u mimi la ka ve gema ve vihi shighe man akaa ve sha u wasen mbagenev shi taver ve asema, a iyol tangen shio.—Ôr Yohane 13:34, 35; 1 Yohane 4:20, 21.

Ka kwaghaôndo u nyi a har atesen a na cii sha Mkaanem ma Aôndo, shi a civir iti i Aôndo shi a pasen ér ka Tartor u Aôndo tseegh u lu ishimaverenkeghen i uumacee? Ka kwaghaôndo u nyi a lu a dooshima shi a suen ityav ga? Ikyav tese wang ér ka Mbashiada mba Yehova.—1 Yohane 3:10-12.

Wea soo u seer zuan a iwanger yô, ôr ityough 15 ki takerada u Bibilo Tese Ér Nyi Jimi? ka Mbashiada mba Yehova ve gber u ye.

[Ngeren u pasen foto u sha peeji 16]

“Ka ve pase er ve fa Aôndo kpa mba gem mba nyiman Un sha aeren a ve.”—Titu 1:16