Akaa A Van A Msaanyol Hen Tsombor

U Eren Kwagh a Ikyar u sha Icivir

Will * kaa ér: “Ishima ka ia vihi Rachel yô, a vaa shighe gôgônan. Ka sea tema ser se lam yô, a ngôôr vihin ishima a mo ga shin a ungwan mo ato je kpaa. Mea er nan kpa i gba sha mi ga. Ka i lum er maa m de kwagh na nahan.”

Rachel kaa ér: “Shighe u Will hide hen ya iyange igen yô, m lu vaan. M nôngo mer me pase un er hii ve ishima vihim ker la, kpa a nyôrom sha zwa. A kaa a mo ér zayol wam la ka ityôkyaa je ga, nahan m gba den i tsô. Kwagh la na ishima hemba vihin mo ker cii.”

ASHIGHE agen ka i lu u ken ishima er Will shin Rachel nahanaa? Ve cii ka ve soo u lamen ayol a ve, kpa ashighe kpishi ishimanyoon ka i due ken iliam ve la. Er nan ve kwagh ngu a lu nahana?

Gbenda u nomso man kasev ve lamen la kaha, shi mbamgbe vev kpa mba kwaghmôm ga. Alaghga kwase nana soo ér nana pasen er i lu nan ken ishima la gbar gbar shi nana eren nahan hanma shighe. Kpa nomso kpishi ka ve nôngo ve ker bem sha u sôron mbamzeyol fele, nahan ve palegh mbamzeyol mba vesen. Nahan yô, u er nan ve u hemba mbamkposo mban, u lamen a nomou shin kwase wouwe? U fatyô u eren kwagh ne sha u eren kwagh a ikyar u sha icivir.

Or u nan eren a mbagenev sha icivir yô, ka nan nengen ve ér ve gba kwagh shi nan keren ér nana fa er i lu ve ken ishima yô. Alaghga iyev je u hen u nan ior mba ve hembe u tahav shin mfe la icivir. Nahan kpa, mtaver u a gem a lu ken ivese yô, ka mtese u tesen icivir sha ikyar u u mlu wou vea nan a nôngo u lun kwaghmôm la. Linda, kwase ugen, u a zough ivese vea nom na i kom anyom anigheni hegen yô, kaa ér: “Yange m fa er nomom Phil keghen ato a hanma or cii a ishima i wan shi tesen ér un kav er i lu nan ken ishima yô. Mo kpa yange m soo mer a eren kwagh a mo kundu kundu nahan vough.” Alaghga tsô ka u wa ishima u ungwa kwagh u azende a ou man mbavannya je kpa, ve lu ôron we la shi u lam a ve sha icivir kpaa. Nahan cii kpa, u eren a ikyar u sha icivir nahan vough je he?

Icivir ka ia lu ga yô, kwagh ne a va a hang hen ya shi ayôôso a lu kpoghuloo. Tor u fan kwagh ugen yange kaa ér: “Guda ikyevruam i yan kagh a bem, a ya u a mgbough a iniongo i yan kpa num u lu ker la.” (Anzaakaa 17:1) Bibilo kaa a nom ér a eren kwagh a kwase na sha icivir. (1 Peteru  3:7) “Kwase” kpa, “a̱ cia nom u nan.”—Mbaefese 5:33.

U er nan ve u lamen a ikyar u sha iciviri? Time ase sha akaawan a injaa agen a a lu ken Bibilo ne.

Shighe u Ikyar U A Lu a Ma Kwagh u Ôron We Yô

Mtaver: Ior kpishi ka ve hemba soon u lamen, a u keghen ato a orgen. We kpa ka imbaor i u lu laa? Bibilo pase ér hanma or u nan “kaa imo je er nan lu a ungwa ga yô,” nan ngu ibumeor. (Anzaakaa 18:13) Nahan yô, cii man u lam yô, vande keghen ato. Sha ci u nyi? Kara, kwase ugen, u a zough ivese vea nom na i kom anyom 26 yô, kaa ér: “Nomom ka una nôngo ér una kure zayol wam ave ave ga yô, i hemba doon mo. Ka i gbam u a lumun a kwagh u m lu ôron shin a ker u fan er i hii ve zayol la a dugh keng ga. Ka m soo tsô mer a keghen ato a mo shi a tesen sha mimi ér un kav er i lum ken ishima yô.”

Hide sha vegher ugen yô, ka i taver noov kua kasev mbagenev u pasen ishima ve, shi ikyar ve ka nana kighir ve ér ve pase er ishima i lu ve ker la yô, i doo ve ga. Lorrie, kwase ugen u a sember zuan ivese vea nom na yô, kav er ka i tôô nom na shighe gôgônan cii ve a mase pasen un ishima na yô. A kaa wener: “Ka i gba u me wa ishima shi me kegh mer a pase kwagh u a lu un ken ishima la.”

Gbenda u sôron zayol ne: Aluer gba u we man ikyar u ne lam sha ma kwagh u ayôôso aa fatyô u duen ker yô, due a kwagh shon shighe u ne cii ishima i gbe ne shimi yô. Aluer ikyar u gema soo u lamen sha kwagh ne ga di ye? Fa wer “mhen u ken ishima i or ngu er mngerem ma zan yô; kpa or u nan lu a mkav yô, nan kese ma.” (Anzaakaa 20:5) Aluer u due a bokoti u mnger shin ijôr gyaver gyaver yô, mngerem ma a lu shimi kpishi ga. Kape ikyar u kpa aluer u kighir nan a kwaghôron yum ve, adooga nana hingir u keren a ker ishô, nahan ian i fan ishima i nan la ia kar u je la. U ma u er nahan la yô, gema pine nan mbampin kundu kundu man sha icivir, shi aluer nan pase u ishima i nan fele er u soo la ga kpa, wa ishima.

Shighe u ikyar u a lamen a we yô, ‘lu tsev tsev sha u ungwan kwagh kpa geman ngôôr a kwaghôron, ngôôr a iyugh kpaa.’ (Yakobu 1:19) Or u keghen ato a mbagenev tsembelee ka nan ungwa kwagh u i lu ôron la tseegh tsô ga, ka nan nôngo ér nana kav kwagh u a ne ve i lu ôron kwagh shon la kpaa. Shighe u ikyar u a lu lamen yô, nôngo u kaven er i lu nan ken ishima la. Gbenda u u keghen ato la, ua wase ikyar u u fan wea naan nan icivir shin wea naan ga kpaa.

Yesu yange tese se er se keghen ato yô. Ikyav i tesen yô, shighe u oruange ugen va hen a na ér a wase un la, Yesu kure zayol na la her ave ave ga. Yange hii keghen ato a zamber u or la. Maa a de ér kwagh u un ungwa la, a mgbegha un tsung u eren kwagh. Ken masejime yô, a bee or la angev. (Marku 1:40-42) We kpa dondo ikyav ne shighe u ikyar u a lamen yô. Umbur wer, alaghga ga tsô ikyar u ngu keren ka u we u kure zayol na fese ga, kpa a soo ér u tese sha mimi wer mhôônom kôr u a na. Nahan keghen ato zulee. Nôngo zayol u ikyar u la a bende a we. Vande eren kwagh ne cii ve, u mase nengen sha mbamgbe nav ye. Aluer u er nahan yô, u tese wer ikyar u gba u kwagh.

KAR KWAGH NE: Kwagen ikyar u una lamen a we yô, kighir isharen i bughun zwa fese ôron kwagh la. Wa ishima zan zan ikyar u a lam a bee, nahan kav kwagh u a lu ôron la cii ve u mase bughun zwa ye. Shighe a karen yô, pine un wer, “Ashen u lu lamen a mo nahan, i lu u er m ngu keghen ato a we sha mimi je he?”

Shighe u U Lu a Ma Kwagh u Ôron Ikyar U Yô

Mtaver: Linda, kwase u se vande teren kwagh na la, kaa ér: “Anumbe a hômon tar a i tesen sha televishen la ka a na i lu inja er u̱ lamen a ikyar u dang shi tuhwan un shi ôron kwagh u nyoon un iyol la, ka kwagh u bo ga nahan.” Mbagenev vese hen uyaav mba iliam i sha icivir ga i dumbur yô. Ka vea va eren nom shin kwase yô, i taver ve u palegh ieren ne hen tsombor ve. Kwase ugen ken tar u Kanada, iti na ér Ivy, a kaa ér: “Yange m vese hen ijiir i ior mba lamen jang jang man mba yilan mbagenev ati a iyongo kua mba ôron kwagh a ior ér i nyoon ve iyol ta ijar yô.”

Gbenda u sôron zayol ne: Shighe u u ôron mbagenev kwagh u ikyar u yô, ôr ve kwagh u “doon u una fatyô u maan a maa kwagh ape kwagh a gbe sha mi yô, nahan mba vea ungwa kpaa vea zua a mlumun u sha mhôôn.” (Mbaefese 4:29) Ôr  kwagh u ikyar u sha gbenda u ua mgbegha mbagenev vea na un icivir yô.

Shighe u u lu tswen vea ikyar u je kpa, palegh u yilan un ati a iyongo shi ôron kwagh u una nyoon un iyol la. Sha ayange a Iserael u tsuaa la, Mikal vihi ishima a nom na, Tor Davidi. Yange lam a Davidi sha gbenda u nyoon iyol shi a kaa ér ngu eren kwagh “vough er gbilinor u lun a kunya ga” nahan. Mkaanem nam mara yange doo Davidi ga, kpa shi Yehova kpa ma doo un ga. (2 Samuel 6:20-23) Se hen nyi sha kwagh nee? Shighe u u lamen a ikyar u yô, tsuaa mkaanem ou sha inja. (Mbakolose 4:6) Phil, u a zough ivese i kom anigheni la, lumun ér un vea kwase na mba gbe anyiman sha akaa her. A kav ér ashighe agen kwagh u un ôr la ngu a na kwagh a hemba vihin cii. Nahan a kaa ér: “M mase kaven mer jighilii yô, u keren mer me ‘hemba’ anyiman la ngu a vihi a vihi hanma kwagh cii. M kav mer aluer ikyaryan yase seer taver yô, se hemba zuan a mtsera man mkom.”

Sha ayange a tsuaa la, kwase ugen u nom na kpe undu un yô, wa kasev mba ônov nav kwagh kaa ér ve zua a “mmem, hanmô [ve] hen ya u nom u nan.” (Rutu 1:9) Shighe u nom man kwase ve ne ayol a ve icivir yô, vea na ya ve una hingir ijiir i “mmem.”

KAR KWAGH NE: Ker shighe vea ikyar u, tema lam nen sha mbamhen mba i dugh a mi ken gbaa u itinekwagh ne la. Pine ikyar u wer: “Ka mea ôron mbagenev kwagh wou nahan, ka i lu u er m ngu nan we icivir shin m ngu heen we a hee? Kanyi akaa nahan u hen wer me er ve me hemba eren kwagh a we sha iciviri?” Shighe u nomou shin kwase wou a lu pasen er i lu un ken ishima yô, kegh ato a na sha mimi. Nôngo u dondon mbamhen mba i dugh a mi la.

Fa Er Mbamlu Mba Ikyar U Ve Lu Kposo a Mba Ou Yô

Mtaver: Mba ve sember vôson ayol a ve mbagenev ka ve lu a mnenge u kpeegh sha kwagh u Bibilo i yer ér “iyôgh i môm” la. Ve nenge ér ishember ne tese ér, gba u mba ve vese ayol a ve la vea henen kwagh shin vea eren kwagh gbenda môm. (Mateu 19:5) Nahan kpa, ica ka i gba ga tsô ve kav er imba mhen la a lu u mimi ga yô. Ka vea hingir nom man kwase yô, ashighe kpishi mbamkposo vev mbara ve na anyiman a gbaan hen atô ve. Linda kaa wener: “Mkposo u vesen u a lu hen atô wam man Phil yô, kwagh ze un iyol kpishi er mo nahan ga. Ashighe agen ngu a lu kwagh na kera beelee shighe u kwagh a zem iyol yô, nahan m hingir u vihin ishima sha ci u i lum er a wa ikyo sha kwagh shon er mo ga nahan.”

Gbenda u sôron zayol ne: Lumun nen mbamlu enev, shi tese icivir sha gbenda u ikyar u a eren kwagh kposo a we la. U tesen ikyav yô: Ashe a ou nga eren tom kposo a ato a ou; nahan cii kpa, ka ve er tom ken mzough sha er u fatyô u peren gbenda tsembelee yô. Adrienne, u a er ivese i nôngo u kuman anyom 30 hegen la, kaa ér: “Er mbamnenge asev ve per tindi u ken Mkaanem ma Aôndo ga je, mo man nomom ka se lumun a mnenge u hanma wase nan lu a mi kposo sha kwagh la. Kera kpa, se vôso a vôso ayol, se due iyav môm ga.”

Shighe u ieren shin mnenge u ikyar u a kaha a u wou yô, de veren ishima sha mbamgbe ou tseegh ga, ver ishima sha mba nav mbara kpaa. (Mbafilipi 2:4) Kyle, nom u Adrienne, lumun a kwagh ne, ér: “Ka hanma shighe cii m kaven shin m lumun a mbamnenge mba kwase wam a lu a mi sha akaa la ga. Kpa ka m umbur mer kwase wam hemba doon mo ishima a mnenge wam la. Ka a saan un iyol yô, mimi je, mo kpa i saan mo iyol.”

KAR KWAGH NE: Nger gbenda u ikyar u a hembe eren kwagh doon a we shin igbenda i mnenge na a hembe doon a u wou la shin inya.—Mbafilipi 2:3.

Icivir ka môm ken akaa a vesen a van a msaanyol ken ivese shi nan i tsan gbem. Linda, kwase u se vande ôron kwagh na la, kaa ér: “Icivir ngi ve a mkor man mkom ken ivese. Sha kpôô yô, doo u icivir ia lu ken ivese.”

[Ngeren u shin kpe]

PINE IYOL YOU WER . . .

▪ Mbamkposo mba ve lu hen atô wam vea ikyarem la na tsombor wase hemba doon nena?

▪ Shighe u mnenge u ikyarem a per tindi u Bibilo ga yô, doo u me hanger sha mnenge wam ga sha ci u nyi?