Aôndo Ngu Tsahan See?

Shighe u tar tenger taveraa ken tar u Japan, mngerem ma shin tyeku sar avenge, ken uwer u Maaci 2011 la, orpatii u tagher tagher ugen kaa ér: “Shin er kunya u kerem a ior mba aahe ne a tser ve la nahan kpa, m hen mer ka Aôndo a tsaha ve ye.”

Shighe u tar-tenger wua ior hemba 220,000 ken tar u Haiti, ken uwer u Janawari 2010 la, or u pasen adua sha televishen ugen u a ze iti yô senge ér ka sha ci u ior “ya zwa a diabolo,” nahan gba u vea “hide hen aôndo.”

Pristi u Mbakatoliko ugen yange ôr kwagh shighe u num-kpugh wua iorov 79 ken Manila, gartamen u tar u Philippines la, ér: “Aôndo soo u nderen imoshima yase i í hingir kpenegh shi i we kwagh ikyo ga la.” Ipipaabaver igen ken tar la kaa ér “ior mba kaven ishigh ikyundu kar môm ken atô u hanma iorov deri yô, na jighjigh ér Aôndo ngu pasen iyugh na sha u yôhôr iwo wuan ior man sha ijeverahumbe kua uaahe mbagenev” mba ve lu eren ken tar la puusu puusu la.

JIGHJIGH u ior ve ne ér Aôndo tsahan mbaaferev sha uaahe la ka kwagh u nyian a mi ga. Ken inyom i 1755, zum u tar-tenger man mngerem ma saren avenge kua usu wua ior je kuma er 60,000 nahan ken Lisbon, gartamen u tar u Portugal yô, orfankwagh tsura ugen u i fe un wuee yô, iti na ér Voltaire, pine ér: “Ifer hemba ngeen hen gar u Lisbon a gar u Paris, ape ijimba i hembe cii la shinii?” Sha kpôô yô, ior umiliôn imôngo hen ér ka Aôndo a tsahan ior sha uaahe ye. Jighilii yô, ken ityar kpishi mba yer uaahe mban ér ityom i Aôndo.

Sha ci u nahan yô, gba u se pine ser: Aôndo tsahan ior sha uaahe mimi? Uaahe mba ve lu eren ciligh ciligh ayange ne la, tese ér Aôndo ngu tsahan ioro?

Er i torough ior mbagenev iyol u nan Aôndo ibo yô, ka ve tese ajiir ken Bibilo a Aôndo yange tim ior sha akaa a sha gbaaôndo yô. (Genese 7:17-22; 18:20; 19:24, 25; Numeri 16:31-35) Nahan kpa, aluer u time sha kwagh u ajiir ne a er yô, u fa atôakyaa atar, a a tese ér hanma mtim u Aôndo tim ior sha ayange la cii kaha kposo a uaahe mba sha ayange ne yô. Kwagh u hiihii yô, Aôndo yange a vande tan ior icin. Kwagh u sha uhar yô, Aôndo yange tsuan a tsua mba una tim yô, yange zomon mbaishôôv man mbaiboov cii timin, er uaahe ve eren nyian nahan ga. Ka mba yange vea nômbo ikyôr eren afer shin mba vea venda u ungwan acin a tan a Aôndo la tseegh, yange a tim ve ye. Kwagh u sha utar yô, Aôndo yange a bugh gbenda sha u mbaishôôv ve̱ war.—Genese 7:1, 23; 19:15-17; Numeri 16:23-27.

Ikyav i môm môm tsô tese ér ka Aôndo a ne ve uaahe kpishi ve lu tseren ior umiliôn imôngo nyian ga. Nahan yô, ka nyi i ne ve uaahe mbara ve lu eren seer a seere? Se wa ishima a uaahe mban nena? Man a tsa nahan uaahe vea bee sha won kpa? U zua a mbamlumun sha mbampin mban ken ngeren mba ve dondo ne.