Bibilo Gem Ior

KA NYI yange i wase wankwase ugen u undu kwaghaôndo u mbamaren nav tese un iyev la ve, hide ken kwaghaôndo shono? Ôr ase kwagh u wankwase ne a er sha zwa na yô.

“Uma wam hemba ngun a inja hegen cii.”—LISA ANDRÉ

I MAR UN KEN INYOM I: 1986

TAR NA: LUXEMBOURG

INJA KWASE I YANGE LU YÔ: WAN U UNDU TER NA YÔ

YIASE YAM: Yange m vese ken gar u Bertrange, angar u lun wang, u ifer ngee her ga shi ior lu a inyaregh her kpishi yô; gar ne ngu ikyua a gar u Luxembourg. I mar se utaan. Ka mo m lu wan-masetyô ye. Mbamaren av ka Mbashiada mba Yehova; yange ve nôngo kwagh kpoghuloo sha u tesen anmgbianev av mba nomso man mba kasev kua mo aeren a Mbakristu.

Yange m va kom anyom pue-kar yô, m hii u lun a akperan ken ishima kpishi sha atesen a Mbashiada mba Yehova. Sha hiihii la, m hunde ishima sha kwagh u akperan la, kpa jighjigh wam gema hii u ndôhôr kure kure. Mbamaren av yange ve nôngo sha afatyô ve cii ér vea wasem m hide sha hwange, kpa m soo ga. Yange m duen m za lun imôngo vea agumaior agen a hendan kwagh a mbahemenev; m lu eren kwagh ne kpa mbamaren av fa ga. Lu inja er agumaior ne nga sha tseeneke ve sha ci u ihyembeato ve la nahan, man lu tseeneke u mo kpa m soo je la. Se zaan uiniongo kpishi, se yaven a ayol a ase shi se maan mcimbim ma bov, se hunden msôrom kpaa. Sha hiihii la saan mo iyol u lun imôngo vea agumaior a yange lu inja er nga yan tar sha ishima ve la.

Kpa jighilii yô, yange saan mo iyol ga. Uma u m lu eren vea ahuraior a am ne lu pe-pe-pe uma; gadia kwagh tsô gba ve sha akaa a a lu zan hemen la ga. Kpa mo yô, ishima gema zam iyol sha aferakaa a shin tar ne. Er shighe lu karen la, ishima i lu hemban zan mo iyol cii.

GBENDA U BIBILO GEMA UMA WAM LA: Iyange igen, shighe u m lu anyom 17 la, m ure kpishi. Er ngôm nenge ér saan mo iyol ga yô, a kaa a mo ér shi mo m kar henen Bibilo m nenge. A taver mo ishima ér mo m time sha atesen a Bibilo, nahan m mase tsuan a ishima yam, aluer ka u me dondo a shin me dondo ga kpaa. Kwagh u ôr a mo sha ishima i môm ne wasem u geman inja. Tsô m lumun mer Caroline, anmgbian wam u kwase u vesen vea nom na, Akif, ve hen Bibilo a mo. Yange i yese Akif ken kwaghaôndo u Mbashiada mba Yehova ga, kpa va gande or cii ve hingir Orshiada u Yehova ye. Akaa a Akif vande eren ken uma na la na yô, m nenge mer me fatyô u ôron un kwagh wam gbar gbar, man iliam la lum kwagh u hange hange.

 Yange m fa mer uma wam zua sha gbenda u Mbashiada ve eren kwagh ga, kpa sha hiihii la, m tôô mer ka kwagh u m soo la me er a uma wam ye. Nahan kpa, m ngur henen Bibilo yô, m mase kaven mer aeren am la nga nan Yehova ishimavihin. (Pasalmi 78:40, 41; Anzaakaa 27:11) Shi m hingir u kaven mer aeren a am nga benden a mbagenev kpaa.

Er m lu timen ken Bibilo seer a seer la, m gba nengen a atôakaa a vough man a kuman ken ato, a wasen mo u nan jighjigh mer Bibilo ka Mkaanem ma Aôndo. U tesen ikyav yô, m hen kwagh u akaaôron a profeti a ken Bibilo kpishi a yange kure sha mi vough, a mshi shio yô. Mfe ne wasem u dughun akperan a m vande lun a mi ken ishima la kera.

Yange m hii u henen Bibilo ka zurum inyom i môm yô, mo vea mbamaren av se za sôr anmgbian wam u vesen, u lu wasen tom hen afishi a branci u Mbashiada mba Yehova ken tar u Jamani yô. Er m nenge mer saan anmgbian wam iyol kpishi yô, kwagh ne kôrom sha mtema tsung. Ka msaanyol u mo kpa m lu keren vough je la! Mlu u Mbashiada mbagenev mba ve kpa ve va u va wasen tom hen ijiir ne la doom kpen kpen. Ve lu inja kposo a ior mba m zenden a ve, mba ve wa anyighe shi ve keren iemberyolough la. Shighe kar kpuaa yô, m er msen hen Yehova a ishima yam cii, m tôndo zwa a na mer me civir un sha ayange a uma wam cii. M va kom anyom 19 yô, m er batisema sha u tesen mer m tsegha iyol yam sha ci u Yehova.

IWASEN I M ZOUGH A MI LA: Uma wam hemba ngun a inja hegen cii. M ngu zuan a iember sha u tesen ior Bibilo shi wasen ve sha u ve hen kwagh u Yehova man akaa a a tende zwa ér una va er ken hemen sha ci wase la. Tsombor wam kpa mgem wam ne wase ve; ishima i kera hingir ve lenge lenge sha kwagh wam ga.

Mbamtsum av cii hungur mo ga, kpa m soon u zeren henen sha ve ga. Kpa m gema m hemba haren ishima yam sha gbenda u Yehova a dem asorabo am shi a wem ikyo sha mimi kpaa la. M lumun a mkaanem ma i nger ken Anzaakaa 10:22 la a ishima yam cii. Ivur la kaa ér: “Iveren i Ter ngi ve a inyaregh, tom u nyoonyol seer ma kwagh sha i ga.”

[Mkaanem ma sha peeji 20 la]

“Se zaan uiniongo kpishi, se yaven a ayol a ase shi se maan mcimbim ma bov, se hunden msôrom kpaa.”

[Mkaanem ma sha peeji 21 la]

“Mbamtsum av cii hungur mo ga, kpa m soon u zeren henen sha ve ga.”