“Icighan, Icighan, Icighan, Kape Ter . . . A Lu La”
Kporom Hen Aôndo
“Icighan, Icighan, Icighan, Kape Ter . . . A Lu La”
ALUER gba u u tsua ishember i môm sha u pasen mlu u Yehova Aôndo nahan, ka hanma u tsuaa? Ken derianyom u sha anigheni C.S.Y. (Cii man Shighe u Yesu) la, i na profeti Yesaia mpase u sha mnenge, nahan a nenge a akaauma a ken jijingi lu wuese Yehova, yilan ishember i i pase vegher u vesen ken mlu u Yehova la, ka mlu na u icighanegh je la. Gba u kwagh u Yesaia yange nenge shi ungwa la, una kpiligh se iyol shi una kporom a vese hen Yehova. Er hegen se lu timen sha mkaanem ma ken Yesaia 6:1-3 ne, tôô wer yange u lu ape kwagh ne lu zan hemen la.
Lu nyi Yesaia nenge a mini? Yesaia kaa ér: “M nenge Ter tema sha ikyônough ki torough ki taven ki lun sha geng.” (Ivur 1) Kpa u ngu wer, Yesaia lu nengen a Yehova, Ter Uhembanagee jighilii ga. Ashe ase a inyam man awambe ne aa fatyô u nengen a kwagh u ken jijingi ga. Bibilo kaa wang ér: “Aôndo yô, mayange ma or ngu a nenge a Na ga.” (Yohane 1:18) Kwagh u yange Yesaia nenge a mi la, lu mpase u sha mnenge. * Nahan cii kpa, mpase u sha mnenge ne yange due wang, je kpiligh Yesaia iyol, nahan lu un inja er ka Yehova iyolna je un lu nengen a na nahan.
Ka been yô, Yesaia shi nenge a kwagh ugen, u alaghga orumace môm kpa i lu a na nan ian i nengen a mi ken mpase u sha mnenge ga yô. A nger ér: “Userafim tile a Na [Yehova] vegher u sha, hanmô ve lu a akper ataratar: a ahar a yisa ishigh nagh a mi; a ahar, a yisa angahar a mi; a ahar di yô, a purugh a mi.” (Ivur 2) Userafim ka mbatyomov mba ve lu sha iantom i vesen yô. Ka orngeren Bibilo Yesaia tseegh a ter kwagh ve ye. Hanma shighe cii yô, userafim ka ve wa iyol ve keghen a keghen u za eren hanma kwagh u Yehova a soo ér ve er cii. Ka ve yisa ishigh vev man angahar a ve, sha u tesen icivir hen Un, u ve zough a ian i civirigh i eren un tom la.
Yange kpiligh Yesaia iyol a kwagh u nenge a mi la tseegh ga, kua kwagh u ungwa la kpaa. Userafim mban kohol imôngo sha, ve lu wan icam genger genger. Yesaia nger ér: “U môm gema gba yilan ugen, kaan er: ‘Icighan, icighan, icighan, kape TER u akum a Sha A lu la.’” (Ivur 3) Ishember i ken zwa Heberu i i gem ér “icighan” la, ngi ôron kwagh u mlu u wang, u lun a acôghor ga. Ishember ne shi ngi ôron “kwagh u lun ken ikyangenev mbi isholibo ga, lun paleghaa a i.” Er userafim zua akenge lu wan icam, mbagenev lu tôôn, mbagenev di lu lumun la, ve ter ishember i “icighan” la kwa tar, sha u tesen ér Yehova hemba ngun icighan cii. (Mpase 4:8) Nahan mlu u icighanegh ka ieren i i na un a dugh kposo yô. Yehova ngu wang sha hanma gbenda cii, shi ngu a acôghor man mshi cuku tsô kpaa ga.
Gba u mfe u se fe ser Yehova ngu icighan la una mgbegha se u kporom ikyua a na. Sha ci u nyi? Yehova ngu er mbahemenev mba uumace mba ka ve fatyô u vihin shi eren a ior caveraa la ga, gadia ma kwaghbo cuku tsô kpa ngu ken a na ga. Sha nahan yô, mlu na u icighanegh la, na se ibumun ér, hanma shighe cii yô, una lu Ter u dedoo man Orhemen u perapera man Orjir u sangen sha dooshima ga. Se mba a ityôkyaa i lun a vangertiôr ser, mayange Aôndo u mlu na a lu icighan la, una er kwagh u van se ahenge ga.
[Ngeren u shin kpe]
^ Takerada u Insight on the Scriptures pase ér: “Shighe u Aôndo a ne or mpase u sha mnenge shighe u nan lu per yô, ka i lu inja er i nger a nger mpase shon ken ishima i nan nahan. Ka nan va fatyô u umbur mpase shon shi pasen un gayô ngeren un inya ken mkaanem ma nan.”—Ka Mbashiada mba Yehova ve gbe u ye.
[Mkaanem ma sha peeji 32 la]
Gba u mfe u se fe ser Yehova ngu icighan la una mgbegha se u kporom ikyua a na
