Hen Kwagh Ken Mkaanem Ma Aôndo

Se Kôr Ijende a Ior Mba Dedoo Nena?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Er nan ve i gbe u se kôron ijende sha kwaghfana?

Ior kpishi ka ve soo ér mbagenev ve lumun ve. Ashighe kpishi isharen ne ka i na se highir u kaven ieren i mba se lu imôngo a ve la. Nahan azende ase aa fatyô u benden a gbenda u se henen kwagh ken ishima yase la tsung je. Sha nahan yô, azende a se tsough la, aa fatyô u benden a injaor i se va lu la.—Ôr Anzaakaa 4:23; 13:20.

Davidi, u jijingi u Aôndo mgbegha un nger Bibilo la, yange tsua azende na sha kwaghfan. Er lu or u civir Aôndo yô, yange luun imôngo vea ior mba wase un u tilen sha mimi la. (Pasalmi 26:4, 5, 11, 12) Ikyav i tesen yô, ikyar i Davidi ya vea Yonatan la lu i dedoo, sha ci u Yonatan yange taver un ishima u suur sha Yehova.—Ôr 1 Samuel 23:16-18.

2. U er nan ve u lu ijende i Aôndo?

Er Yehova a lu uhembanagee nahan kpa, jighilii yô, se fatyô hingir azende a na. Ikyav i tesen yô, Aberaham yange hingir ijende i Aôndo. Aberaham yange na Yehova jighjigh shi ungwan imo Na kpaa, nahan Yehova tôô kaa ér Aberaham ngu ijende na. (Genese 22:2, 9-12; Yakobu 2:21-23) Aluer se na Yehova jighjigh, shi se mba eren ishima na yô, se kpa se fatyô u hingir azende a na.—Ôr Pasalmi 15:1, 2.

  3. U fatyô u zuan a iwasen hen azende a dedoo nena?

Azende a dedoo nga a eren a we sha mimi shi a wasen we u eren kwagh u vough. (Anzaakaa 17:17; 18:24) Ikyav i tesen yô, adooga Yonatan lu tamen a Davidi kuma er anyom 30 nahan, shi lu un je doo u ma ya dyako u ikyônough ki torough ki tar u Iserael ye, nahan kpa, a sue Davidi, u Aôndo tsua un ér a lu tor sha mimi la. Shi azende a mimi nga a̱ nenge wea eren kwagh sha ibume kpa, a cia u kôôm we ga. (Pasalmi 141:5) Azende a Aôndo a doo a ishima yô, aa fatyô u wasen we u lun a aeren a dedoo.—Ôr 1 Mbakorinte 15:33.

U fatyô u zuan a ior mba ve kpa kwagh u dedoo a doo ve ishima er we nahan la, hen Iyou i Tartor i Mbashiada mba Yehova. Aluer u za her yô, u fatyô u zuan a azende a aa taver we ishima sha iniôngon i u lu nôngon wer u er ishima i Aôndo la.—Ôr Mbaheberu 10:24, 25.

Nahan cii kpa, ashighe agen azende a Aôndo a doo a ishima la je kpa, aa fatyô u van se ahenge. Nahan ishima i de vihin we sha akaa a ve er sha lan la fese ga. (Orpasenkwagh 7:9, 20-22) Umbur wer, ijende i môm kpa ngi vough ga, shi azende a Aôndo a doo a ishima la, nga se a inja kpen kpen. Mkaanem ma Aôndo kaa a vese ér se waan ishima a mbamyen mba mba ve lu Mbakristu a vese imôngo la.—Ôr Mbakolose 3:13.

4. Kpa aluer “azende” a ou hendan a we di ye?

Ior mbagenev kpishi nenge ér, ka a hii u wasen ve sha u ve fa mkaanem ma Aôndo yô, azende a ve a tse agen a soo ér i de ne ve imba iwasen la ga. Adooga tsô, azende la kav kwaghwan u injaa shin ishimaverenkeghen i bunden ga, i u zough a mi ken Bibilo la ga. Alaghga u fatyô u wasen a.—Ôr Mbakolose 4:6.

Sha ashighe agen yô, alaghga “azende” a ase aa lam sha loho u dedoo u u lu ken mkaanem ma Aôndo la dang. (2 Peteru 3:3,  4) Adooga mbagenev vea lam sha iniôngon you, i u lu nôngon u eren kwagh u dedoo la dang. (1 Peteru 4:4) Aluer imba kwagh la i er u yô, a gba u u tsua u lun ijende ve shin lun ijende i Aôndo. Aluer u tsua u lun ijende i Aôndo yô, ka ijende i hemban doon cii je u tsough la.—Ôr Yakobu 4:4, 8.

Wea soo u seer zuan a iwanger yô, ôr ityough 12 man 19 ki takerada u Bibilo Tese Ér Nyi Jimi? la. Ka Mbashiada mba Yehova ve gber u ye.