Shighe u I Gbe u Se Lu Per Yô
Tese Ônov ou
Shighe u I Gbe u Se Lu Per Yô
ALAGHGA u lumun wer, u lun per shighe u u lu ken makeranta la ka kwagh u injaa. Mbagenev kpishi ka ve yaven shighe u ve lu ken klase la, kpa aluer u soo u henen kwagh yô, saa u lu per. Shi alaghga u ze mbamkombo ape ka u za hen Bibilo la.
Ka nyi u hen wer u er ve ia wase u lun pere?— * Kwagh môm u una wase yô, ka u yaven faa. Shi aluer u ngu eren icin mnya atetan yô, alaghga kwagh la kpa una wase u. De se ôr kwagh u wanyekwaor ugen u yange hungur mnyam, shighe u apostoli Paulu lu ôron kwagh a nongo u Kristu ugen atôatôutu yô, nahan se hen kwagh u injaa sha kwagh ne. Bugh Bibilo you ken Aerenakaa ityough 20, ivur 7 zan zan 12, tsô u nenge kwagh u yange er yô.
Paulu yange lu sôron nongo u Kristu ugen ken Teroa, gar u lu hen kpemnger yô. Bibilo kaa ér Paulu lu “veren ishima u kper nan una mough” ker una nyôr tso, una yem. Nahan “a lihe kwaghôron na zan zan atôutu.” Ivur la kaa ér: “Wanye kwaor ugen, iti na er Utiku, tema hen windou, tsô mnyam hemba un; er Paulu lihe a kwaghôron na la yô.” Nahan lu nyi i ere?—
Utiku osough sha windou “sha kpoyou u sha utar” la. Paulu man mbagenev hungwa ayem shin kpoyou u shin inya la. Utiku gba lu hen inya kpenegh! U nenge er ve cii kwagh ne yange una vihi ve kpa?— Bibilo kaa ér Paulu za samber sha Utiku, kuve un. Ica i gbe ga yô, Paulu ngor sha iember ér: ‘Ishima i de ze ne iyol ga, kwagh er un ga!’ Aôndo nder Utiku hide lu uma her!
Kwagh u yange ér Utiku la tese se nyi sha kwagh u Aôndo?— Kwagh ne tese se ér Yehova, Ter wase u sha la, una fatyô u hiden nan mba ve kpe la uma, kua mbayev mba kiriki kpaa. Yehova fa u, shi u doo un ishima, je hemba er u doo mbamaren ou ishima la. Shighe u Yesu lu shin tar la, a pase imbaor i Yehova a lu yô, sha u kuven mbayev mba kiriki shi veren ve doo doo. Shi yange nder agumaior, kua wanyekwase ugen u lun anyom 12.
Er u fe wer u doo teru u sha la ishima nahan, ka u ken ishima nena?— Sha mimi yô, kwagh ne ngu a na se kpa Yehova a doo se ishima shi se soo u ungwan imo na kpaa. U fa er se er ve se tese ser Yehova doo se ishima kpa?— Gbenda môm yô, ka u kaan ser a doo se ishima. Yesu yange kaa ér: “Ter doom ishima.” Kpa Yesu er kwagh hemba di u kaan sha zwa tseegh ér Aôndo doo un ishima la. Yange tese kwagh ne sha ieren na.
Yesu yange ungwan imo i Aôndo. Yesu kaa ér: “M eren akaa a doon Un gbem.” Aluer se kpa se mba eren akaa a doon Aôndo yô, se nôngon sha afatyô wase cii, se luun per shighe u i gbe u se er nahan yô, sha er se er kwagh u sha ishima i Yehova man Wan na, Yesu yô.
Ôr ken Bibilo you
[Ngeren u shin kpe]
^ Aluer u ngu ôron ngeren ne vea wanye u kiriki yô, anhwange u i kper heen tiônôô ne ka u umbur we ér gba u ú mem, shi u taver nan ishima nana̱ pase u mnenge u nan.
Kwagh Ugen u Alaghga Shi Una Doo U Yô
IYOUKURA
Doo u Se Umbur Yesu Kristu Nena?
Ka shighe u Yesu lu ankyundan la tseegh i doo u se umbur un yee? Ka unô ve lu “mbafankwagh” mba yange ve va u nengen a na laa? Yesu ngu eren nyi hegene?
IYOUKURA
Ishima Ia Fatyô u Vihin Aôndo—Kwagh u Se Er Ve a Saan Un Iyol Yô
U vande fan wer ieren iyou ia na a saan Aôndo iyol shin ishima ia vihi unuu? Fa er Adam man Ifa yange ve na Yehova ishimavihin yô.
IYOUKURA
Peteru man Anania Er Aie—Se Hen Nyi sha Kwagh Laa?
Tôv fa er i hii ve iorov uhar yange ve er aie, kpa i de u môm kwaghbo na, ugen la i de un ga yô.
IYOUKURA
