U Fatyô u Zuan a “Mfe u Fan Aôndo” La
Kporom Hen Aôndo
U Fatyô u Zuan a “Mfe u Fan Aôndo” La
YEHOVA AÔNDO bugh se gbenda u zuan a kwagh u lun a inja tsung, shi a soo ér se zua a kwagh shon kpaa. Kwagh u injaa ne ve se a inyaregh ga, kpa ngu a gema a va se a kwagh u inyaregh ki shin tar jimin cii kpa kia fatyô u yamen un ga yô; ka bem u ken ishima man mkom man uma u saan saan. Kwagh u injar shon ka nyi? Mkaanem ma Solomon, Tor u fankwagh yange nger ken Anzaakaa 2:1-6 la pase kwagh ne.
Solomon yange pase kwagh u injaa ne ér ka “mfe u fan Aôndo,” ka mimi u sha kwagh u Aôndo man mbaawashima nav mba i pase ken Bibilo je la. (Ivur 5) Kwagh u injaa ne ngu ker avegher kposo kposo.
Atesen a mimi. Bibilo na mbamlumun sha mbampin er mban nahan: Iti i Aôndo ér nyi? (Pasalmi 83:18) Ka nyi ka i er se zum u se kpe laa? (Pasalmi 146:3, 4) Se mba shin tar ne sha ci u nyi? (Genese 1:26-28; Pasalmi 115:16) Sha mimi yô, mbamlumun mba i ne sha mbampin mba hange hange mban mba a inja kpishi je.
Kwaghwan u injaa. Bibilo i ôr se gbenda u hemban doon cii u se eren akaa ken uma yô. U er nan ve ivese you ia tsa? (Mbaefese 5:28, 29, 33) U er nan ve u yese mbayev vea vese a hingir mbayev mba dedoo? (Duteronomi 6:5-7; Mbaefese 6:4) U er nan ve u zua a msaanyol ken uma? (Mateu 5:3; Luka 11:28) Shi hide hen ase yôô: kwaghwan u mimi u i we sha akaa ne la ngu a inja nena?
U kaven mlu u Aôndo man aeren a na. Bibilo ka takerada u u hembe pasen kwagh u Aôndo vough yô. Aôndo yô, ngu nena? (Yohane 1:18; 4:24) We ikyo sha kwagh wase kpa? (1 Peteru 5:6, 7) Ka aren a na agen a nyi a due tseer tseere? (Ekesodu 34:6, 7; 1 Yohane 4:8) U nenge wer mkaanem ma mimi ma sha kwagh u Orgban se la ma a inja nan je?
Sha kpôô yô, “mfe u fan Aôndo” la ka kwagh u injaa u ken jijingi. U zua a mi nena? Ivur i sha 4, i ken takerada u Anzaakaa ityough 2, ape Solomon yange kar mfe ne sha “akaa a injaa a i yer” la, ia wase se. Hen ase sha kwagh ne: Kwagh u injaa u i yer un yô, una gba duen iyolna ape i yer un la, va kohol or u shirin a shir ave ga. Gba u se nôngo kwagh man se zua a mi ye. Kape mfe u Aôndo la kpa, i lu je la. I yer kwagh u injaa ne ken Bibilo. Nahan gba u se nôngo kwagh ve se zua a mi ye.
Solomon pase kwagh u se er ve se zua a “mfe u fan Aôndo” ne yô. Mkaanem ma “ngohol akaaôron am” man “ver ishima you” mara tese ér gba u se lu a ishima i ungwan kwagh. (Ivur 1, 2) Ishember i “yila” man i “ker” la tese ér gba u se nôngo kwagh ngeegh, se tesen sha mimi ser se mba a gbashima. (Ivur 3, 4) Nahan aluer se soo u zuan a kwagh u injaa la yô, gba u se hen Bibilo zulee, man sha ishima i môm kpaa.—Luka 8:15.
Aluer se tese gbashima nahan yô, Yehova una wase se. Ivur i sha 6 la kaa ér, “TER ne kwaghfan.” Ka sha iwasen i Aôndo tseegh, se fatyô u kaven mimi mba ve lu ken Bibilo la ye. (Yohane 6:44; Aerenakaa 16:14) Lu a vangertiôr wer: Aluer u ngu timen ken mkaanem ma Aôndo a ishima i môm yô, u zua a “mfe u fan Aôndo” la, ka kwagh u injaa u una na uma wou una hemba lun a inja cii je la.—Anzaakaa 2:10-21. *
[Ngeren u shin kpe]
^ Mbashiada mba Yehova tar sha won cii mba henen Bibilo a ior mba ve soo u fan Bibilo la sha uya vev gbilin. Er nan u zough a ve hen haregh wou, shin u nger ve washika sha ma adereshi u i nger sha peeji u sha 4 la ga?
