U Wan Ishima a Uaahe

Er uaahe ve lu eren puusu puusu shi ve lu vihin akaa seer a seer yô, ka nyi or a er ve nana wa ishima? De se nenge sha akaa agen a se fatyô u eren yô.

De Lu ape kwaghbo una er u ga. Bibilo kaa ér: “Orfankwagh ka nan nenge a kwaghbo, nan yer, kpa mbalanenkwagh yô, ka ve kar, ve za ya ican.” (Anzaakaa 22:3) Kwaghwan ne ka u injaa, u se fatyô u dondon un sha kwagh u uaahe yô. Aluer i ta icin ér uwo ngu sôôn bughur shin alaghga ifi una sar avenge, gayô ijeverahumbe shin uraahumbe u vesen ngu sôôn van yô, mba ve lu sha ajiir a aahe shon a lu van la vea lu eren kwagh sha kwaghfan aluer ve undu a ve yem sha ajiir a zayol a lu her ga yô. Uma hemba ya shin akaa a iyolough agen.

Mbagenev yô, alaghga vea fatyô u teman ya sha ajiir a uaahe ve eren her fele fele ga yô. Ngeren ugen kaa ér: “Ka hanma ijiir cii aahe a eren ga. Tar jimin cii, ajiir a aahe a eren her fele fele la nga cuku tseegh tsô, shi ken hemen yô, uaahe mba vesen kpishi vea er sha ajiir ne.” U tesen ikyav yô, kwagh a fatyô u eren nahan sha ajiir a a lu shin pev, ikyua a zegemnger shin ajiir a a lu ikyua a ikwe u vesen, ape tar u tenger fele fele yô. Aluer ka u ú fatyô u palegh ajiir a bo angara nahan, shin moughon her kera yemen hen ma ijiir igen i aahe a fe eren her ga yô, alaghga aahe una tser u er wea lu sha ajiir a bo la ve ma i lu nahan ga.

Vande fan kwagh u u er yô. Aluer u vande eren hanma kwagh u i gbe u ú er sha u palegh aahe je kpa, aahe una fatyô u tseren we aburabur. Kpa u vande wan ago iyol yô, a hemba lun we zange u nôngon a aahe. Shi kwagh ne zua sha kwaghwan u i vande ôron sha heen ken Anzaakaa 22:3 la. U ngu a anikpa u ú we akaa ker, u kwagh a va er aburabur ve u tôô un u kar a kar kpa? Takerada u i yer ér 1-2-3 of Disaster Education la tese akaa a i doo u a wa ken anikpa ne yô. Ka akaa shon je ne: Akaa a sôron twer u aburabur man isheghmnger i kiriki man akaayan a saan ishe fele ga kua ityakerada i hange hange igen. Shi u lu eren kwagh sha kwaghfan aluer u vande teman vea tsombor wou ne time sha uaahe mba vea fatyô u eren hen ijiir yen la man kwagh u ne er shighe u vea er la kpaa.

Za hemen u lun ikyua a Aôndo. Kwagh ne una wase u ken hanma mlu u u nyer ker cii. Bibilo kaa ér Aôndo ka ‘Ter u lun a mhôônom ma zungwen shi ka Aôndo u lun a ishimasurun cii kpaa. Un surun se asema sha atsan a ase cii.’ Ivur igen ôr kwagh na ér ka Aôndo “u A surun mba ve hir ayol a ve ijime la asema yô.”—2 Mbakorinte 1:3, 4; 7:6.

Mimi yô, Aôndo fa akaa a a eren mba ve ne un jighjigh la tsembelee je. Un ngu Aôndo u dooshima shi ne se kwaghwan u taver se asema sha igbenda kposo kposo. (1 Yohane 4:8) Ka sea er msen, sha ci u Aôndo a̱ er uivande ga, kpa a na se icighan jijingi na u ageegh la yô, kwagh ne a wase se ken nyityô mlu u se nyer ker cii. Icighan jijingi  una fatyô u umbur mba ve nyer ken ican la avur a Bibilo agen a aa na ve ishimasurun man mpeveryol yô. Mimi yô, ishima ia fatyô u lun mba civir Aôndo sha jighjigh keregh er Davidi, tor u Iserael u tsuaa la kpa ishima lu un ker ve ôr mkaanem man nahan, ér: “Shin mea karen ken pev u mure u kuugh kpaa, me cia kwagh u bo ga, sha ci u We U lu a mo yô; aga Wou man gbough Ough ka ve surun mo ishima.”—Pasalmi 23:4.

Mbakristu mba wasen ayol a ve. Sha derianyom u hiihii la, Orkristu ugen u lu profeti yô, i yilan un ér Agabu, yange kaa ér “zegejen una gba, á tser tar cii. Kwagh la kpaa er di nahan vough sha ayange a Kaloudia tema tor la je.” Mbahenen mba Yesu kpishi, mba ve lu ken Yudia la, ijen la bende a ve kpoghuloo je. Zum u mbahenen mba ve lu sha ajiir agen ungwa zayol u anmgbianev vev mba ken Kristu mbara yô, ve er nyi? Ngeren la kaa ér: “Mbahenen [mbara] wa ken ishima er hanmô ve nana nôngo sha kwagh u nan fatyô yô, sha u tindin a iwasen hen anmgbianev mba ve tem ken Yudia la.” (Aerenakaa 11:28, 29) Yange ve er kwagh sha dooshima sha u nan ve akaa a van ve a myôhôryol.

Kape nyian kpa uaahe mba vihin tsung ka vea er ve, mba civir Aôndo ve wase anmgbianev vev vough je la. I fa Mbashiada mba Yehova wuee sha ieren ve i wasen mba nan jighjigh a ve imôngo la. U tesen ikyav yô, shighe u tar tenger ken tar u Chile ken uwer u Febewari 27, 2010 la, Mbashiada mba Yehova er kwagh fese sha u wasen mba akaa saa ve la. Kwase ugen u yange mngerem ma saren avenge kuwa un ya yô, mba yer un ér Karla, a kaa ér: “Yange lu kwagh u surun mo ishima shi taver mo ishima kpaa, u nengen er kpernan je [Mbashiada mbagenev] va sha ajiir agen sha u va wasen se yô. Yehova sur se asema sha erdoo u mba ve na ayol a ve u va wasen se la je ka u henen a hen ga. M nenge mer i soom shi i kuram kpaa.” Ter na u vesen, u a lu Orshiada ga la kpa nenge iwasen i Mbashiada lu nan la. A kaa ér: “Kwagh ne kaha kposo a kwagh u m nengen i eren ken côôci yam anyom imôngo hegen yô.” Kwagh u nenge sha ashe na ne mgbegha un, a kaa a Mbashiada mba Yehova ér ve va henen Bibilo a na.

U lun imôngo vea ior mba Aôndo a doo ve ishima la, ka kwagh u una fatyô u wasen we kpishi ken ashighe a ican yô. Nahan cii kpa, ma shighe ngu u uaahe vea bee shin tar kera yôô? De se nenge kwagh u Bibilo i er sha kwagh ne yô.

[Foto u sha peeji 6 la]

U ngu a anikpa u ú we akaa ker, u kwagh a va er aburabur ve u tôô un u kar a kar kpa?

[Foto u sha peeji 7 la]

Ka sea er msen, sha ci u Aôndo a̱ er uivande ga, kpa a na se icighan jijingi na u ageegh la yô, kwagh ne a wase se ken nyityô mlu u se nyer ker cii

[Foto u sha peeji 7 la]

Mbakristu mba wasen ayol a ve u nôngon a mbamzeyol mba uaahe ve ve a mi la

[Foto u sha peeji 7 la]

“M nenge mer i soom shi i kuram kpaa”