Uaahe Vea Kera Lu Ga!

ALUER or kaa a we ér, “Ica a gba ga tsô, uaahe vea kera lu ga” nahan, u ôr wer nyi? Adooga u kaa a nan wer, “Mnyam ma cier we a cier. Uaahe vea bee mayange ga.” Gayô alaghga u kaa ken ishima wer, ‘A hen ér un ngu bumen ana?’

Er i lu inja er uaahe vea za hemen u eren se nahan kpa, se mba a ityôkyaa i lun a ishimaverenkeghen i mimi ér kwagh a va gema. Nahan kpa, mgem ne una va sha iniôngon i uumace ga. Uumace vea fatyô u fan er i hii ve akaa a eren sha gbaaôndo kua gbenda u akaa shon a eren la tsembelee ga, nahan vea fatyô yangen shin geman á cuku tsô kpaa ga. Solomon, Tor u Iserael u sha ayange a tsuaa, u yange i fa un wuee sha kwaghfan na man gbenda na u tôvon sha kwagh zulee la nger ér: “Ma or nana fatyô u kaven tom u i eren u shin tar la ga; gadia shin er nana nôngo nan, nana time u kpaa, nana kav ga; een, shin er orfankwagh nan henen er nan fa kpaa, nana kav u ga.”—Orpasenkwagh 8:17.

Aluer uumace vea fatyô u yangen uaahe ga yô, ka an nana fatyô? Bibilo kaa ér ka un u a gbe se la una va a mgem ne ye. Ka Un a ser akaa a ver shin tar ne vough vough, er gbenda u mngerem ma zenden la nahan ye. (Orpasenkwagh 1:7) Shi agee a Aôndo nga a ikighir ga, kpa uumace yô, ka nahan ga. Profeti Yeremia kpa yange er shiada sha kwagh ne, ér: “Ahi! Tere, AÔNDO. Nenge, We, U er Sha man tar sha agee a Ou a vesen man sha uwegh Ough ku naregh; ma kwagh u hemban We ngu ga.” (Yeremia 32:17) Er i lu Aôndo a er tar kua akaa a a lu shin u cii yô, se fatyô u kaan ser, a fa er una sôr akaa la sha er ior vea lu shin u ken bem man ken mkor kpaa yô.—Pasalmi 37:11; 115:16.

Kpa, Aôndo una va a mgem la nena? Aluer u umbur yô, ngeren u sha uhar ken ngeren mba se time sha mi ne tese ér akaa a kpilighyol kpishi a a lu zan hemen shin tar nyian ne cii ka “ikyav” i ‘mkurtar.’ Yesu kaa ér: “Shighe u né nenge akaa ne aa eren yô, fa nen ner, Tartor u Aôndo mgbôghom ve.” (Mateu 24:3; Luka 21:31) Tartor u Aôndo, gomoti u sha, u i lu Aôndo a ver un la, ua va a mbamgem shin tar, je yô ua sôr akaa a sha gbaaôndo aa hingir vough. Er Yehova a lu a tahav mbu eren kwagh ne iyol na nahan kpa, a na Wan na tom ne. Shighe u profeti Daniel lu ôron kwagh u Wan shon ne yô, a kaa ér: “I na Un tor sha won cii man icivir man tartor, sha u ior  man akuraior man ijô cii ve̱ er Un tom” yô.—Daniel 7:14.

I na Yesu Kristu, Wan u Aôndo tahav mbu i gbe u una er tom a mi sha u van a mbamgem mba vea na tar ne ua hingir ijiir i doon la cii. Shighe u Yesu va shin tar, anyom a kar hegen i kom dubu uhar la, a tese tahav mbu a lu a mi u sôron akaa a sha gbaaôndo la cuku tsô. Sha shighe ugen la, Yesu man mbahenen nav lu shin tso, shin ifi u Galilia, maa “zegeuraahumbe gba, agôndoamnger gba tan sha tso haan shimi, nahan tso gba ivin.” Tsô mciem gba mbahenen nav iyol tsung. Er ve lu cian ér vea va tim yô, ve vaa a Yesu. Tsô Yesu er nena? “A yange ahumbe, A kaa a zegemnger er: Huan, lu ving! Ahumbe maa de, nahan huan ving cii.” Cier mbahenen nav iyol, nahan ve pine ér: “Ka nyi Or ne man ahumbe kua zegemnger je kpaa ve ongo Unu?”—Marku 4:37-41.

Hii sha ayange a ngise la je, i kende a Yesu i yem a na sha shi i seer nan un agee man tahav mbu vesen. Er a lu Tor u Tartor u Aôndo yô, ngu a tom kua tahav mbu van a mbamgem mba i gbe u una va a mi sha u ior ve lu ken bem shi ve zua a mkor shin tar yô.

Nahan kpa, er se nenge nahan, ka uumace ve ne ve mbamzeyol man uaahe kpishi ve lu eren ye. Ieren ve i keren mtsera sha hua man sha gbenda u tesen ér ve wa ayol a ve ikyo tseegh la ngi i va a mbamzeyol mban shin ngi i na mbamzeyol mban ve hemba vihin cii. Ka nyi Tartor la ua er sha kwagh u ior mba ve nômbo ikyôr u eren ambaakaa ne, shi ve vende u geman asema kpaa la? Bibilo ôr kwagh u Ter Yesu ér ngu van “sha, a mbatyomov Nav mba ageev imôngo ken [nomborusu, NW]; Una tsaha mba ve fe Aôndo ga man shi mba ve we Loho u Dedoo u Ter wase Yesu ikyo ga la.” Una va “tim mba ve lu vihin tar la” kpee je.—2 Mbatesalonika 1:7, 8; Mpase 11:18.

A been cii yô, Yesu Kristu, u a lu “Tor u utor” la, una sôr akaa a gbaaôndo a shin tar la cii aa hingir vough. (Mpase 19:16) Una er kwagh u mba vea lu sha ikyev i Tartor la, vea kera ya ican cuku ga yô. Una er tom a tahav nav sha u sôron akaa a sha gbaaôndo, sha er fam man inyom kua mlu u ahumbe, vea lu uumace a iwasen yô. Kwagh ne una kure kwagh u Yehova ngise tôndo zwa a ior nav la, ér: “Mo Me nôôn ne ura sha ashighe a u, inya ia doon iyiav, ikyon i ken toho kpaa ia umen atam a i.” (Levitiku 26:4) Ior vea maa uya, kpa vea cia ér uaahe vea va vihi uya mba shon ga. Bibilo kaa ér: “Vea maa uya man vea tema keregh, vea kaha ishule i ikyon i wain, man vea ya atam a i.”—Yesaia 65:21.

Ka Nyi i Gbe u U Ere?

A̱ shi nan kpa, sar u u̱ va lun ken tar u uaahe mba vihin vea kera lu ga la, er mbagenev kpishi kpa i sar ve nahan. Nahan kpa, ka nyi kwagh i gbe u u er ve, u va lu kere? Er mba “ve fe Aôndo ga” man mba “ve we Loho u Dedoo ikyo ga” la vea kuma u lun ken tar u he u u lu van, u uaahe vea kera lu ker ga la yô, kwagh ne tese wang ér gba u or nana hen kwagh u Aôndo shi nana sue tor na u a ver sha u a hemen tar ne la. Aôndo soo ér se fa un shi se wa loho u dedoo u Tartor u a er se sha ikyev i Wan na la ikyo.

Gbenda u u hembe doon cii u henen u eren kwagh ne yô, ka u henen Bibilo zulee. Ngi a kwaghwan u una wase u, u kuma u va lun ken tar u lun a zayol shio, u ua lu sha ikyev i hemen u Tartor u Aôndo la. Er nan u pin iwasen hen Mbashiada mba Yehova sha u ve wase u u hen kwagh u Bibilo i tese la ga? Ve wa iyol ve kegh a kegh u nan we iwasen ne. Kwagh u a lu u bunden ga yô, ka un ne: aluer u nongo u fan Aôndo shi u wa loho u dedoo ikyo yô, mkaanem ma Anzaakaa 1:33 ma a kure sha a we vough, ér: “Kpa hanma or u nan ver ato her a mo yô, nana tema doo doo, ishima ia yôhôr nan, nana kera lu a mciem ma cian ican la ga.”