Uter Vea Za Hemen u Lun Ikyua a Ônov Vev Mba Nomso Nena?

“BABA, er nan u fe kwagh ne kpishi nahana?” Í lu nahan wan wou u kiriki kende gagher pine u mpin imba ne vee? Aluer wan wou vande pinen we imba mpin ne yô, a̱ shi nan kpa, yange doo u hen shighe la kpishi er u lu ter na yô. Nahan kpa, aluer wan wou shi za hemen u dondon kwaghwan wou u sha kwaghfan la man a zua a iwasen yô, a hemba saan we iyol cii. *—Anzaakaa 23: 15, 24.

Nahan kpa, ken anyom a karen ne, wan wou za hemen u soon kwagh wou her kpa? Shin, u nenge wer er a lu vesen ne, icivir i yange lu a mi sha a we la pandee? Ú er nan ve u za hemen u lun ikyua a wan wou u nomso er a lu vesen wan ikyondo laa? De se hii timen sha mbamzeyol mbagenev mba uter ka ve tagher a mi la.

Mbamzeyol Utar Mba Uter Ve Hemban Tagher a Mi Yô

1. M-BAN U SHIGHE: Ken ityar kpishi, ka uter ve hemban keren inyaregh ki kuren ugbayol mba tsombor ve ye. Ashighe kpishi, tom u ve eren la ka u na yô, ve lu her ga, hii pepe zan zan aikighe. Ajiir agen di yô, uter mba tem imôngo a ônov vev sha anshighe kpuaa tseegh. Ikyav i tesen yô, semberee ne, kwaghtôvon ugen ken tar u France tese ér uter mba ken tar la kpishi mba nengen sha mbayev vev ka kom miniti 12 ga.

HEN SHA KWAGH NE: Ú lun imôngo vea wan wou ka kom shighe nena? Ken atô u sati môm shin usati uhar mba ve lu van ne, er nan u kohol shighe u ú lun vea wan wou imôngo ayange ayange la cica cii u nger shin takerada ga? U er nahan yô, alaghga a kpiligh we iyol er shighe la a vese ga yô.

2. M-BAN U IKYAV I DEDOO: Ior mbagenev yô, yange ve vese hen tsombor u kwagh faan zuan ve a ter ve ga yô. Orgen ken tar u France, iti na ér Jean-Marie, a kaa ér: “Yange m faan lun vea terem imôngo ga.” Kwagh ne bende a na nena? A za hemen ér: “Kwagh ne yange vam a mbamzeyol mba m hen mer a tsa kpa me tagher a mi ga yô. Ikyav i tesen yô, ka i taver mo kpishi u lamen vea ônov av sha gbenda u injaa.” Ashighe agen yô, ior ka vea fa uter vev tsembelee je kpa, mlu ve a uter vev mbara a doo ga. Orgen u lun anyom 43, mba yer un ér Philippe, a kaa ér: “Yange taver terem kpishi u tesen mo dooshima. Kwagh ne na yô, gba u me nôngo kwagh kpoghuloo ve me seer tesen wan wam dooshima ye.”

HEN SHA KWAGH NE: U hen wer gbenda u teru yange eren kwagh a we la bende a gbenda u ú eren kwagh a wan wou laa? U nenge wer ka aeren a teru a dedoo la u lu dondon yee, shin ka a bo laa? Er nan ve i lu u nahana?

3. M-BAN U KWAGHWAN U DEDOO: Aeren a ityôô a sha ajiir agen na yô, ior nenge ér gba u ter nana yese ônov mba nan keng ga. Orgen u yange i  yese un ken tar ugen vegher u shin ityôtar i Yuropa yô, iti na ér Luca, a kaa ér: “Hen ape yange m vese la yô, ior tôô ér ka kasev i lu tom ve u yesen ônov ye.” Sha ajiir agen di yô, ior nenge ér gba u uter vea tsahan ônov vev tsusee, kwagh hemba nahan ga. Ikyav i tesen yô, George u yange i yese un ken tar ugen ken Afrika yô, kaa ér: “Hen ityô yam yô, uter mba numben vea ônov vev ga, sha ci u i tôô ér alaghga kwagh la una pande tahav mbu ter nan lu a mi sha uôn la. Sha nahan yô, ka i taver mo kpishi u gban teman vea wan wam imôngo tsô.”

HEN SHA KWAGH NE: Hen ityô you yô, i nenge ér gba u uter vea er nena sha kwagh u yesen ônovo? I tôô ér ka kasev i lu tom ve u yesen ônov yee? Mba kaan a uter ér ônov vev ve doo ve ishima shi ve eren kwagh a ve kundu kunduu, shin ior nenge ér ityôkyaa ngi ga?

Aluer u ngu ter, man u tagher a mzeyol shin mbamzeyol mba i ter sha heen ne nahan, u er nan ve u hemba mbamzeyol mba shono? Time ase sha mbamhen mba i dugh a mi ne.

Hii Shighe u Wan Wou A Lu Iyev La

Ikyav tese ér, isharen i mbayev ve lun a mi i kaven uter vev la ka i sha marami. Sha nahan yô, shighe u wan wou a lu iyev la je, eren akaa a nana kav u yô. U er kwagh ne nena? Man u zuan a shighe u lun imôngo vea na nena?

Hanma shighe u i gbe i doo cii yô, nôngo u eren ma kwagh u ú eren ayange ayange la vea wan wou imôngo. Ikyav i tesen yô, aluer u ngu eren akaa hen ya yô, kaa nan nana wase u. Wea lu esen tembe shin wea lu kahan kwagh yô, na wan wou u kiriki an-canca shin an-nduhar nana wase u. Sha mimi yô, a saan nan iyol kpishi u eren tom imôngo vea we, we u ú lu ter u nan, u nan nengen we ér orgen kuma sha a we ga shi u ngu or u veren nan ikyav i dedoo kpaa la! Adooga shighe u ú tôô u been tom shon la una wa lihen, nahan kpa u seer taver mlu wou vea wan wou la, shi u lu tesen un u eren tom kpoghuloo. Ngise la kpa, Bibilo taver uter asema ér akaa a ve eren ayange ayange la ve eren a vea ônov vev imôngo, shi ve lamen a ve, ve tesen ve sha ashighe shon kpaa. (Duteronomi 6: 6-9) Kwaghwan ne ngu a inja sha ayange ase ne kpaa.

Dugh u eren tom vea wan wou imôngo kera yô, numben vea na sha ashighe agen kpaa. Inumbe ia na ne msaanyol, kpa ka cii la ga, ia wase sha gbenda ugen kpaa. Kwaghtôvon ugen tese ér uter ka vea numben a mbayev vev shighe u ve lu iyev la yô, kwagh la a taver ve ishima u karen akaa a he, shi mciem ma bee ve iyol.

Inumbe i ter vea wan la shi ka i er tom u injaa ugen kpaa. Ortimenshaakaa ugen, iti na ér Michel Fize, a kaa ér: “Ka i hemba doon wanye u lamen a ter u nan shighe u ve lu numben imôngo yô.” Shighe u ter nan lu numben vea wan u nan la, ka nan tese wan u nan dooshima sha mkaan man sha ieren. Ka nana eren nahan yô, nan tesen wan u nan la kpa u lun a dooshima. Ter ugen ken tar u Jamani, mba yer iti na ér André, a kaa ér: “Shighe u wan wam lu iyev la, se numben imôngo sha ashighe kpishi. Yange m kuve un, nahan un kpa hen u eren a mo nahan.”

Shighe u yaven la kpa, ka shighe ugen u ter nana fatyô u seer taver dooshima u a lu hen atô ve la yô. Hanma shighe yô, ker ma kwagh u yange er yô ôr nan, shi kegh ato a nan, ungwa er nan lu pasen we akaa a a er ken sev mbura, a nan nan msaanyol, man a nyian nan ishima kpaa la. Aluer u ngu eren nahan yô, nana za hemen u ôron we akaa er nan lu vesen la.

Za Hemen u Eren Akaa a A Gbe Ne Cii Ishima La

Mbayev mbagenev mba lun anyom pue kar mba fe soon ér uter vev ve lam a ve ga. Aluer u nenge wer wan wou ngu ungwan we atô zum u ú lu pinen un kwagh je kpa, de kur ikyaa wer ma gbenda ngu u ú lam a na ga ze. Aluer u sôr gbenda u ú lamen a nan la yô, alaghga tsô una hemba keghen iyol u lamen a we gbar gbar.

Ter ugen ken tar u France, iti na ér Jacques, kpa yange i taver un u lamen vea wan na, Jérôme, ashighe agen. Nahan er ma kighir wan na ér a̱ lamen a na yô, a de a gema gbenda u yange lamen a wan na la; a gema gbidyen bor vea na imôngo. Jacques kaa ér: “Yange sea gbidye bor sea bee yô, se hide se shar inya, se mem kpuaa. Ashighe kpishi wan wam yange a hii u ôron mo akaa hen shighe la. Er yange se luun imôngo, shin de m kaa mer, er yange fa ér una fatyô u lun vea mo se uhar tseegh yô, kwagh ne na yô, se hemba lun kôôsôô cii.”

Kpa, aluer wan wou soo anumbe a eren ga di ye? André umbur a han zwa er un vea wan na yange ve  vihi ahwa kpishi sha u kenger asan tugh yô. André kaa ér: “Yange se ver mkônom ken won tugh shighe u i ndôhôr yô. Maa se tema se cir akondo iyol, se maan tii, se kenger asan sha kwavaôndo. Se gba lamen sha kwagh u Un u a gbe asan la. Shi se lam sha akaa a ase. Yange se nôngo u lamen sha hanma kwagh cii.”—Yesaia 40:25, 26.

Nahan kpa, aluer akaa a a doon wan wou u eren la doo u ga di ye? Aluer ka nahan yô, a gba u ú gema eren akaa a a doo u ishima ga la. (Mbafilipi 2:4) Orgen shin tar u South Africa, iti na ér Ian, a kaa ér: “Yange m hemba soon anumbe a eren a wan wam, Vaughan. Un hemba soon agirgi a purugh man kômputa. Kwagh ne na yô, mo kpa akaa ne gema doon mo, nahan m zaan a na sha u a za nenge anumbe a eren sha agirgi a purugh shi se gema eren anumbe a sha kômputa a sha agirgi a purugh. M nenge mer, er m gema eren akaa a doon Vaughan vea na imôngo yô, kwagh ne wase un u hemban lamen a mo gbar gbar.”

Wuese Nan sha Er Ishima a Taver Nan Yô

“Baba, nenge, nenge!” Í lu nahan wan wou u kiriki genger imo ôr kwagh nahan a we sha shighe u nan fe u eren ma kwagh u he vee? Aluer hegen wan wou la ngu anyom pue kar yô, shi nôngon ken igbar ér we u wuese un er ngise lu cuku ve eren nahan kpa? Alaghga nan kera eren nahan ga. Nahan kpa, gba u ú za hemen u wuese nan ve nana vese a hingir organden u dedoo ye.

Nenge ikyav i Yehova Aôndo iyol na a ver sha gbenda u yange er kwagh a wan na ugen la. Zum u shighe kuma u Yesu una hii icighantom na u shin tar la, Aôndo pase ken igbar er a doo un ishima yô, ér: “Ngun ka Wan Wam u ishima ishima, u i doom a Na yum yô.” (Mateu 3:17; 5:48) Jighilii yô, u ngu a tom u tesen wan wou shi tsahan un kpaa. (Mbaefese 6:4) Kpa u gem u keren aan a u wuese wan wou sha akaa a dedoo a a eren shi a ôron la kpa?

Nomso mbagenev yô, ka i taver ve kpishi u wuese or shi tesen dooshima kpaa. Alaghga yange ve vese hen icombor i mbamaren vev hemban veren ishima sha mbamtsum vev a u wuese iniôngon ve shio. Aluer we kpa ka hen imba tsombor la yange u vese yô, alaghga a gba u ú nôngo kwagh kpoghuloo u wuese wan wou sha er ishima ia taver un yô. U er kwagh ne nena? Luca, or u se vande ôron kwagh na ken ngeren ne la, yange nôngon u eren ityom i hen ya vea Manuel, wan na u lu anyom 15 la hanma shighe. Luca kaa ér: “Ashighe agen yange m kaa a Manuel mer a hii tom ugen iyol na, tsô aluer una soo iwasen yô, me va wase un. Ashighe kpishi yange a nôngo a er tom la iyol na. Yange una er u tsembelee una bee yô, a zua a mkom shi ishima i seer taver un kpaa. Yange mea nenge mer a er u tsembelee a bee yô, m wuese un. Zum u una er u tsembelee er a soo ér ma un er la ga kpa, m wuese un sha iniôngon na la.”

Kwagh ugen u shi u er ve wan wou una hemba lun a ishimataver yô, ka sha u wasen un u eren akaa a vesen a a we ishima u eren ken uma na la. Nahan kpa, aluer wan wou gema ngu eren akaa a a we ishima u eren ken uma la fele fele er u ver ishima la ga ye? Shin aluer akaa a dedoo a a we ishima u eren la, gema kaha kposo a akaa a we u soo wer ma a er la di ye? Aluer kwagh ngu nahan yô, alaghga a gba u u hide shi u hen sha ishimaveren you la. Jacques, or u se vande ôron kwagh na ken ngeren ne la, kaa ér: “Yange m nôngo mer me wase wan wam a tsua akaa a una fatyô u eren yô. Nahan cii kpa, m er kwagh sha ikyo i wan sha er akaa a a tsough u eren la aa lu akaa a sha ishima na, a lu a sha ishima yam ga yô. Nahan shi m umbur mer gba u una er kwagh u nôngon kuren mbaawashima nav mbara sha tahav nav.” Aluer u ngu keghen ato a wan wou, ungwan mbamnenge nav, shi wuese un sha kwagh u a er i doo, shi taver un ishima sha u hemba mbamyen nav kpaa yô, u wase un u eren akaa a á we ishima u eren ken uma na la.

Sha mimi yô, mlu wou vea wan wou una ban a mbamtaver man mbamzeyol ga. Kpa ken masejime yô, wan wou una hemba soon u lun ikyua a we keng je. Ka an je nana soo u lun ikyua a or u nan wasen nan u zan ikyura ken uma u nan ga?

[Ngeren u shin kpe]