Hen Kwagh Ken Mkaanem Ma Aôndo

Aôndo Ngu a Nongo Sha Ci u Nyi?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Aôndo yange kohol Mbaiserael cii hingir nongo môm sha ci u nyi?

Aôndo yange kohol ônov mba tertamen Aberaham ve hingir ikyurior shi na ve atindi kpaa. A yila ikyurior la ér Iserael shi na ve tom u kuran mcivir u mimi man Mkaanem nam, ma ma lu Icighan Ruamabera la. (Pasalmi 147:19, 20) Nahan akuraior a sha won cii zua a iveren.—Ôr Genese 22:18.

Aôndo yange tsua Mbaiserael lu mbashiada nav. Zum u vea ungwa imo i Aôndo yô, ve zua a mtsera ken atindi a na. (Duteronomi 4:6) Aluer se mba timen sha yiase i Mbaiserael la yô, se fatyô u seer fan kwagh u Aôndo u mimi la.—Ôr Yesaia 43:10, 12.

2. I kohol Mbakristu mba mimi cii hingir nongo môm sha ci u nyi?

Shighe kar yô, Aôndo venda Iserael, nahan Yehova gema ver nongo u Kristu sha ityough ki ikyurior i Iserael la. (Mateu 21:43; 23:37, 38) Cii man shighe la yô, Mbaiserael lu mbashiada mba Aôndo. Nyian kpa Mbakristu mba mimi mba eren shiada sha kwagh u Yehova.—Ôr Aerenakaa 15:14, 17.

Yesu yange kohol mbadondon un hingir nongo môm sha u ve er shiada sha kwagh u Aôndo shi ve gema akuraior cii a hingir mbahenen. (Mateu 10:7, 11; 24:14; 28:19, 20) Tom ne ngu zan u za kuusu hegen. Ka hiin je Yehova a kohol akuraior cii ken mcivir u mimi je ne. (Mpase 7:9, 10) Shi i kohol Mbakristu mba mimi cii hingir nongo môm sha er vea taver ayol a ve asema shi vea wasen ayol a ve yô. Mba tesen ve ityesen i môm ken Bibilo sha tar cii ken mbamkombo vev.—Ôr Mbaheberu 10:24, 25.

  3. Kwagh u Mbashiada mba Yehova yange hii sha shighe wase ne nena?

Nongo u Mbashiada mba Yehova mba sha shighe wase ne yange u hii ken kwavanyom u 1870 la. Annongo u mbahenen Bibilo hii u kaven mimi mba ken Bibilo mba ior kera fa kwagh ve ga ica i gba la. Ve fa er Yesu yange kohol nongo u Kristu sha u ve er tom u pasen kwagh yô. Nahan ve yôô angwe u Tartor u Aôndo sha ityar ityar. Mba ker ken inyom i 1931 yô, ve tôô iti i Mbashiada mba Yehova la.—Ôr Aerenakaa 1:8; 2:1, 4; 5:42.

4. I kohol Mbashiada mba Yehova cii hingir nongo môm nyian nena?

Sha derianyom u hiihii la, iniongo i Kristu ken ityar kpishi zuan a iwasen hen mbahemenev mba shin itine mba ve nenge Yesu ér ngu Ityough ki nongo na la. (Aerenakaa 16:4, 5) Nyian kpa, Mbashiada mba Yehova nenge Yesu ér ngu Orhemen ve. (Mateu 23:9, 10) Shi ka ve zua a iwasen sha gbendatesen u Mbahemenev mba Shin Itine, mba ve er tom u mbatamen ica i gbe la. Mbahemenev mban ka ve taver anmgbianev mba ve lu ken iniongo i Kristu i hemban er 100,000 la asema shi ve wa ve kwagh ken Ruamabera. Ken hanma nongo u Kristu cii, mba ve kom yô, mba eren tom u mbatamen, shin mbakuran. Ior mban mba kuran iyongo i Aôndo sha dooshima.—Ôr 1 Peteru 5:2, 3.

I kohol Mbashiada mba Yehova cii ve hingir nongo môm sha u ve pase loho u dedoo shi ve gema ior ve hingir mbahenen. Ka ve gema ityakerada i henen Bibilo a mi ken ijô i hemban er 500 nahan, maa ve gber i ve samber a mi, sha u vea wase ior hanma ijiir yô. (Aerenakaa 20:20) Ka ve na ayol a ve u henen Bibilo a ior mba kwagh u mimi a doo ve ishima tsung la. Er ior mba Yehova ve hembe veren ishima u eren ishima i Aôndo shi wasen mbagenev yô, mba ken msaanyol.—Ôr Pasalmi 33:12; Aerenakaa 20:35.

Wea soo u seer zuan a iwanger yô, ôr ityough 19 ki takerada u Bibilo Tese Ér Nyi Jimi? ne. Ka Mbashiada mba Yehova ve gber u ye.