Akaa A Van A Msaanyol Hen Tsombor

Shighe u Wan Wou u A Lu Hian a Hia la A Kera Soo Kwaghaôndo Wou Ga Yô

Mbayev kpishi ka vea vese yô, ve dondo kwaghaôndo u mbamaren vev la. (2 Timoteu 3:14) Kpa ka mbayev cii ve eren nahan ga. Shighe u wan wou u a lu hian a hia la a kera soo u dondon kwaghaôndo wou ga yô, doo u ú er nena? Ngeren ne una time sha kwagh u Mbashiada mba Yehova ka ve er sha ikyaa ne yô.

Wankwase ugen u lun anyom 18, iti na ér Cora, * a kaa ér: “M kera soo u dondon kwaghaôndo u mbamaren av la ga. Kam pe den kwaghaôndo ve shon.”

U NA jighjigh wer ka kwaghaôndo wou la a lu tesen ior mimi sha kwagh u Aôndo ye. Shi u na jighjigh wer ka Bibilo i tese gbenda u uma u hemban doon cii u or a dondo ye. Sha nahan yô, se kera lan er i hii ve u nôngon wer u tese wan wou u kiriki akaa a a gbe u ishima la ga. (Duteronomi 6:6, 7) Kpa er wan wou a lu vesen la, aluer kera gba un ishima u civir Aôndo ga di ye? * Aluer a hii u hunan atesen a yange lumun a mi a ishima i môm, shighe u lu yev la di ye?—Mbagalatia 5:7.

Aluer kwagh ngu zan hemen nahan yô, de kur ikyaa wer u er kwagh u i gbe u ormaren u nan lu Orkristu nana er la ga ze. Er i pase ken ngeren ne nahan, akaa agen kpa alaghga nga a a ne ve kwagh a lu nahan yô. Nahan kpa, fa wer, kwagh u ú er shighe u wan wou a lu hunan kwaghaôndo wou la una na yô, una seer hoghom iyol ken kwaghaôndo shon gayô una seer palegh un. Aluer u hingir ayôôso a wan wou sha ikyaa ne yô, u nôngo kwagh je, u puu tar ga. Shi alaghga iniôngon you la ia saa u dang.—Mbakolose 3:21.

Hemba doon u ú dondo kwaghwan u apostoli Paulu ne. A nger ér: “Kpa kpan u Ter yô, ka u nana̱ lu or u ayongo ga keng, kpa nana̱ lu sar sar a ior cii, nana̱ lu or u fan ityesen man or u wan ishima kpaa.” (2 Timoteu 2:24) U fatyô u tesen wer u ngu “or u fan ityesen” shighe u wan wou u hian a hia la, a hii u hunan kwaghaôndo wou la nena?

Fa Kwagh u A Lu Zayol u Wan Wou La

Hiihii yô, nôngo fa akaa a a alaghga a ne ve wan wou nan kera soo kwaghaôndo wou ga la. Ikyav i tesen yô:

▪ Huan nan, shi nan ngu a ijende ken nongo u Kristu ga shinii? Gumkwase ugen u lun anyom 19, mba yer iti na ér Lenore, a kaa ér: “Yange m soo u lun a azende, nahan m kôr ijende vea mbayevmakeranta  kpishi, kwagh ne gema yangem u kporom ikyua a Aôndo anyom imôngo. Kwagh u vesen u yange na ve kera gbam ishima u civir Aôndo ga yô, lu ujende mba bov mba m lu a mi mbara, nahan m vaa afanyô hegen kpishi.”

▪ Ka i taver nan u pasen kwagh u nan ne jighjigh a mi la sha ci u nan cie ashe shinii? Gumor ugen u lun anyom 23, mba yer iti na ér Ramón, a kaa ér: “Shighe u m lu ken makeranta la, i taver mo u pasen mbayev mba ken kelase wam akaa a m ne jighjigh a mi la. M lu cian mer vea va nenge ér mo m cimin inja shin vea gema yilan mo ér ‘anwan-Jehova.’ Mbayev mba yange vea lu kposo cii yô, i soo kwagh ve ga, nahan m soo mer imba kwagh la i erem ga.”

▪ Ka a nenge ér una kanshio u kuran atindiakaa a Mbakristu ve kor laa? Wankwase ugen u lun anyom 16, mba yer iti na ér Renee, a kaa ér: “Ka i lum inja er ityendezwa i uma u tsôron i Bibilo i er kwagh u i la ngi sha ityough ki woo, man m ngu a hii u unden tsô kpaa ga, shi i gba ica a mo kpishi nahan. Cier mo iyol kpishi u unden uwo ne, nahan kam ape undun jighjigh wam u nan.”

Lam a Wan Wou, Fa Ishima Na

Ka zayol u vesen u nyi nahan alaghga wan wou u a lu hian a hia la ka nan tagher a mini? Gbenda u u hembe doon u fan kwagh ne yô, ka u pinen nan! Wa ikyo sha er iliam yen la ia hingir anyiman ga yô. Kpa gema dondo kwaghwan u a lu ken takerada u Yakobu 1:19 ne. I kaa her ér: “Hanma or nana̱ lu tsev tsev sha u ungwan kwagh kpa nana̱ gema a̱ ngôôr a kwaghôron, nana̱ ngôôr a iyugh kpaa.” Nahan yô, wa ishima a wan wou. Er kwagh a na “sha ishima i wan tsung man sha ityesen kpaa,” vough er a lu or u hen tsombor wou ga kpa, ú er a nan nahan.—2 Timoteu 4:2.

Ikyav i tesen yô, aluer wan wou u a lu hian a hia or la kera soo u zan mbamkombo mba Mbakristu ga yô, nôngo fa aluer ma kwagh ngu zan un iyol yô. Kpa i̱ lu sha ishimawan. Ormaren u ken ikyav i í tese shin heen ne fatyô u wasen wan na ga.

Wan: Mo m kera soo u zan mbamkombo ga.

Ter: [sha tswam] U kera soo ga we nyi?

Wan: Ka kwagh ga, ve gba duen mo ishima tsô!

Ter: Kape i lu u ken ishima a Aôndo laa? Aôndo due u ishima zee? Ngula nahan ka nyi la! Fa wer, er u lu hen ya wase her yô, a gba u ú zaan a vese imôngo, wea soo shin wea soo ga kpaa!

Aôndo soo ér mbamaren ve tese ônov vev kwagh na, shi a soo ér ônov kpa ve ungwan imo i mbamaren vev. (Mbaefese 6:1) Nahan kpa, u soo wer wan wou a gbaa dondon we ityô zunguluu, zan mbamkombo mba Mbakristu tsô ga. Mayange u soo wer a zaan mbamkombo inja er i kighir un a kighir ga.

Aluer u fa akaa a a ne ve wan wou a lu eren kwagh nahan yô, u hemba fan er u wase un yô. Sha nahan yô, nenge ase gbenda u ormaren u ken ikyav i í tese sha heen ne una lam a wan na ve, ma i hembe doon yô.

Wan: Mo m kera soo u zan mbamkombo ga.

Ter: [sha imo i legh legh] Er nan ve u kera soo ga?

Wan: Ka kwagh ga, ve gba duen mo ishima tsô!

Ter: Sha kpôô yô, u teman ijiir i môm, ihwa jimin shin ahwa ahar la ka kwagh u una fatyô u duen or ishima yô. Kpa ka nyi jim ka i hemba taver we sha kwagh u mbamkombo?

Wan: M fa ga. Ka i lum er guda ma m za lu pe gen nahan.

Ter: Kape azende a ou kpa ka i lu a laa?

Wan: Mo m kera ngu a ijende ga, ka zayol wam m lu ôron we ye! Er ijende yam i ishima ishima la yange yem heen sha je, ka i lum er m kera ngu a or u lamen a nan ga nahan! Hanma or nan ngu ember a azende a nan. Kpa mo yô, huan mo je zua ga!

 Er ter ne a fe kwagh u a lu wan na ken ishima yô, a kav er zayol u wan na la i lu mtswenem yô; shi kwagh ne wase wan na la u seer lun a vangertiôr, nahan gbenda bugh u vea lamen hanma shighe yô.—Nenge ngeren u kiriki u a lu a itinekwagh ér  “Lu a Ishimawan!” la.

Shighe ka una va karen yô, agumaior kpishi a mase kaven ér aluer a hemba mtaver u a lu yangen ve u kporom ikyua a Aôndo la yô, ashighe kpishi ka i hemba saan ve iyol sha ci u mlu ve man jighjigh ve u nan la. Hide hen ase sha kwagh u Ramón, gumor u se vande teren kwagh na ken ngeren ne, u yange henen ér aluer un pase iyolna ken makeranta ér un ngu Orkristu ve una ya kunya la. Ramón yange va mase kaven ér, u lamen a mbagenev sha kwagh u un ne jighjigh a mi la ka kwagh u taver kpishi er yange un henen la ga, shin er ashighe agen i naha un tar nahan je kpaa.

Ramón kaa ér: “Sha shighe ugen la, wan ugen ken makeranta wam lu sen mo, nahan mo tar sha ci u kwaghaôndo wam. Nahan kunya kôrom a iyol yam kpishi, lum er mbayev mba ken kelase cii mba ungwan nahan. Maa m dan un kwaghôron, m pine un mer a pasem ase kwagh u kwaghaôndo na. Kwagh u kpiligh mo iyol yô, kunya gema hemba kôron un a mo cii! M mase kaven mer agumaior kpishi nga eren kwaghaôndo, kpa ve gema ve fa atesen a kwaghaôndo ve ga kuaa je. Kpa mo yô, atesen a kwaghaôndo di tsô yô me fatyô u pasen. Jighilii yô, ka mbayev mba ken kelase wam i lu u vea cia ashe u ôron kwagh u kwaghaôndo ye, ka mo ga!”

KAR KWAGH NE: Pine wan wou mnenge na sha kwagh u lun Orkristu la, er u fa ishima na yô. A hen ér ka mbamtsera mba nyi una zua a mi sha u lun Orkristuu? Man ka mbamtaver mba nyi una tagher a mini? Mbamtsera mba una zua a mi mbara hemba ngeen a mbamtaver shinii? Aluer ka nahan yô, a̱ pase u er i hii ve kwagh a lu nahan yô. (Marku 10:29, 30) Wan wou a̱ nger mbamnenge nav mbara sha kwatakerada, avegher ahar. Vegher u ken imese la, a̱ nger mbamtaver mba una tagher a mi mbara man vegher u ken yan la di a̱ nger mbamtsera mba una zua a mi la. Aluer wan wou nenge a akaa a á nger sha kwatakerada vough vough la yô, kwagh ne una wase un u fan kwagh u a lu zan un iyol la man er una sôr mzeyol shon kpaa.

“M-er u sha Inja” u Wan Wou

Mbamaren man mbatimen sha kwagh u uôn nenge ér gbenda u mbayev mba kiriki ve henen kwagh la kaha a gbenda u mbayev mba ve lu hian a hia ve henen kwagh la. (1 Mbakorinte 13:11) Mbayev mba kiriki mba henen kwagh ka ze ica ga, mba ve lu hian a hia mbara ka ve hemba henen kwagh zan shimi. Ikyav i tesen yô, a fatyô u tesen anye u kpuaa ér Aôndo yange gba akaa cii. (Genese 1:1) Nahan kpa, wan u a lu hian a hia yô, alaghga nana sendegh pinen mbampin amba er:  ‘Á er nan ve me fa mer Aôndo nguu? Er nan ve Aôndo u dooshima a de ér akaabo a ere? Hii nan u fe wer mimi je Aôndo ngu a mhii ga?’—Pasalmi 90:2.

Alaghga ú hen wer mbampin mba wan wou a lu pinen la mba tesen ér jighjigh na u nan ngu ndôhôr. Kpa jighilii yô, kwagh la tese ér ngu zan a za hemen. Kera kpa, gbenda u vesen u Orkristu nana fatyô u seer fan atesen a Bibilo yô, ka sha u pinen mbampin.—Aerenakaa 17:2, 3.

Heela tseegh ga, wan wou u a lu hian a hia la ngu henen u lun a “m-er u sha inja.” (Anzaakaa 3:21, 22) Kwagh ne una na yô, una kôrcio u kaven “igbanger man iniembe man mtav man mze” u jighjigh u nan u Mbakristu la, a hemba er wanye u cuku ma nan kav la. (Mbaefese 3:18) Ka hegen je i lu shighe u ú wase wan wou una er tom a m-er u sha inja na la sha u henen sha atesen a a ne jighjigh a mi la, sha er una lu a vangertiôr ken akaa a a ne jighjigh a mi la yô.—Anzaakaa 14:15; Aerenakaa 17:11.

KAR KWAGH NE: Hide time sha atesen a taver ga la vea wan wou, nenge nen sha atôakaa a alaghga we man un yange ne nengen a beelee la. U tesen ikyav yô, wase un u henen sha mbampin amba er: ‘Ka nyi i ne ve m ne jighjigh mer Aôndo ngu? Ka ikyav i nyi nahan m nenge a mi i tesen mo ér kwagh wam gba Aôndo ishima? Hii nan ve m nenge mer hanma shighe u m lu kuran atindi a Aôndo cii yô, me zua a mbamtseraa?’ Wa ikyo, de kighir wan wou wer a lumun a mbamnenge ou ga. Kpa gema wase un a lu a atôakyaa a suen jighjigh na la. Kwagh la una na a hemba lun un zange u lun a vangertiôr sha akaa a a ne a jighjigh la.

‘Tese Nan Nana Na Jighjigh’

Bibilo ôr kwagh u gumor Timoteu, u yange kav icighanruamabera “iyev je” la. Shi apostoli Paulu va seer wan Timoteu kwagh ér: ‘Lu ken akaa a i tese u, u ne a jighjigh la.’ (2 Timoteu 3:14, 15) Alaghga hii shighe u u mar wan wou la je, u hii u tesen un atindiakaa a Bibilo, er Timoteu kpa i tese un nahan. Kpa hegen er a lu vesen ne, a gba u u pase un a kuma un, sha er una lu a atôakyaa a suen jighjigh na yô.

Takerada u i yer ér, Questions Young People Ask—Answers That Work, Tihi u hiihii la, kaa ér: “Er wan wou a lu hen ya vea we her yô, u ngu a ian i kaan a na wer a̱ civir Aôndo a we imôngo. Nahan kpa, jighilii yô, awashima wou ka u nôngon wer Aôndo a doo wan wou u a lu hian a hia la ishima, a de eren akaa ne sha iyol tsô ga.” Aluer u ngu a awashima la yô, u fatyô u wasen wan wou u ‘tilen dông sha jighjigh u nan,’ sha er kwagh ne una hingir ieren na, a kera lu ieren you tseegh ga yô. *—1 Peteru 5:9.

[Ngeren mba shin kpe]

PINE IYOL YOU WER . . .

▪ Shighe u wan wam a lu hunan atesen a kwaghaôndo wam yô, doo u me er nana?

▪ Me dondo kwagh u i nger ken ngeren ne la sha u sôron gbenda u ka m er kwagh shighe u wan wam a huna atesen a kwaghaôndo wam la nena?

[Ngeren u kiriki u a lu sha peeji 19 la]

Mba Tsughun a Tsugh Ônov Vev Shinii?

Aie: Mbamaren mba ve lu Mbashiada mba Yehova yô, ka ve kighir ônov vev ér ve dondo kwaghaôndo ve.

Mimi: Mbamaren mba ve lu Mbashiada la ka ve nôngo ér vea tese ônov vev ve lu mba soon Aôndo, vough er Bibilo i kaa ér ve er nahan. (Mbaefese 6:4) Nahan kpa, ve fa ér shighe u wanye nan we ikyondo yô, a gba u nana tsua iyol i nan u civir Aôndo shin civir un ga.—Mbaromanu 14:12; Mbagalatia 6:5.

[Ngeren u kiriki/​Foto u sha peej 20]

 Lu a Ishimawan!

A gba u ú lu a ishimawan kpishi je ve, u kôrcio u lamen a wan wou u a lu hian a hia la ye. Kpa ka wea va nenge er wan wou a lu nan we jighjigh seer a seer yô, i doo u kpen kpen. Wankwase ugen u lun anyom 16, kaa ér: “Tugh mbugenegh mbura, m kaa a terem mer m ngu a ijiir sha Intanet i lamen a ior her, shi m ngu a ishiôr, shi m wa ishima u gban toho kpaa. Terem wa ishima a mo shighe u m lu ôron un akaa ne vough vough la! M ngu a fa ter u wan u nan u kwase nana kaa a nan ér, nan suse wannomso ugen zwa, shi nan tindin wannomso la a ilyoho sha hanseeti hanma shighe ve, ter la nana tema ving nana lu ungwan, a u zôhôn a nan shio nahan ga. M nenge mer me fatyô u ôron terem hanma kwagh cii. M fa mer mimi je a soo u wasen mo.”

[Ngeren u kiriki u a lu sha peeji 21 la]

Iwasen i Orwankwagh

Ashighe agen agumaior nga a zua a iwasen zum u organden u hen tsombor ugen nan wa nan kwagh yô. U fa or shin kwase u nan civir Aôndo kpoghuloo, u nana fatyô u taver wan wou u nan lu hian a hia la ishima yôô? Er nan u er nan wer nana̱ tema imôngo a wan wou ga? Awashima wou yô, ka u geman tom wou u yesen wan wou la nan nan ga. Kpa, hen ase sha kwagh u Timoteu. Timoteu yange lu ijende i Paulu, nahan a zua a iwasen kpishi ken ikyav i Paulu ver un la, Paulu kpa zua a iwasen kpishi ken ikyaryan ve la.—Mbafilipi 2:20, 22. *

[Ngeren u shin kpe]