Bibilo Gem Ior

LU NYI i mgbegha orgen u kahan sule u taav u den tom laa? Shi lu nyi i mgbegha un ve undu akaa a a na jighjigh a mi ken kwaghaôndo na taveraa laa? Kwase ugen u msôrom ya tor ken a na yô, yange zua a tahav mbu den ieren ne nena? Ôr ase kwagh u ior mban ve pase ne.

“Doom kpishi er m lu môm ken zege tsombor ne yô.”​—DINO ALI

I MAR UN KEN INYOM I: 1949

TAR NA: AUSTRALIA

INJAOR I YANGE LU YÔ: OR U KAHAN SULE U TAAV

YIASE YAM: Mbamaren av yange ve mough ken tar u Albania ken inyom i 1939 la, ve za tema twev hen Mareeba, anijiir ugen ken kpentar u Queensland, ken tar u Australia. Ior kpishi mba ve lu marnya u tar u Italia man Serbia man Bosnia man Grika yô, kua mba ken ityar igen kpaa, ve mough ve va tema twev hen ijiir ne. Yange ve va a aeren a ityô ve man mbaadini vev, kua akaa a ve tsweren man a ve tsweren ga la kpaa. Mareeba lu anijiir u ior kahan sule u taav her yô. Nahan mbamaren av kpa hii taav u kahan.

Ica kera gba ga je maa i mar anngôm u kwase, shi ve cir ônov mba nomso uhar sha a na, maa ve masem. Kwagh gema er vihi yô, shighe u m lu inyom i môm la, Terem kpe angev mbu shimav. Ngôm hide vôso nom ugen shi mar ônov mba nomso unyiin. Nom u ngô wase yange vôso ne, kaha sule u taav, koso se zan zan se cii se kar vesen.

Yange m undu ya shighe u m lu anyom pue kar la. M poson anyom 20 yô, m vôso Saime. Er se cii se lu Mbamusulumi yô, se za er ivese ken Masaranci u u lu hen ijiir ne la. Anmgbianev av cii lu Mbamusulumi. Yange m ôr Koran kua takerada ugen u u pase yiase i profeti Muhamadu yô. Shi m lu ôron Bibilo i cuku igen hen shighe ne kpaa. Koran pase kwagh u uprofeti mba i er kwagh ve ken Bibilo la, nahan Bibilo i m lu ôron la wasem u fan shighe u ve lu uma la.

Mbashiada mba Yehova mba yange ve vaan hen ya wam hanma shighe la, naan se umagazin man ityakerada, i i doo Saime man mo u ôron yô. M umbur er yange se tema se lam sha akaa kposo kposo a kwaghaôndo a doon mo kpishi yô. Hanma shighe u mea pine mpin cii yô, Mbashiada mban ve nam mlumun shin ve pasem mkav ve ken Bibilo, ve kera har sha mbamnenge vev ga. Kwagh ne bende a mo kpen kpen.

Mbashiada soo ér vea hen Bibilo a mo, nahan  ve lôhôm mbamkombo vev, kpa hanma kwa u vea lôhôm cii yô, m venda u zan. Kwagh u hemba lun mo sha ishima hen shighe ne yô, lu u ma m tser zege tsombor shi ma m lu a sule wam. Sule yô hembam u lun a mi, kpa ken masejime yô, m hingir ter u lun a ônov utaan mba doon mo ishima.

GBENDA U BIBILO GEMA UMA WAM LA: Er m zua a Mbashiada mba Yehova, anyom kar ataankaranyiin nahan je kpa, m lu a ta akaa a m na jighjigh a mi ken kwaghaôndo wam la kera ga. Nahan cii kpa, i doom u ngohol ityakerada i ve gber la ôron. Hanma Lahadi yô, Saime man mo se tôô shighe se ôr ityakerada ne. Umagazin mba yange se ngohol ken anyom a karen la cii, se koso ve her. Akaa a i nger ken umagazin mbara wasem u tilen dông shighe u mbagenev hii u karen jighjigh wam u lu vesen a vese la.

Ikyav i tesen yô, yange m tagher a or u pasen ivangeli ugen u nôngo wener una kighir mo m ngohol Yesu a hingir Oryiman wam yô. Or u pasen ivangeli ne kôrcio u geman wonom man anmgbian wam ugen u sha ngô u dondon un. Ica i gbe ga yô, mba yange m fa ve ve zaan ukwaghaôndo mbagenev yô, gba nôngon ér vea gemam m zaan ukwaghaôndo mba ve kpa ve zaan la. Mbagenev nam ityakerada i i ôr akaa dang sha Mbashiada mba Yehova yô. M nyiman kwagh a ve mer akaa agen a i er sha Mbashiada mbagenev la aa lu a mimi je kpa, akaa a Mbashiada ve tesen la har sha Bibilo. M pine mba m lu nyiman kwagh a ve mban mer ve tesem ken Bibilo er i hii ve ve lu tesen ior atesen a ve la, kpa ve fatyô u nan mbamlumun sha mbampin av ga.

Ahendan ne cii na yô, m seer timen ken Bibilo zan shimi, shi ityakerada i m ngohol hen Mbashiada la wasem u seer tôvon sha akaa fan. Ken masejime yô, m va kav mer shighe kuma u me er sha kwagh u m lu henen la.

Mbashiada mba Yehova hen Bibilo a mo ga; m gba hiin u zan mbamkombo vev tsô. Sha hiihii la, ashe a cian lu ken a mo kpishi, kpa m zua a ior kpishi mba lun sar sar ken mbamkombo mbara, shi kwagh u m lu henen la doom. Yange m kange ishima mer me hingir môm ken Mbashiada mba Yehova, nahan mba ker ken inyom i 1981 yô, m tsegha iyol yam hen Aôndo, i erem batisema.

Kwase wam hendan a mo sha kwagh u m tsua u eren ne ga, nahan kpa ashighe agen a hen ér i tsughum a tsugh. Nahan cii kpa, iyange i i lu eren mo batisema la lu her. M za hemen u pasen un akaa a mimi kpishi aa m lu henen la. Yange m eren batisema inyom i môm kar yô, Saime pasem isharen i lu a mi u hingir Kwaseshiada la, shighe u se za memyol, se lu nahan mato hiden sha gbenda la. Kpiligh mo iyol je m nôngo u tumen a mato ken toho! Mba ker ken inyom 1982 yô, i er un batisema.

U geman uma wase lu kwagh u kiriki ga. Yange m de u kahan taav sha ci u ieren ne hendan a atindiakaa a Bibilo. (2 Mbakorinte 7:1; Yakobu 2:8) Shighe wa karen cii je ve m va mase zuan a tom u i doo u Orkristu nana er, u u lu van mo a inyaregh ki kuren mbamgbe asev ye. Shi yange se mba hingir Mbashiada yô, anyom kar kpishi je kpa, anmgbianev asev mbagenev venda u van se inya. Kpa se lu nôngon ser se dondo atindiakaa a Bibilo la sha u tesen ve dooshima. Ken masejime yô, se va hemba kwagh u lu van a mpav hen atô wase  la, nahan anmgbianev asev kera lu nyaghen se ga.

IWASEN I M ZOUGH A MI LA: Yange m ya atsan atô kposo kposo, kpa mhembe u m hemba ashe a cian man ishimanyian i sha kwagh u inyar kua ahendan a mba hen tsombor la, tesem er Yehova Aôndo a we ishima a mo sha u wasen mo nôngon a mbamzeyol av yô. Ikyav i tesen yô, hegen m ngu eren tom u ortamen ken tiônnongo, nahan ashighe kpishi ka i gba u me tesen mbagenev sha tsembe. Tom u tesen mbagenev ne kpa m ngu a mtaver ker, sha ci u er m cie ashe yô, ka m eren ikyeen. Kpa er m gbe uwer sha msen u eren ga, shi Yehova a lu nan mo iwasen yô, ka m kôrcio u eren tom u i nem ne.

Mo man kwase wam se mba kangenaa, man mlu u se lu kôôsôô hegen la doo je gande. Shighe u se lu yesen mbayev asev la, se er akaa agen sha lan, kpa se nôngo sha afatyô wase cii se tese ve akaa a mimi a se hen ken Bibilo la. (Duteronomi 6:6-9) Kwagh er doo yô, wan wam u vesen vea kwase na mba eren tom u mishen.

M umbur kwagh ugen u yange er shighe u mo vea tsombor wam se hii u zan mbamkombo mba Mbashiada mba Yehova ica lu a gba ga la. Yange se mba nyer, se mba veren mato yô, se hungwa se kenger ikpelaior i i lu ken mkombo la. Nahan m pine tsombor wam mer, “Ka nyi ne nenge a mini?” Ior mba ve lu ken mkombo ne la due sha ajiir agen shi aeren a ityô ve kpa kaha shi ve lamen ijô kposo kposo; mbagenev lu marnya u tar u Australia man Albania man Croatia, mbagenev di lu ior mba i yer ve ér Aboriginals la. Nahan cii kpa, ve lu imôngo saan saan. Doom kpishi er m lu môm ken zege tsombor u anmgbianev av mba kasev man mba nomso mba ken Kristu, mba ve lu ken tar u Australia tseegh ga, kpa ve lu sha tar cii ne yô.—1 Peteru 5:9.

“Anmgbian wam u kwase yina ishima a mo mayange ga.”​—YELENA VLADIMIROVNA SYOMINA

I MAR UN KEN INYOM I: 1952

TAR NA: RUSSIA

INJAOR I YANGE LU YÔ: MSÔROM YA TOR KEN A NA SHI A NÔNGO ÉR UNA WUA IYOL NA

YIASE YAM: Yange i marem hen Krasnogorsk, gar u kiriki ugen, u ayôôso lu her ga yô. Gar ne lu ikyua a gartamen u Russia u i yer ér Moscow la. Ior mba hen tsombor u m vese her la kpishi lu atica. Yange m lu wanyemakeranta u fan takerada, nahan i tesem atsam a wan man ityogholov mbi kuhwan ken makeranta. Shi lu inja er mlu wam u ken hemen una doo nahan.

Yange m eren ivese yô, mo man nomom se mough se yem hen ijiir igen ape ior tuhwan kwagh shi hunden msôrom shi maan taav kpoghuloo yô. Hen shighe ne m lu a kav er ijiir ne vihi mlu wam vindi vindi nahan ga. Sha hiihii la, m zaan mbamtem sha u za wan atsam, kuhwan jita di tsô. Nahan kpa mea zaan yô, ior ve lôhôm ér m va ma taav man msôrom vea ve imôngo. Ica gba ga je tsô maa msôrom ya tor ken a mo.

Msôrom ma ma ya tor ken a mo ne hii u vihin uma wam. Shighe kar kpishi cii je ve uma wam vihi njighe njighe ye, kpa kwagh ne yange eren mo yô, m kera faantyô u yan kwagh môm ga. Yange ku sarem, nahan m nôngo mer me wua iyol yam, kpa m kanshio. Ka mea hide mea hen sha kwagh ne nahan, m lu a iwuese er yange m wua iyol yam ga nahan.

 Shighe u akaa ne lu eren la, anmgbian wam u kwase vaan mo inya hanma shighe. Yange hingir môm ken Mbashiada mba Yehova, nahan á nôngo a pasem er Bibilo ia fatyô u wasen mo yô. Kwagh u Bibilo doom ga, nahan sha hiihii la m soo mer a de u van mo inya. Kpa anmgbian wam u kwase yina ishima a mo mayange ga. Yange tesem dooshima tsung shi wa ishima a mo kpishi je, nahan ken masejime yô, m lumun mer i hen Bibilo a mo.

GBENDA U BIBILO GEMA UMA WAM LA: M hiin Bibilo i henen yô, m kange ishima mer me de msôrom ma man. Hen shighe ne, orgen u wa ndor a mo yô, kôrom gbidye coholoo shighe u ma msôrom lu hunden yô. I tôôm i yem a mi ken iyouci sha ci u m vihi iyol kehelee. Ahan am anyiin kever, shi ishe yam kpa vihi. Nahan kpa, mtse u m tsa ken iyouci la wasem shighe u m de msôrom ma man ve ma hide ma sarem kpishi la.

Hen shighe ne, m eren msen hanma shighe cii. Kwagh u i nger ken Ukwelegh 3:55, 56 la yange surum ishima kpishi. Ijiir la kaa ér: “M yila sha iti You, TERE, shin ihyungwa i zan. U ungwa imo yam; de kera cirin togh Ough sha u ungwan iôôn yam man mliam am kpaa ga.”

M na jighjigh mer mimi je Yehova yange ungwa mbamsen av. A nam agee m de u eren akaa a ngise m eren la. Ashighe agen i sarem tsung u hiden hiin kwaghman. Saan mo iyol u kaan mer mayange je m kera hide m gba ken imeen la ga.

Er m za hemen u henen Bibilo la, m kav mer gba u me sue nomom ken tom na u lun ityough hen tsombor la. (1 Peteru 3:1, 2) Lum heghema u eren kwagh ne ga, sha ci u yange m henda nomom hoghol mo. M er msen hen Yehova mer a wasem. Yange tôôm shighe gôgônan u geman inja, kpa tegh tegh tsô, m hingir kwase u injaa, u suen nom.

Kpiligh nomom u doon mo ishima ne iyol er nenge m gema inja yô. Hen shighe ne je kpa, lu a soo kwagh u Bibilo ga. Kpa m tsough u den taav u man yô, a kaa ér: “Aluer u de taav yô, mo kpa me hii Bibilo i henen!” Se cii maa se de taav u man iyange i môm.

IWASEN I M ZOUGH A MI LA: Nomom yange hii Bibilo i henen, er tôndo zwa nahan. Shighe kar yô, se cii se er batisema, se hingir Mbashiada mba Yehova. Hegen ka se tema se ôr Bibilo imôngo hanma iyange, shi ka se pasen ior kwagh sha uya uya hanma shighe shi se wasen mbagenev u kaven loho u u lu ken Bibilo la.

Uma wase doo hegen je gande ôron. Mtsera u mo iyol yam m zough a mi la je yô, ka u kera teren a ter ga. M wuese Yehova kpishi er a urugh mo a ve a mo ikyua a na yô. (Yohane 6:44) Shi m wuese anngôm u kwase kpishi, er yange yina ishima a mo mayange ga nahan. Sha nahan yô, m fa iyol yam mer mimi je Bibilo gem uuma mba iorov.

[Mkaanem ma sha peeji 11 la]

M va kav mer shighe kuma u me er sha kwagh u m lu henen la

[Mkaanem ma sha peeji 13 la]

Anmgbian wam u kwase yange tesem dooshima tsung shi wa ishima a mo kpishi, nahan ken masejime yô, m lumun mer i hen Bibilo a mo