Er U Nôngo a Uma Shighe U Inyaregh Ki U Zough a Mi la Ki Pande Yô

ORGEN u i yer un ér Obed yô, ka ter u a lu a ônov uhar yô. Yange er tom hen hôtel u taver ishe hen zege geri ugen ken Afrika kuma anyom pue, shi lu a zayol sha gbaa u kuren mbamgbe mba tsombor na ga. Ashighe agen a mough vea tsombor na ve yem memyol sha u za nengen annyamev ken akô a i tsegha ken tar na yô. Kwagh ne cii va bee shighe u i de un tom sha ci u ior kera lu zan hen hôtel ne kpishi ga yô.

Orgen u i yer un ér Stephen yô, yange er tom hen zege banke ugen hemba anyom 22, nahan ken masejime yô, a hingir orvesen hen banke la. Mbamtsera mbagenev mba zua a mi sha tom na la yô, lu zege iyou man mato man mbashiren un tom hen ya, shi a wa ônov nav ken ikyumen makeranta. Zum u banke la hii u geman gbenda u mbatomov eren tom her la yô, i de un tom kpoo. Stephen kaa ér: “Mo man tsombor wam cii yange hura se iyol kondo. Yange ishima nyian mo shi vihim kpishi shi mciem gbam iyol.”

Ambaakaa ne er ior kpishi. Er kwagh u inyar a lu taver seer a seer tar sha won cii yô, ior umiliôn imôngo mba yange ve lu a ityom i i kimbin ve inyaregh hanma shighe la kpa, i gber ve ijembe. Mbagenev kpishi mba ve nôngo ve zough a ityom kpa mba kimbin ve inyaregh er ma i kimbi ve la ga, man akaa gema nga taver ishe seer a seer. Aluer tar ngu a kwagh a ve shin ngu a mi ga kpa, ma tar u ican i inyar i bende a u ga yô, ngu ga.

Gba u Se Eren Kwagh sha Kwaghfan

Aluer se mba eren tom kpa inyaregh ki i kimbin se la gba ikyev ga, shin i de se tom yô, se fatyô u ngôôr yinan ishima ga. Ka mimi, or a fatyô u yangen ishimanyian sha ma kwagh vindi vindi ga. Nahan kpa, orfankwagh ugen yange kaa ér: “Aluer ú gba uwer sha iyange i ican yô, agee ou vese ga.” (Anzaakaa 24:10) Shighe u se tagher a ican i inyar yô, se de ser ishima i nyian se ga, kpa a gba u se er kwagh u Mkaanem ma Aôndo ma kaa ne, ér: “Waan kwaghfan u mimi ikyo.”—Anzaakaa 3:21.

Shin er Bibilo i lu takerada u tesen se kwagh u inyar ga nahan kpa, kwaghwan u injaa u i we sha ambaakaa angara nahan la wase ior umiliôn imôngo tar sha won cii. De se time sha akaawan a hange hange agen, a Bibilo i ne la.

Fa inyaregh ki i gbe u ú vihi yô. Time sha mkaanem ma Yesu ma i nger ken Luka 14:28 ne: “Ka anti ken a ven a lu nan ka maan gôgôyou u taven sha, nana kera tema nana vande ôron inyaregh ki maan a mi la ga, sha u nana fa shin nan ngu a kwagh u nana kure i a min kpaou?” Aluer se soo u dondon kwaghwan ne yô, a gba se fa inyaregh ki i gbe u se vihi yô, shi se vihi a hemba er se we ishima la ga. Kpa er Obed a nenge nahan, ka i lu ican kpishi u eren kwagh ne. A kaa ér: “Cii man i dem tom yô, yange se yam akaa ken supamakeete kpishi a kwagh a gba se sha mi keng ga yô. Yange se faan inyaregh ki i gbe u se vihi cii ve se zaan kasua ga, sha ci u se lu a inyaregh ki se fatyô u yamen nyityôkwagh i se soo cii.” Aluer se vande fan inyaregh ki i gbe u se vihi sha ma kwagh yô, se fatyô u vihin annyar u cuku u se zuan a mi la sha mbamgbe mba hen tsombor mba hange hange.

Gema gbenda u u eren akaa ken uma la. Ka i taver u i hoghol or u eren akaa ken uma akuma akuma je ka u tunan ga, kpa gba u a lu nahan keng. Injakwagh igen ken Bibilo kaa ér: “Orfankwagh ka nan nenge a kwaghbo, nan yer, kpa mbalanenkwagh yô, ka ve kar, ve za ya ican.”  (Anzaakaa 22:3) Stephen kaa ér: “Yange m mough a tsombor wam, se za nyôr ya wase u i lu a bee tom ken atô na tsembelee ga, shi hemba ndahar a ya u banke na se la, sha er se pande inyaregh ki vihin yô. Yange gba u me musan mbayev av makeranta me za wa ve ken imakeranta i hiden ishe ijime, i ityesen i her kaha a imakeranta i taver ishe la ga yô.”

Aluer tsombor soo ér ua za ikyura shighe u ú gem gbenda u ú eren akaa ken uma la yô, saa mba hen tsombor la vea lamen ayol a ve gbar gbar. Orgen u i yer un ér Austin, u yange er tom vea banke ugen kuma anyom ataankaranyiin cii ve i mase den un tom yô, kaa ér: “Mo man kwase wam yange se tema se nger akaa a kwagh a gbe se sha mi jim jim la shin inya. Yange gba u se pande u vihin inyaregh sha akaayan a taver ishe, shi zan umemyol mba vihin inyaregh kpishi la, shi se de u gban humbur yamen akondo a he tsô la. Saan mo iyol kpishi er yange tsombor wam lumun u eren akaa a se nyôôso ken uma wase ne nahan.” Ka mimi, alaghga mbayev vea kav wang er i hii ve i gba hange hange u a nyôôso akaa nahan ga, kpa ne mbamaren ne fatyô u wasen ve u kaven kwagh ne.

Kegh iyol u eren ityom i he. Aluer u ngu or u ú er tom u ken afishi i hoghol we yô, alaghga a lu u er tom u haan iusa iyol ua za u kera ga nahan. Austin kaa ér: “Er yange m er tom hen zege kômpeni ugen sha aan kposo kposo a m hemen ior la hoghol mo yô, taver mo kpishi u lumun ityom i ikyoo ga.” Kpa taver se u kaven kwagh ne ga sha ci u Bibilo kaa ken Anzaakaa 29:25 ér: “Mcie u cian or ka a va a kwaghhônon.” Aluer hanma shighe u ngu henen sha kwagh u alaghga mbagenev vea lu henen la yô, u fatyô u zuan a inyaregh ki koson tsombor wou ga. Ka nyi ia wase u ve u hemba mhen u kpee nee?

Kwagh u vesen yô, ka u hiden a iyol ijime. Zum u i de Obed tom hen hôtel u yaren her la yô, orgen u ngise ve er tom ijiir i môm yô na un tom hen kômpeni na u sôron umato. Tom ne yange u wa u zenden a ngahar yemen ica sha ugodobi mba lun a ihyundu, sha u nôngon zuan a penta u tan sha mato kua ikyav mbi matoo mbigenev. Obed kaa ér: “Er tom ne doom ga nahan kpa, kwagh ugen lu u me er ga. Iyol i hiden a mi ijime wasem u lumun tom u inyaregh ki i kimbin mo sha mi la ki yen sha kwagh u ngise i kimbin mo sha tom wam u tse la ica je yô, kpa kwagh u i kimbin mo hegen ne kuma u kuren mbamgbe mba tsombor wam.” Imba mnenge ne ia fatyô u wasen we kpa?

Kwagh a kuman we. Dikishenali igen pase ér or u kwagh u kuman nan yô, ka or u i “saan nan iyol sha mimi shi mlu u nan a kom nan” yô. Or u ican i inyar i ker nan kpishi yô, alaghga nana nenge ér kwagh ne ka mimi ga. Nahan kpa, time ase sha mkaanem ma apostoli Paulu, ormishen u yange fa kwagh u a lu u lun ken ibanave la. A kaa ér: “Mo yô, hanma inja i mlu i m lu sha mi cii kpem iyol a mi, hoghor mo iyol a mi kpaa. U lun ken ican kpaa m fa, u ngeen a kwagh wuee kpaa m fa.”—Fil. 4:11, 12.

Alaghga mlu wase una lu guda, kpa ken ashighe a akaa a lu geman ne, mlu wase una fatyô u hemban vihin gban kera cii. Aluer se wa ikyo sha kwaghwan u Aôndo yange mgbegha Paulu nger ne yô, a wase se kpishi, a nger ér: “U civir Aôndo man kwagh a kuman we yô, mtsera ngu sha mi vese. Kpa aluer sea lu a kwaghyan man akondo yô, i̱ kuma se.” Paulu lu ôron kwagh ne sha u taver se asema ér se lu mba wan hwev ga, kpa lu sha u tesen se ér akaa a kwagh a gbe se a mi la a de lu kwagh u hiihii ken uma wase ga.—1 Tim. 6:6, 8.

Kwagh u a Ne Msaanyol u Mimi La

Ka u ombon akaa a se soo cii shi teman ken mkpeyol la a ne msaanyol u mimi ga. Yesu iyol na yange kaa ér: “U nan a na kwagh hembe saan iyol a u ngohol a ngohol kwagh.” Ka mimi, se mba zough a msaanyol man mkom sha u wasen mbagenev sha akaa a se lu a mi la shi taver ve ishima.—Aer. 20:35.

Yehova Aôndo u a gbe se la fa akaa a kwagh a gbe se a mi la cii. A wa se kwagh ken Bibilo i i lu Mkaanem nam la, u a wase ior kpishi u zan ikyura ken uma ve shi kera lun a ishimanyian sha akaa a a lu a hange hange ga la yô. Ka mimi, kwagh ne una fatyô u been or ican i inyar kpoo ga. Kpa Yesu yange kaa a mba ve vanden ‘keren tartor u Aôndo man perapera Na’ la ér, akaa a kwagh a gbe ve a mi ayange ayange la cii a na ve.—Mat. 6:33.