Hen Kwagh Ken Mkaanem Ma Aôndo

Gba u Se Yilan Aôndo sha Iti Na sha ci u Nyi?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Aôndo na iyol na iti sha ci u nyi?

Ka u hemba soon wer i yilan we sha iti you, a u i yilan we sha atiatom er “nomsoor” shin “kwase” la nahan je ka u tunan ga. Iti ka i wase u fan mkposo u orgen a ugen. I yila Aôndo sha atiatom amba ér “Ter Aôndo” shin “Aôndo Uhembanagee” shin “u A gbe u la” nahan. (Genese 15:2; 17:1; Orpasenkwagh 12:1) Kpa shi a na iyol na iti sha u wasen se u yan ikyar a na. Iti i Aôndo ken zwa Tiv ér Yehova.—Ôr Ekesodu 6:3.

Shin er mbageman Bibilo kpishi ve dugh iti i Aôndo ken Ubibilo vev kera, ve gem ve we atiatom er “Aôndo” man “Ter” nahan kpa, iti la ngi ken ngeren u tse u sha ave u ken zwa Heberu la nôngo u kuman kwa 7,000. Aôndo soo ér ior ve fa iti na je ka u tunan ga.—Ôr Yesaia 12:4.

2. Hii nan ve u fan iti i Aôndo la i lu kwagh u hange hange?

U fan iti i Aôndo la hemba di u fan er i yer i tseegh tsô la. Inja i u fan Aôndo sha iti la yô ka u yan ikyar a na kangenaa. Inja i iti i Aôndo i Yehova la yô ér “Ne Kwagh Lu.” Iti la ka ibumun i tesen ér Aôndo una hingir nyityôkwagh i i gbe u una lu cii sha u kuren awashima na. Nahan u fan iti i Aôndo la tese ér u na jighjigh wer Aôndo una kure uityendezwa nav. (Pasalmi 9:10) Jighjigh u nan u ior mba ve fe iti i Aôndo shi ve yer sha mi la, ngu a mgbegha ve u suur sha na shi veren un hiihii ken uma ve. Yehova Aôndo una kura ambaaior la.—Ôr Pasalmi 91:14.

  3. Aôndo soo ér i fa iti na sha ci u nyi?

Aôndo soo ér ior ve fa un sha iti na sha ci u kwagh ne una lu ve a iwasen. Kwagh ne ngu a wase ve ve hingir ijende i Aôndo, nahan ve lu a ishimaverenkeghen i va lun uma gbem sha won. Nahan kera taver se er i hii ve Yehova a soo ér i pase ior iti na la ga.—Ôr Yohane 17:3; Mbaromanu 10:13, 14.

Yesu yange pase ior iti i Aôndo sha u tesen ve igbenda na man atindi a na kua uityendezwa nav. Nyian ne mbadondon mba Yesu mba eren tom u pasen ior iti i Aôndo la sha tar cii. Mba eren kwagh ne ken mzough sha ci u mba ‘nongo sha ci u iti Na.’—Ôr Aerenakaa 15:14; Yohane 17:26.

4. Aôndo una na iti na icivir nena?

Yehova Aôndo soo u nan iti na icivir sha ci u i laha i. Ikyav i tesen yô, ior mbagenev kaa ér ka un a gbe uma ga shi gba u se ungwan imo na kpaa ga. Mbagenev kaa ér kwagh gba un sha kwagh wase ga, shi ka un a ne se lu yan ican ye. Ambaaior la nga vihin Aôndo iti. Kpa vea er nahan gbem sha won ga. Aôndo una tim mba ve ne iti na icivir ga la.— Ôr Pasalmi 83:17, 18.

Yehova una na iti na icivir shighe u Tartor na ua tim hemen u uumace cii kera shi ua va uumace a bem man mkpeyol la. (Daniel 2:44) Ica a gba ga tsô, hanmaor nana fa er Yehova a lu Aôndo u mimi yô.—Ôr Esekiel 36:23; Mateu 6:9.

Gba u ú er nyi? Kporom hen Aôndo sha u henen Mkaanem nam shi kohol imôngo vea ior mba a doo ve ishima la. Shighe u Yehova una na iti na icivir la, una umbur mba ve civir un sha mimi la.—Malaki 3:16.

Wea soo u seer zuan a iwanger yô, ôr takerada u Bibilo Tese Ér Nyi Jimi?, ityough 1, ka Mbashiada mba Yehova ve gber u ye.

[Foto u sha peeji 26]

Iti i Aôndo ken ngeren u ken zwa Heberu u tsuaa ugen