“Ior i Tar ne Ga”

“Tar kôr ve ihyom, sha ci u ve lu ior i tar ne ga yô.”​—YOHANE 17:14.

Inja i Mkaanem Man: Er Yesu lu or u tar ne ga yô, yange wa ave sha ayôôso a ityôô man a patii a sha ayange a na la ga. A kaa ér: “Tartor Wam ua lu u shin tar ne yô, mbayev Av ma ve nenge ityav sha u i̱ de nem sha ikyev i Mbayuda ga yô; kpa hegen yô, tartor Wam ka u heen ga.” (Yohane 18:36) Shi yange wa mbadondon un kwagh ér ve nyagh mbamhen man iliam man aeren a Mkaanem ma Aôndo ma vende la.—Mateu 20:25-27.

Er Mbakristu Mba sha Ayange a Tsuaa Mbara Er Kwagh u Yesu Kaa Ne Yo: Orgen u ngeren akaa a sha kwagh u kwaghaôndo, u i yer iti na ér Jonathan Dymond yô kaa ér Mbakristu mba sha ayange a tsuaa mbara yange ve “venda [ityav] mbi nôngon; ve cian ma kwagh u ieren ve ne ia va ve a mi ga, a lu u a naha ve tar shin a wuhe ve ken purusu shin a wua ve je kpaa.” Yange ve tsua ér guda vea ya ican a u ve wan ave sha akaa a taregh la. Shi atindi a ve a sha kwagh u ieren i wang la kpa na ve lu kposo a tar. Yange i kaa a Mbakristu ér: “Gema ka kpiligh ve iyol er ne kera nyer nongo a ve ken ijimba i eren i ganden ikyaa inya la, ga yô; mba gbe lamen sha a ven dang tsô.” (1 Peteru 4:4) Or u timen sha akaa a Mbayiase ugen u i yer un ér Will Durant yô nger ér Mbakristu yange ve “lu nan ior i tar ne, mbafanaôndoga, mba kwagh u iemberyolough doo ve kpishi la ican sha jighjigh ve u nan man ieren ve i wang la.”

Ka Unô Ve Eren Kwagh Ne Nyiana? Takerada u i yer ér New Catholic Encyclopedia la puu ieren i Mbakristu i wan ave sha akaa a taregh ga la wang nahan ér: “Aluer or venda u tôôn ikyagh ki tswamegh yô, ka shami ga.” Ngeren u ken ipipaabaver i i yer ér Reformierte Presse la kaa ér mzough u nengen sha kwagh u ian i hanma orumace nan lu a mi i eren kwagh u nan soo, u i yer ér African Rights la tese ér “dugh Mbashiada mba Yehova sha” yô, ucôôci mbagenev ken tar u Rwanda cii yange ve wa ave sha atemtyo u yange er ken tar shon ken inyom i 1994 la.

Er tica ugen u tesen ken kôleeji lu lamen sha kwagh u Mbanazi yange ve wua Mbayuda kpishi ken Ityav mbi Tar Cii mbi sha II la yô, a toghor iyol ér “ma nongo shin mzough u ior mba ve lu marnya u tar u gomoti u Mbanazi lu hemen la bugh zwa venda mbaaie man ipila kua caveraa u i lu eren a Mbayuda la ga.” Yange za tim sha kwagh ne hen ijiir i i tsen akaa a tesen ior kwagh u Mbanazi ken tar u Amerika, i i yer ér United States Holocaust Memorial Museum la yô, a nger ér: “Hegen yô, wanger mo ve.” A kav er yange Mbashiada mba Yehova tile sha jighjigh u nan ve her dông, shin er i er a ve caveraa nahan kpaa.

Hide sha kwagh u atindi a ve a sha kwagh u ieren i wang la di ye? Ipipaabaver i í yer ér U.S. Catholic la kaa ér: “Agumaior a ken kwaghaôndo u Katoliko kpishi venda atesen a Côôci, er kwagh u nomsoor man kwase lun imôngo a u vôson ayol a ve shio [kua] kwagh u yaven a or shighe u ú lu a er ivaa ga la nahan.” Ipipaabaver la ôr mkaanem ma diakon u côôci igen ér yange kaa ér: “M nenge yô, ior kpishi ka ve vande lun imôngo er kwase a nom nahan cii ve ve va mase eren ivaa ye.” Takerada u i yer ér The New Encyclopædia Britannica la kaa ér Mbashiada mba Yehova mba “dondon atindi a sha kwagh u ieren i wang la her taveraa.”