“M Pase Iti You”

“M pase iti You hen ior mba U tsough ve shin tar ne, U nem la. . . . M pase ve iti You; Me shi Me pase ve i kpaa.”​—YOHANE 17:6, 26.

Inja i Mkaanem Man: Yesu yange pase iti i Aôndo sha u teren i ken tom na u pasen kwagh. Shighe u Yesu una ôron Ruamabera yô, er hanma shighe eren nahan, alaghga tsô yange a yilan sha iti i Aôndo. (Luka 4:16-21) Yange tese mbahenen nav ér ve eren msen ér: “Tere, i̱ tsegha iti You.”—Luka 11:2.

Er Mbakristu Mba sha Ayange a Tsuaa Mbara Er Kwagh u Yesu Kaa Ne Yo: Apostoli Peteru yange kaa a mbatamen mba ken Yerusalem ér Aôndo dugh ‘nongo ken atôatyev sha ci u iti Na.’ (Aerenakaa 15:14) Mbaapostoli man mbagenev pase kwagh kaa ér “hanma or u nan yer sha iti i Ter yô, nana war.” (Aerenakaa 2:21; Mbaromanu 10:13) Shi yange ve yar tom a iti ne ken ngeren vev. Takerada u i nger atindi a Mbayuda ker, u i yer u ér The Tosefta, u yange i gber u i bee er ken inyom i 300 nahan la, ôr kwagh sha kwagh u ngeren mba Mbakristu mba mbaahendanev vev lu nanden la, ér: “Yange i nande ityakerada i Mbaivangeli man i ior mba i yer ér Minim [mba i hen ér ka Mbayuda mba yange ve lu Mbakristu] la. Yange i de í ér i̱ hia ape í ver í la, . . . í kua ajiir a i ter Iti i Aôndo ker la cii, hia kera.”

Ka Unô Ve Eren Kwagh Ne Nyiana? Ngeren u hiin Bibilo i Revised Standard Version, i mzough u ucôôci mba ken tar u Amerika, u i yer ér National Council of the Churches of Christ in the United States yange gber la kaa ér: “U yilan Aôndo u môm môm la sha iti na inja er mbaaôndo mbagenev mba, mba i gbe u a tese ér ngu kposo a ve la, lu kwagh u i de u eren ken Kwaghaôndo u Mbayuda la cii man shighe u Kristu yô, nahan aluer Mbakristu mba sha tar cii mba yilan sha iti la yô, a lu shami ga kuaa.” Sha nahan yô, i dugh iti i Aôndo ken Bibilo ne kera, i gema i wa ititom i “TER” la sha ajiir a i gbe u ia lu la. Semberee ne, Poopu kaa a ubishôp nav ér: “I de yer Aôndo sha iti na, i lun a asangaabaacaa anyiin, i yer ér Tetragrammaton, i gem ér YHWH * la ken atsam shin mbamsen ga.”

Ka unô ve yer Aôndo sha iti na shi ve pasen ior i nyiana? Shighe u orgen ken tar u Kyrgyzstan, u i yer iti na ér Sergey lu anyom 15 la, a nenge fiim igen i i tese ér iti i Aôndo ka Yehova yô. Anyom kar kuma er pue nahan je kpa, a kera kimbir ungwan iti Aôndo la ga. Sergey va moughon yemen ken tar u Amerika, shighe kar yô, Mbashiada mba Yehova uhar za hen ya na za tese un iti i Aôndo ken Bibilo. Sergey fe ér nongoior ngu u ú yer Aôndo sha iti na i Yehova la yô, doo un kpishi. Kwagh er doo yô, takerada ugen u pasen asember, u i yer ér Webster’s Third New International Dictionary la pase inja i ishember i “Jehovah God” (“Yehova Aôndo”) la ér “ka aôndo u hemban cii u Mbashiada mba Yehova ve fe un, shi i lu un tseegh ve civir yô.”

[Ngeren u shin kpe]