Kporom Hen Aôndo

Ne Mba Ve Civir Un la Cii Injar

KA AN je ve a kaa a nan ér “M sugh u” sha tom u dedoo shin iyua i nan er a ishima i môm la ve a vihi nana? Se cii ka se soo ser ior ve wuese iniôngon yase, hemban je yô mbadoon se ishima. Nahan kpa, Yehova Aôndo wase hemba doon se ishima cii. Nahan wuese iniôngon yase i civir un la kpa? De se time ase sha igbenda i yange er kwagh a Ebedimeleki, u na uma na sha u yiman môm ken uprofeti mba Aôndo la.—Ôr Yeremia 38:7-13 man 39:16-18.

Ebedimeleki lu ana? Ikyav tese wang ér yange lu or u eren tom ken ya u Tor Sedekia, u tar u Yuda. Ebedimeleki lu uma sha shighe u Yeremia, u Aôndo tindi un ér a ta Mbayuda mba ve ban a jighjigh la icin sha mtim u lu van ken hemen la. Shin er atiator a fan Aôndo ga kase Ebedimeleki tser nahan kpa, un cian Aôndo shi naan Yeremia icivir kpishi. Aeren a dedoo a Aôndo, a Ebedimeleki lu a mi la, yange i kar a tsung shighe u atiator a bo wa Yeremia aie iyol ér a hemba tor ato, nahan ve kende un shin ijôr i lun a angbiôr, ér a kpe ijen la. (Yeremia 38: 4-6) Ebedimeleki una er nena?

Ebedimeleki yange er kwagh sha kwagh ne fese, a mciem shio, á cia kwagh u dang u atiator la aa a er a na ga. Yange za lam a tor ken igbar, gba ijir sha kwagh u dang u i er a Yeremia la. Alaghga je yô, lu dughun uwegh sha mbaaferev mbara, kaan a tor ér: “Ior mban ve er kwaghbo . . . a profeti Yeremia.” (Yeremia 38:9) Sedekia lumun a kwagh u Ebedimeleki ôr la, nahan a na un zwa ér a za a ior mbagen ve za yima Yeremia.

Ebedimeleki tese ieren i dedoo igen kpaa, ka erdoo je la. A tôô “ajav a ikyondo man abamber a ikyondo a anden shimin, a iligh sha ikyor, a kende . . . za ar hen Yeremia.” Ebedimeleki yange er tom a ajav a ikyondo man abamber a ikyondo sha ci u nyi? Sha er a nguren duen a Yeremia shin ijôr i lun a angbiôr ne yô, ikyor i de tsulen un ken ihyan biin, sôngon un avav ga.—Yeremia 38:11-13.

Yehova nenge a kwagh u Ebedimeleki er la. A wuese kwagh ne kpa? A ôr a Ebedimeleki sha ikyev i Yeremia ér mtim u tar u Yuda zurum. Aôndo tôndo zwa a Ebedimeleki ér a lu nyi je ia er kpa una yima un kpee, a bunde ga. Yehova kaa ér: “Me yima u . . . Á na u sha ikyev i ior . . . ga. Me yima u kpee je, ú kpe ku u sha sanker ga . . . Uma wou una hingir we er ka ishar u ye yô.” Yehova yange tôndo zwa ér una yima Ebedimeleki sha ci u nyi? Yehova kaa a na ér: “Sha ci u u suur sha a Mo yô.” (Yeremia 39:16-18) Yehova yange fa ér kwagh u Ebedimeleki er la lu sha ci u kwagh u Yeremia gba un ishima tseegh ga, kpa shi lu sha ci u a na Aôndo jighjigh shi a suur sha a na kpaa.

Kwagh u Ebedimeleki ne tese se wang ér Yehova wuese kwagh u ka se er sha u civir un la. Bibilo pase se wang ér umbur kwagh u hemban ndahar, u ishima yase i mgboughon a jighjigh u nan ka i mgbegha se u eren ken mcivir na la je kpaa. (Marku 12:41-44) Kwagh ne mgbegha u u̱ kporom ikyua a Aôndo u a wuese mba ve civir un la ga he? Aluer ka nahan yô, fa wer una er kwagh u Mkaanem nam ma kaa ér ngu la, ér: “Un ne mba ve lu keren Un la injar.”—Mbaheberu 11:6.