Akaa A Van A Msaanyol Hen Tsombor

U Hiden Nan Ayol A En Jighjigh

Steve *: “Yange m hen mer a tsa kpa Jodi una ér idya ga. Kpa va eren idya yô, m kera na un jighjigh ga kuaa. Me fatyô u pasen er yange taver mo kpishi u den un a kwaghbo la ga.”

Jodi: “M fa er yange hii ve Steve kera nam jighjigh ga yô. Kpa yange tôôm anyom kpishi u tesen un mer m vaa afanyô.”

BIBILO na ian ér or u kwase u nan, shin kwase u nom u nan a er idya yô, nana soo yô, nana pav ivaa. * (Mateu 19:9) Steve u se er mkaanem nam sha heen ne, yange tsuwa ér una pav ivaa ga. Yange Steve man Jodi cii lumun ér vea kura ivaa ve. Nahan kpa, ica gba ga tsô ve kav er u eren nahan la, i lu di u vea za hemen u lun imôngo la tseegh tsô ga yô. Sha ci u nyi? Ityôkyaa yô, er mkaanem vem mara ma tese nahan, idya i Jodi er la yange i vihi jighjigh u ve na ayol a ve la. Er i lu hange hange u nom man kwase vea na ayol a ve jighjigh ve, a saan ve iyol ken ivaa ve yô, yange gba u ve cii vea nôngo kwagh kpoghuloo sha er vea hide a na ayol a ve jighjigh yô.

Aluer we man or u u vese la, ne mba nôngon ner ne kura ivaa yen shighe u ne tagher a zayol u vesen er idya nahan yô, tese ér ne tagher ishigh a zayol u vesen je ka u tunan ga. Zum u u ongo wer kwase wou shin nomou er idya yô, ka i taver we kpishi u wan ishima ken iwer imôngo i i hii karen la. Kpa u fatyô kuran ivaa you. Ne er nan ve ne hide ne na ayol a en jighjigh? Kwaghfan u a lu ken Bibilo la una wase ne. Time ase sha mbamhen unyiin mba i dugh a mi shin heen ne.

1 Eren Nen Kwagh a Hanmô Wen sha Mimi. Apostoli Paulu nger ér “Dugh nen aie kera, hanma or nana̱ ôron kwagh sha mimi.” (Mbaefese 4:25) Mbaaie mba eren man u ôron mimi jighilii ga kua u den iliam a or la je kpa ngu a vihi jighjigh u nom man kwase ve ne ayol a ve la. Nahan gba u nom man kwase vea lamen ayol a ve gbar gbar man sha mimi.

 Sha hiihii la, alaghga ishima ia vihi we man or u vese nan la kpishi a gande u ne tema ne lam sha kwagh u idya i mô wen nan er la. Nahan kpa, ken masejime yô, a gba u ne lam sha kwagh u a er la sha mimi. Alaghga ne tsua ner ne lam sha hanma kwagh vindi vindi ga, kpa u geman ungwan ato ving la yô, ka shami ga. Jodi u i er mkaanem nam sha mhii u ngeren ne la kaa ér: “Sha hiihii la, taver mo kpishi u lamen a nomom sha kwagh u idya la shi kunya kôrom a iyol yam kpishi. Yange m vaa afanyô sha kwagh la kpishi shi m soo mer kwagh shon a duen ken ishima sha.” Nahan kpa, u lun kwagh na ving la gema va a mbamzeyol. Sha ci u nyi? Steve kaa ér: “Er Jodi soo u lamen sha kwagh u idya na la ga yô, kwagh na za hemen u shin mo.” Jodi hidi henen sha kwagh ne yô, a kaa ér, “Er m lu lamen a nomom sha kwagh ne ga yô, taver se kpishi u sôron zayol la.”

Shighe u nom vea kwase ve lu lamen sha kwagh u idya i mô ve nan er yô, ka keng ishima ia doo ve ker ga. Kwase ugen u i yer un ér Debbie, u nom na, Paul er idya a kwase ugen, u lu a akawe u Paul yô kaa ér: “Yange m lu a mbampin kpishi mba pinen sha kwagh ne. Kwagh ne yange er nena? Lu nyi i na ve kwagh er nahana? Lu nyi ve lamen sha mini? Hanma shighe yô, m lu zunguluu, m henen sha kwagh ne, shi ukasua kar imôngo je kpa, m za hemen u pinen mbampin her.” Paul kaa ér: “Ashighe agen iliam yam vea Debbie yange i va due ken ayôôso. Kpa hanma shighe yô, se hide se na anyi a yan ken masejime. Akaa a yange se ôron sha mimi la wase se u seer lun kôôsôô.”

U er nan ve u pande ishimavihin shighe u ú lu lamen a ikyar u we? Umbur wer awashima wou jighilii yô, ka u tsahan nomou shin kwase wou u nan er idya la ga, kpa ka u henen kwagh ken kwagh u vihin u a er la shi seer nyôôso ivaa yen la. Ikyav i tesen yô, orgen u i yer un ér Chul Soo man kwase na, Mi Young yô, yange ve gbidye kwar sha kwagh u ivaa ve shighe u Chul Soo er idya yô. Chul Soo kaa ér: “Yange m kav mer m hemba wan akaa a am ikyo tseegh yum. Shi yange hemba gban mo ishima u eren akaa a aa na a doo mbagenev a mo la shi eren akaa a ve soo ér m er la. M lu hemban nan shighe wam shi veren ishima sha kwagh ve. Nahan m luun vea kwase wam hanma shighe ga.” Kwagh u Chul Soo nenge a mi ne wase un kua kwase na Mi Young u den akaa agen ken uma ve, nahan ken masejime yô, kwagh ne wase ivaa ve la hide doo.

KAR KWAGH NE: Wea lu nom shin kwase u ú er idya yô, palegh u keren ishô shin nan ikyar u ibo la. Lumun ibo sha kwagh u ú er la kua ishimavihin i u ne ikyar u a nyer ker la. Aluer u ngu nom shin kwase u ikyar u nan er idya yô, de zôhôn a nan genger genger shin tuhwan nan ga. Aluer u palegh u lamen a nan nahan yô, kwagh ne una taver nan ishima, nahan nana za hemen u lamen a we gbar gbar.—Mbaefese 4:32.

2 Eren Nen Kwagh ken Ijoughave. Bibilo kaa ér: “Guda uhar a u môm.” Sha ci u nyi? “Sha ci u mba a injar i dedoo sha tom ve u sha ican. Gadia aluer vea gba kpaa, u môm nana kôr ugen nan mough a nan sha.” (Orpasenkwagh 4:9, 10) Shighe u ú lu nôngon kpoghuloo wer ne hide ne na ayol a en jighjigh yô, u hemba nengen wer kwaghwan la ka u mimi.

Aluer we man ikyar u ne mba eren kwagh ken ijoughave yô, ne fatyô u hiden nan ayol a en jighjigh ken ivaa yen. Nahan kpa, gba u ne cii ne tese ner gba ne ishima u kuran ivaa yen. Aluer hanma wen nan ngu nôngon a zayol la nan tswen yô, nana lu seer a seer zayol sha zayol. Gba u ne nenge ayol a en ner ne mba akar.

Ka kwagh u Steve man Jodi yange ve kav je la. Jodi kaa ér: “Kwagh ne yange tôô shighe, kpa mo vea Steve se zua ave sha u se sôr ivaa yase i taver. Yange m kange ishima mer mayange me kera er kwagh u vihin un imba la nahan ga. Shin er ishima lu vihin Steve ker nahan kpa, mayange soo ér se pav ivaa yase ga. Hanma iyange yô, m ker igbenda i me nôngo a fa er m lu eren kwagh a na sha mimi yô, nahan un kpa za hemen u tesen ér mo m doo un ishima. Me wuese un sha kwagh ne gbem sha won.”

KAR KWAGH NE: Nôngo sha u we man ikyar u ne hide ne na ayol a en jighjigh ken ivaa yen la sha u eren kwagh ken ijoughave.

3 De Aeren A Ou A Tse La. Yesu yange te ior mba ve lu ungwan a na mbara icin sha  kwagh u idya been kera yô, a wa kwagh nahan ér: “Man aluer ishe you i ken iyan ia na u anzughul yô, dugh i, ta kera.” (Mateu 5:27-29) Aluer u ngu nom shin kwase u ikyar u a er idya yô, u nenge a aren a i gbe u ú de sha ci u ivaa you la kpa?

Sha mimi yô, gba u ú de u zan ikyua a orgen u ú er idya a nan la. * (Anzaakaa 6:32; 1 Mbakorinte 15:33) Paul u se vande ôron mkaanem nam la yange gema shighe u tomough na kua namba u hanseeti na sha er una de iliam a kwase ugen u er idya a na la yô. Nahan cii kpa, iniôngon la wase un u den iliam a kwase u a er idya a na la kareghaa ga. Paul yange kange ishima ér una er kwagh u kwase na una hide a na un jighjigh yô, nahan a de tom u lu eren la. Shi a ta hanseeti na kera, nahan a gema lamen a ior sha hanseeti u kwase na tseegh. Ican i Paul ya sha u una nôngo a de u lamen a kwase ne la wase je he? Kwase na, Debbie, kaa ér: “Er anyom ateratar a kar nahan kpa, ashighe agen ishima ka i nyian mo er kwase la una ker gbenda u hiden lamen a nomom nahan. Kpa hegen yô, m na jighjigh mer Paul una gba ken imeen la ga.”

Aluer ka we u er idya yô, shi alaghga a gba u ú gema inja. Ikyav i tesen yô, alaghga a lu ikye you i hian a or shin alaghga u ngu or u ka u shi henen sha kwagh u yaven a orgen yô. Aluer kwagh ngu nahan yô, “dugh tseor kua aeren a na la [ken a we] kera.” De aeren a ou a tse la, gema lu aeren a he, a a wase ikyar u una seer nan we jighjigh yô. (Mbakolose 3:9, 10) Gbenda u yange i yese u la na yô, ka i taver we u tesen dooshimaa? Aluer sha hiihii la taver we u eren nahan je kpa, tese or u u vese nan la dooshima kpishi shi wase nan nana de kera luun a ishimanyian ga. Steve kaa ér: “Ashighe kpishi Jodi ka a tesem dooshima sha u kôron mo uwegh, shi hanma shighe yô, ngu a kaa a mo ér ‘u doom ishima.’”

Pase ikyar u hanma kwagh sha kwagh u ityom i u eren ayange ayange la shighe a wa karen. Mi Young u se vande teren kwagh na la, kaa ér: “Chul Soo yange kange ishima u ôron mo hanma kwagh u a er un sha hanma iyange cii, kua akaa a ikyoo ga je kpaa, sha u nôngon tesen mo ér un ngu a kwagh môm u yeren mo ga.”

KAR KWAGH NE: Pine nen ayol a en akaa a ne er ve alaghga a wase ne u hiden nan ayol a en jighjigh la. Nger akaa shon shin inya, shi er a kpaa. Heela tseegh ga, seer ityom i ka i doo ne u eren imôngo la sha ityom i u eren ayange ayange la.

4 Fa Shighe u ú Hungur a Zayol Wen La. De kur ikyaa fese wer, shighe kuma u ne hide ne lu inja er yange kwagh za ne iyol ga ze. Anzaakaa 21:5 wa kwagh ér: “Hanma or u nan tolough kwagh yum yô, ka ken ibanave nan lu zan ye.” Alaghga a tôô shighe shin anyom imôngo je ve ne hide ne na ayol a en jighjigh ye.

Aluer kwase wou shin nomou er idya yô, fa wer shighe a kar cii ve u fatyô u den nan a kwaghbo u nan kpum kpum ye. Mi Young kaa ér: “Yange m hen mer aluer kwase nan de nom u nan u a er idya la a kwaghbo ga yô, a lan ishima kpishi. Taver mo u kaven er a hii ve ishima ia vihi nan ker ica ia gba yum nahan la. Nahan kpa, shighe u nomom va er kwagh a mo sha mimi ga la, m mase kaven er i hii ve ka i taver u den or a kwaghbo yô.” U den or a kwaghbo shi hiden nan nan jighjigh la, alaghga a lu kwagh u kure kure.

Nahan cii kpa, Orpasenkwagh 3:1-3 kaa ér, “shighe u maan” ngu. Sha hiihii la, alaghga u nenge wer hemba doon u yeren nomou shin kwase wou a kwagh u a lu ken ishima la. Nahan kpa, u eren nahan zan zan la una wase u u hiden nan ikyar u jighjigh ga. Cii man ne hide ne maa ivaa yen yô, gba u ú de ikyar u a kwaghbo shi u tese sha ieren you wer u de un kwaghbo sha u ôron un akaa a ken atô ishima you la. Shi taver un ishima wer a pase u mbamgbe nav man akaa a a ne un msaanyol la.

De henen sha akaa a a na ishima ia hemba vihin we ker la ga. Nôngo kpoghuloo de ishimavihin. (Mbaefese 4:32) Aluer u gbidye kwar sha ikyav i Aôndo iyol na a ver la yô, a wase u. Shighe u Mbaiserael mba sha ayange a tsuaa mba ve civir Aôndo la gema ijime a na yô, ishima vihi un ker  kpishi. Yehova yange tôô iyol na kar sha kwase shin nom u ikyar u nan a er kwagh a nan sha mimi ga la. (Yeremia 3:8, 9; 9:2) Nahan kpa ‘ishima vihi un zan zan gbem ga.’ (Yeremia 3:12) Shighe u ior nav gema ishima sha mimi hide hen a na la, a de ve kwaghbo ve.

Shighe a karen, ne cii ne faan ner ne er akaa a i gbe hange hange u ne er ken ivaa yen la yô, ishima ia gba ne shimi. Nahan er ma ne lu hemban veren ishima sha u kuran ivaa yen tseegh la yô, ne fatyô u veren ishima sha akaa agen kpaa. Aluer kwagh ngu nahan je kpa, ver nen ashighe a hiden gbidye kwar sha mzehemen wen. De haan nen iyol inya ga. Sôr nen mbamzeyol mba kiriki shi tese nen ner kwagh u hanma wen gba ne ishima.—Mbagalatia 6:9.

KAR KWAGH NE: U nôngon ner ivaa yen i hide i lu er yange i vande lun la yô, gema tôô nen ner, ne ya ikyar i he i ne lu maan sha u i taver yô.

U Fatyô u Zan Ikyura

Aluer ashighe agen taver we u nan jighjigh wer u za ikyura yô, umbur kwagh ne: Ka Aôndo yange hii kwagh u ivesegh ye. (Mateu 19:4-6) Nahan sha iwasen na yô, u fatyô u zan ikyura ken ivaa you. Noov man kasev mba i ter kwagh ve ken ngeren ne la cii, yange ve dondo kwaghwan u injaa u ken Bibilo la, nahan ve fatyô u kuran ivaa ve.

Zayol u Steve lu a mi vea Jodi ken ivaa ve la bee anyom kar hemba 20 hegen. Steve pase gbenda u yange ve tôô u sôron zayol u ken ivaa ve la ér: “Ka er yange Mbashiada mba Yehova hii u henen Bibilo a vese nahan ve, se hemba zan ikyura cii ye. Iwasen i yange se zua a mi la gande u ôron. Sha nahan yô, se hemba ashighe a ican la.” Jodi di kaa ér: “Saan mo iyol kpishi er yange se fatyô u wan ishima hen shighe u vihin tsung la nahan. U henen Bibilo imôngo kua tom u se er taveraa la na yô hegen ivaa yase hide doo je gande.”

[Ngeren mba shin kpe]

PINE IYOU YOU WER . . .

▪ Ka atôakyaa a nyi yange na ve m kura ivaa yam shighe u kwase wam shin nomom er idya laa?

▪ Ka aeren a dedoo a nyi ikyarem u yange er idya la a lu a mi hegene?

▪ Shighe u mo man ikyarem se lu sôôr ayol a ase la, yange m tese un dooshima sha igbenda i kiriki nena, man me fatyô u hiden eren nahan nena?