Tese Ônov Ou

Yange Taver Ityough Kpa ken Masejime yô A Ungwa Kwaghwan

MA SHIGHE ngu u yange u taver ityough shi u venda u ungwan kwaghwan yôô?— * Alaghga yange u nenge kwagh ugen sha televishen, u ngôu shin teru kaa ér u de nengen ga yô. Alaghga tsô yange u hide u hen sha kwagh shon ken masejime nahan u vaa afanyô er u hembe ato yô. Iti i orgen u yange venda kwaghwan sha hiihii yô ér Naaman. De se nenge ase er yange i wase un ve kera taver ityough ga yô.

Tôô ase wer yange se lu uma anyom hemba 3,000 ken ijime. Naaman lu kurutya u shoja i tar u Shiria. Ka un yange ôron ushoja nav kwagh u vea er ye, shi ve ungwan un kpaa. Nahan kpa, Naaman gema gba bouange u sha kwavyolough u i yer ér imande la. Imande la na un hingir iyol dang, man a shi nan kpa imande ne yange i nyoon un tsung kpaa.

Kwase u Naaman lu a wankwase u eren un tom hen ya, u due ken Iserael yô. Iyange igen yô, wankwase ne pase kwaseya ne kwagh u or u i yilan un ér Elisha, u lu ken tar na la. A kaa ér una fatyô u been Naaman angev. Naaman ongo kwagh ne yô, fese je a soo wener una za kohol Elisha. A tôô uiyua kpishi, maa a er zende vea ushoja nav ve yem ken Iserael. A za kohol tor u Iserael sha er una pase un er i hii ve un ve yô.

Elisha ungwa kwagh ne, nahan a tindi loho hen tor ér a kaa Naaman a va hen a na. Naaman za nyer hen ya u Elisha yô, Elisha gema tindi wanakiriki na ér a za kaa Naaman yô, a za ôô iyol shin Ifi u Yordan kwa taankaruhar. Elisha kaa ér aluer Naaman er kwagh ne yô, imande na ia  bee. U hen wer shighe u i kaa a Naaman ér a za ôô iyol shin Ifi u Yordan kwa taankaruhar la, yange lu un nena?—

Ishima yange i vihi un ker. A taver ityough, a venda u ungwan imo i profeti u Aôndo. A kaa a ushoja nav ér: ‘Uifi mba dedoo mba ken tar wam mba me ôô iyol shimi yô.’ Naaman maa kôr gbenda inya yemen. Kpa u fa kwagh u ushoja nav gema pine un kpa?— ‘Aluer profeti una kaa ér u̱ er ma zegekwagh je yô, ma u er ga shinii? Nahan er nan u kera ongo imo na, u er kwagh u kiriki u a kaa ér u er ne ga?’

Naaman ungwa ushoja nav shi er kwagh u ve kaa un la. Tsô a gba tsuwen gban shin ifi la shi duen zan zan kuma kwa ateratar. Naaman gbe shimi sha kwa u sha taankaruhar la dugh yô, kpiligh un iyol, sha ci u angev nav mbu sha kwavyolough mbura bee! A hingir wang! Ave ave la je, a er zende u kuman ukilomita 48, a hide a yem hen ya u Elisha sha u za sughun un. A soo u nan Elisha uiyua mba taver ishe, kpa profeti ne lumun u ngohol kwagh môm hen a na ga.

Naaman maa sôn Elisha kwagh. U fa kwagh u yange sôn un la kpa?— A sôn ér ‘Nam inya i kuma ikyav mbi alfadari uhar m yem a mi hen ya wam.’ U fa er yange hii ve soo ér i na un inya la kpa?— Naaman yange kaa ér un soo u nan Aôndo nagh sha inya i hen tar u Mbaiserael, mba ve lu ior mba Aôndo la. Naaman maa tôndo zwa ér mayange una kera civir ma aôndo ugen ga, saa Yehova! Yange de ityough ki taver, hingir u ungwan imo i Aôndo u mimi la.

U nenge er u fatyô u lun er Naaman nahan kpa?— Aluer u taver ityough er un nahan yô, we kpa u fatyô u geman inja. U fatyô u lumun iwasen i a na u la, nahan u de ityough ki taver.

Ôr ken Bibilo you

2 Utor 5:1-19

Luka 4:27

[Ngeren u shin kpe]