Aôndo Soo Ér I Eren Kwagh a Kasev sha Icivir

SHIGHE u Yesu lu shin tar la, eren kwagh vough er Ter na u sha la nahan. A kaa ér: “M gbe eren ma kwagh sha tahav Av iyol Yam ga, kpa M er akaa er Ter A tesem yô . . . M eren akaa a doon Un gbem.” (Yohane 8:28, 29; Mbakolose 1:15) Sha nahan yô, aluer se time sha gbenda u Yesu eren kwagh a kasev shi nengen ve la yô, se kav gbenda u Aôndo a nengen kasev la, shi se kav akaa a a soo ér ve eren la kpaa.

Mbatimen sha akaa a Bibilo kaa ér kwagh u i nger ken ityakerada i Ivangeli la tese ér, gbenda u Yesu nengen kasev la kaha kposo a gbenda u ior nengen ve sha shighe na la. U kaha kposo nena? Man nyian kpa, ityesen i Yesu la tese ér kasev mba a icivir shi mba sha kwarkyaa er nomso nahan nena?

Gbenda u Yesu Eren Kwagh a Kasev La

◼ Yesu nengen kasev ér i gba ve sha u nomso ve yaven a ve tseegh ga. Mbahemenev mba kwaghaôndo u Mbayuda mbagenev yange ve nenge ér, aluer nomsoor lam a kwase yô, kwagh la una na a sar nan u yaven a kwase la. Er i cian ér kasev mba ve a imeen yô, i lumun ér ve lam a nomso ken igbar, shin ve zende kera ga,  saa vea cir kwagh sha ityough. Kpa Yesu wa nomso kwagh ér ve kighir asaren a ve a iyolough, shi ve eren kwagh a kasev sha icivir, ve de nyaghen ve ga.—Mateu 5:28.

Shi Yesu kaa ér: ‘Hanma or u nana pav a kwase u nan, nana gema á er ugen yô, ka idya je nan er . . . ye.’ (Marku 10:11, 12) Sha nahan yô, Yesu venda ityesen i kwaghaôndo u Mbayuda, i yange i lumun ér nomso ve pav a kasev vev “sha hanma ityôkyaa” cii la. (Mateu 19:3, 9) Mbayuda kpishi na jighjigh ér aluer nom pav a kwase u nan za er ugen yô, ka idya ga, kpa kwase nana er nahan yô, ka idya! Takerada ugen u pasen akaa a Bibilo kaa ér, “Er Yesu tese ér aluer nom undu kwase za er ugen yô ka idya, ka kasev tseegh vea er nahan ve a lu idya ga yô, lu tesen ér kasev kpa mba sha kwarkyaa shi mba a icivir er nomso nahan.”

Ityesen na ne ngi se a iwasen nyian: Ken nongo u Mbashiada mba Yehova yô, kasev ka ve nyôr mbamkombo vea nomso imôngo shi ve lamen a ve gbar gbar. Mba cie ér or a va ker ve ishe shin vea va hoghor iyol a nomso a kar ikyaa inya ga, gadia nomso vev mba eren kwagh a “kasev mba ganden kpaa er ka ungô nahan; mbayevkasev kpaa er ka anmgbianev mba kasev nahan sha mlu u wang cii.”—1 Timoteu 5:2.

◼ Yesu yange tesen kasev. Mbatesen mba Mbayuda yange ve venda u tesen kasev, nahan kasev lu a mkav kpishi ga. Kpa Yesu yô lu nahan ga, yange tesen kasev shi taver ve ishima ér ve pasen mbamnenge vev gbar gbar. Er Yesu venda u tesen Maria ga yô, a tese ér tom u ukase saa sha u yôron iwer tseegh ga. (Luka 10:38-42) Marta, anngô u Maria u kwase la kpa, ityesen i Yesu yange i wasen un. Mbamlumun mba Marta na Yesu sha kwagh u ku u anmgbian na Lasaru la tese mimi u kwagh ne.—Yohane 11:21-27.

Mnenge u kasev yange gba Yesu kwagh. Hen shighe na la, kasev kpishi ken Mbayuda nengen ér saa kwase nana mar wan u nomso, hemban je yô, wan la nana lu profeti ve, kwase la nana zua a msaanyol u mimi ye. Kwagen la, Yesu lu tesen ior hen ijiir igen, nahan kwase ugen va kende kaa genger genger ér: “Saan iyav mbu mbu mar U la iyol.” Kpa Yesu tôô ian la pase un kwagh u hemba lun a inja yô. (Luka 11:27, 28) Er Yesu tese un ér hemba kan a inja u ungwan imo i Aôndo yô, lu tesen un kwagh u hemba lun a inja a mnenge u ityôô, u kasev lu a mi la.—Yohane 8:32.

Ityesen na ne ngi se a iwasen nyian: Mbashiada mba Yehova ka vea kohol imôngo yô, mbatesen ve na kasev kpa ian i lamen. Ka ve na kasev mba ganden icivir, sha ci u kasev mban mba “tesen akaa a dedoo” shighe u ve lu vea mbagenev man shighe u ve lu ve tseegh kpaa. (Titu 2:3) Shi ka ve lumun iwasen i kasev ve ne sha u pasen loho u dedoo u tartor u Aôndo ken igbar la.—Pasalmi 68:11; nenge ngeren u sha peeji 9, u a lu a itinekwagh ér  “Apostoli Paulu Yange Kasev Kwaghôronoo?” la.

 ◼ Yesu waan kasev ikyo. Sha ayange a Yesu la, ônov mba kasev gba kwagh er mba nomso nahan ga. Kwagh u i nger ken atindi a kwaghaôndo u Mbayuda la tese mimi u kwagh ne. I nger ér: “Saan or u ônov mba nan ve lu mba nomso la iyol, kpa kwagh a gema a tser or u ônov mba nan ve lu mba kasev la.” Mbamaren mbagenev yange ve nengen ér wan u kwase ka ikyav. Nahan ve ker nom ve na nan, ve kighir inyaregh sha mi, shi ken iyolbeen ve kpa ve ker iwasen hen wan u kwase ga.

Yesu yange tese ér uma u wan u kwase gba kwagh, er uma u wan u nomso nahan. Ka nahan ve yange nder wan u Yairu u kwase, er nder wan u nomso u kwasecôghol u ken gar u Nain la nahan ye. (Marku 5:35, 41, 42; Luka 7:11-15) Zum u Yesu wanger kwase ugen u lu a “jijingi u uange anyom pue kar anigheni” la, a yila kwase la ér “wan u Aberaham.” Ishember i “wan u Aberaham” la lu ishember i í faan ngeren ken akaangeren a Mbayuda ga yô. (Luka 13:10-16) Er Yesu lam a kwase ne sha icivir yô, a tese ér kwase ne kpa gba kwagh er ior mbagenev nahan, shi jighjigh u nan u kwase la gba un kwagh.—Luka 19:9; Mbagalatia 3:7.

Ityesen na ngi se a iwasen nyian: Ior mba ken veghertar u Ashia nenge ér aluer u yese wan u kwase yô, a wase tsombor wou ga, nahan ve er ishor ér: “U yesen wan u kwase ka inja er u̱ urun sule ikyon u or u nan we ndor a we nahan.” Kpa mbamaren mba ve lu Mbakristu yô, mba a mnenge la ga, nahan ka ve ver ishima sha ônov vev mba kasev man mba nomso cii. Shi ka wa mbayev vev cii ken makeranta shi ve za a ve iyouci shighe u ve gbe angev yô.

◼ Yesu yange na kasev jighjigh: Yange kwase nana er shiada ken atejir u Mbayuda yô, i nenge shiada u nan la er ka shiada u kpan nahan. Or u timen sha akaa Mbayiase u sha shighe u mbaapostoli, u i yilan un ér Josephus la, yange wa ior kwagh ér: “I de ne ma shiada u kwase nan er la jighjigh ga, sha ci u sha marami ve je, ve wa aie shi mba pe pe pe.”

Kpa Yesu yô, gema lu kasev tindi ve ér ve za er shiada sha kwagh u mnder na u shin ku ye. (Mateu 28:1, 8-10) Er kasev mbara vande nengen ku u Ter Yesu kua m-ii na nahan kpa, zum u ve ôr mbaapostoli kwagh u mnder u Yesu yô, ve na ve jighjigh ga. (Mateu 27:55, 56, 61; Luka 24:10, 11) Nahan er Yesu vande anden hen ukase shighe u i nder un shin ku la yô, a tese ér ve kuma u eren shiada sha kwagh na, vough er mbahenen nav mbagenev mbara nahan.—Aerenakaa 1:8, 14.

Ityesen na ngi se iwasen nyian: Nomso mba ve hemen ken nongo u Mbashiada mba Yehova yô, kasev gba ve kwagh, nahan mba we mnenge  u kasev ve lu a mi la ikyo. Noov mba ve lu Mbakristu kpa, mba ‘we kasev vev ikyo,’ sha u keghen ato a ve shighe u ve lu lamen yô.—1 Peteru 3:7; Genese 21:12.

Akaawan a Bibilo Nga Ne Kasev Msaanyol

Nomso ka vea kaven Kristu yô, ve naan kasev icivir, nahan kasev kpa ve lu sha kwarkyaa, er Aôndo yange wa ishima ér i lu sha hiihii la nahan. (Genese 1:27, 28) Noov mba ve lu Mbakristu yô, mba nengen ér nomso hemba gban kwagh a kasev ga, kpa mba dondon akaawan a Bibilo sha u eren kwagh a kasev sha inja, nahan kwagh ne ka a na kasev vev ve lu saan saan.—Mbaefese 5:28, 29.

Anmgbian u kwase ugen mba yer un ér Yelena. Shighe u hii u henen Bibilo la, nom na eren un ican kpoghuloo, kpa a wa ishima. Nom na vese hen ijiir i i eren tswam, je i kôron kasev sha agee i yemen a mi shi i nzughul a ior her wuee yô. Yelena pase kwagh u yange wase un u wan ishima la ér, “Kwagh u m hen ken Bibilo la nam agee. Nahan m fa mer orgen ngu u m doo nan ishima kpishi shi nan wem ikyo yô. Shi m fa mer, aluer nomom hen Bibilo yô, a wase un u geman inja.” Ishimaveren na ne va kure sha mi, shighe u nom na lumun u henen Bibilo vea Mbashiada mba Yehova shi i er un batisema hingir Orshiada u Yehova la. Yelena kaa ér, “Yange hingir or u kôron iyol tsaha kpishi. Shi se hen u den ayol a ase kwaghbo.” A mase kuren ér: “Akaawan a Bibilo wasem m nenge mer m gba kwagh ken ivaa yam kpishi shi orya wam kpa soom.”—Mbakolose 3:13, 18, 19.

Ka Yelena tseegh akaawan a Bibilo a wese un ga. Kasev Mbakristu kpishi mba saan saan sha ci u ve man noov vev cii mba dondon akaawan a Bibilo ken ivaa ve. Er ve kohol imôngo a Mbakristu mbagenev yô, ve zua a msurshima shi mbagenev mba we ve ikyo, shi mba ne ve icivir kpaa.—Yohane 13:34, 35.

Nomso man kasev mba ve lu Mbakristu cii fa ér, er ve yen yô, ve kpa mba akaa a Aôndo a gbe a, a i gbihi a cii ken dang la. Nahan kpa, er ve ye ikyar a Ter ve Yehova kôôsôô yô, mba a ishimaverenkeghen ér a va pase ve “sha ikyev i mlu u hôôn la á tuhwa,” nahan vea nyôr ken “mlu u engem u lun a ikyangenev ga u ônov mba Aôndo la.” Ishimaverenkeghen i nomso man kasev ve lu a mi ne ka i doon kpen kpen!—Mbaromanu 8:20, 21.

[Ngeren u kiriki u a lu sha peeji 9 la]

 Apostoli Paulu Yange Kasev Kwaghôronoo?

Apostoli Paulu yange nger ér: ‘Kasev ve̱ luun ving ken nongo u Kristu.’ (1 Mbakorinte 14:34) Inja i kwagh u Paulu ôr ne ér nyi? Lu kaan ér mfe u kasev yina shinii? Ei, sha ci u yange ôr kwagh ter ityesen i kasev tesen ior la acin imôngo. (2 Timoteu 1:5; Titu 2:3-5) Ken washika u Paulu nger hen Mbakorinte la, a ta icin ér kasev man nomso cii, mba i na ve iyua u lamen ijô kposo kposo la ve “huan ving,” shighe u orgen nan lu lamen yô. * (1 Mbakorinte 14:26-30, 33) Hen ningir u Korinte la, yange or a pasen kwagh yô, i nyôr nan sha zwa, sha u pinen nan mpin. Nahan a̱ shi nan kpa, kasev mbagenev mba ve sember hingir Mbakristu la lu a ieren ne, sha ci u maa ve iyol u seer fan kwagh u kwaghaôndo ve u he ne. Ka nahan ve Paulu wa ve kwagh ér “ve̱ pine noov vev ken ya” ye. Yange wa ve kwagh nahan sha er Mbakristu vea palegh u eren kwagh nzughul nzughul shighe u ve kohol imôngo yô.—1 Mbakorinte 14:35.

[Ngeren u shin kpe]

[Foto u sha peeji 10 la]

Yesu yange na Maria Magedalena ian i icivirigh i za ôron mbaapostoli mnder na u shin ku la

[Foto u sha peeji 11 la]

Mba ve dondon akaawan a Bibilo yô, mba eren kwagh a kasev sha icivir