Kporom Hen Aôndo

‘Akuraior Aa Fa Er Mo M Lu Yehova Yô’

ALUER i wa u kwagh iyol ér u er ma ifer nahan, a lu u nena? Man aluer ior mba yan ican kpishi kua mbaishôôv kpaa sha ci u ifer shon di ye? Ka keng u soo wer u kar a iti i bo i i ne u la kera. U fa er Yehova kpa i we un kwagh iyol nahan kpa? Nyian ne, ior kpishi kaa ér ka Aôndo a ne ve aferakaa a lu eren, shi ior ve lu yan ican shin tar ye. Nahan Yehova yô, kwagh gba un u karen a iti i bo i i ne un la kera je he? Gba un yum! Nenge ase kwagh u a er ken takerada u Esekiel ne.—Ôr  Esekiel 39:7.

Yehova kaa ér “Me kera lumun Mer, i̱ hôngor a icighanti Wam ga.” Zum u uumace ve ne Aôndo ibo sha aferakaa a a lu eren la yô, ka iti na je ka ve hôngor a i ye. Sha nyi gbenda? Ken Bibilo yô, ashighe kpishi ka a ter ishember i “iti” la yô, i lu kwagh u i fe or a mi la i ôron ye. Takerada ugen kaa ér iti i Aôndo la, tile sha ityough ki “kwagh u mbagenev ve fe ér ngu la man kwagh u un iyol na a pase ér un ngu la. Shi i tile sha ityough ki mhembe na man icivir na kpaa.” Iti i Yehova la kua kwagh u i fe un sha mi la kpaa. Nahan Yehova nengen iferkwagh nena? A kôr iferkwagh ihyom! Shi mhôônom ma ker Yehova a mbara mba i lu nzughul a ve la. * (Ekesodu 22:22-24) Shighe u uumace ve senge ér ka Aôndo je a ne akaabo a lu eren yô, mba vihin a vihi Aôndo iti, gadia Aôndo iyol na kôr kwaghbo ihyom tsung je. Sha nahan yô, mba ‘tuhwan iti Aôndo.’—Pasalmi 74:10.

Aluer u nenge yô, Yehova ter ishember i “icighanti wam” la hen ivur ne kwa har. (Ivur 7) Bibilo pase kwagh u iti i Yehova la ér ngi “icighan” shi i̱ ôr kwagh u “icighanmlu” u iti shon kpaa sha ajiir kpishi. Ishember í “icighan” la pase kwagh i ver un kposo yô, shi a fatyô u lun kwagh u wang, shin u a lu a acôghor iyol ga yô. Iti i Yehova la ka icighanti, sha ci u Aôndo u i yer un sha iti shon la kpa ka u wang, ma kwagh u isholibo môm shin ma kwagh u wang ga, ngu ikyua a na ga. U nenge er mba ve ne Yehova ibo sha iferkwagh i i ze hemen shin tar la, ve hembe tuhwan “icighanti” na la cii kpa?

Awashima u Yehova a lu a mi u tseghan iti na sha ikyev i Tartor na la, ka itinekwagh i Bibilo jighilii je la. Takerada u Esekiel pase itinekwagh la, kwa kimbir kimbir nahan ér, “akuraior aa fa er Mo M lu TER yô.” (Esekiel 36:23; 37:28; 38:23; 39:7) I kaa ér akuraior aa kar a ishima ve aa fa Yehova ga. Kpa i kaa ér gba u “aa fa” Yehova. Inja na yô, Yehova una er kwagh u una na akuraior a shin tar ne cii, aa soo shin aa soo ga kpa, aa fa er un lu Yehova, Ter Uhembancii u iti na i til sha kwagh u a lu u icighan man kwagh u wang man u a lu a acôghor iyol ga la yô.

Kwagh u Yehova a er kwa kimbir kimbir ér “akuraior aa fa er Mo M lu TER yô” la, ka loho u dedoo hen mbara mba ve lu veren ashe keghen shighe u a va kar a ifer man ican i yan cii kera la. Ica a gba ga tsô Yehova una kure ityendezwa na la, shi una kar a hanma ilyahan cii sha iti na kera. Yehova una kar a ifer kera kua mba ve eren aferakaa cii, kpa una gema a yima mba ve fe iti na shi ve ne i icivir kua kwagh u iti la i til sha mi kpaa la. (Anzaakaa 18:10) Kwagh ne a̱ mgbegha u hen er ú seer kporom hen Yehova, icighan Aôndo, u ‘kwagh u mimi a doo un ishima’ la yô—Pasalmi 37:9-11, 28.

[Ngeren u shin kpe]