Atsan a Kasev Ve Lu Yan La

Wankwase ugen kaa ér: “Ka mea nenge kwagh u i eren a kasev nahan, m tôm mer ma m lu kwase ga cii.”—ITI I WANKWASE NE ÉR ZAHRA, NGU ANYOM 15. I nger mkaanem nam man ken ipipaabaver igen ken tar u Frans (France).

MKAANEM ma wankwase u i yer un ér Zahra, ma i nger vegher u ken iyan ne tese kwagh u vihin tsung, u a lu zan hemen yô. Hanma ijiir sha tar nyian yô, kasev mba ganden man agumaukase nga a tagher a ipila sha ayange a uma ve cii, shi mba we ve sha ada ga. Time sha atôakaa ne tsô u nenge:

● Ior hemba soon wan u nomso a wan u kwase. Ken veghertar u Ashia la, mbamaren kpishi hemba soon ônov mba nomso. Ken inyom i 2011 la, Mzough u Ityar Cii yôô ér ken veghertar la, ior kera wa kasev ikyo ga, shi mba dughun ônov mba kasev mba ken uya haan kera shi wuan anikyundanev mba kasev kpaa. Kwagh ne na yô, kasev ndiir ken veghertar la je kuma er miliôn 134 nahan.

● Mfetakerada. Sha tar cii, kasev man mbayevkasev hemba ingyegh ken mba ve hen makeranta i ar nongo u unyiin ga yô.

● Ieren i yaven a kwase sha apera. Kasev mba hemban iyenge er biliôn 2 nahan mba ken ityar i zan zan hegen kpa ior ve nengen ér aluer nom kighir kwase u nan yav a nan yô ka kwaghbo ga yô.

● Twersôron. Ken ityar i ior ve lu a kwagh ave ga yô, ken atô u hanma miniti uhar yô kwase ka nan kpe a iyav, shin nan toghor iyav gbem nan kar kpen, sha ci u twersôron ngu tsembelee ga.

● Dyako u inyaa. Shin er kasev ve hembe eren tom sule sha tar cii nahan kpa, ken ityar kpishi, kwase ngu a ian i lun a inya, shin yan dyako u inyaa ga.

Er nan i dugh kasev ave sha akaa a hange hange, a i gbe u ior cii vea lu a mi ne kera nahana? Akuraior agen nga a mbaadini man aeren a a mgbeghan ior shin a tesen ior ér, u̱ eren a kasev dang shin tswamen ve la ka kwaghbo ga yô. Pipaabaver igen ken tar u Frans ter kwagh u kwase ugen ken tar u India a kaa yô, ér: “Hanma kwaghaôndo yô nôngo u lun a tindi u a lumun ér i de we kasev sha ada ga yô.”

U nenge nena? U hen wer Bibilo ôr kwagh u ukase inja er ve gba kwagh ga, er ityakerada i kwaghaôndo igen kpishi i er nahanaa? Mbagenev yô, ve nenge ér avur a Bibilo agen ôr kwagh za nahan. Kpa, Aôndo u Bibilo i lu Mkaanem nam la nengen kasev nena jimi? Shin er ior kpishi ve lu a mbamnenge vev sha ikyaa ne nahan kpa, aluer se time sha kwagh u Bibilo i kaa la vighe vighe man sha mimi yô, se zua a mlumun sha mpin ne.

[Ape i zough a foto ne yô u shaa peeji 3]

© Ufoto mba G.M.B. Akash/Panos