Tese Ônov ou

Hua Yange Vihi Gehashi Vea Aôndo

I LU nahan kwagh sar u tsung vee?— * Aluer kwagh vande saren we nahan yô, u ngu tswen ga. Nahan kpa, doo u ú er aie sha er u zua a kwagh u ú soo yôô?— Ei, doo u ú er nahan ga. Or u nan er nahan yô, nan wa hua. De se nenge er hua yange vihi orgen, u i yilan un ér Gehashi la vea Aôndo yô. Un lu wanakiriki u Elisha, Elisha gema lu profeti u Yehova, Aôndo u mimi la.

Elisha vea Gehashi yange ve kpe, anyom kar kuma er dubu môm nahan cii ve, i va mase maren Yesu, u a lu Wan u Aôndo la shin tar ye. Yehova yange na Elisha tahav mbu eren uivande mba kpilighyol! U tesen ikyav yô, Bibilo ôr se kwagh u orshoja ugen, u lu kurutya u tar u Shiria, u yange gba imande yô. Or môm fatyô u been un imande la ga, kpa Elisha yô fatyô.

Elisha yange ngohol or inyaregh shighe u a bee nan angev sha tahav mbu Aôndo na un la ga. U fa ityôkyaa kpa?— Sha ci u Elisha fa ér, ka sha tahav nav un eren uivande mbara ga, ka sha tahav mbu Yehova. Shighe u i bee Naaman imande la, saan un iyol kpishi, je yô, a soo wener una na Elisha uiyua sha zenaria man azurfa kua akondo a taver ishe. Elisha yange venda uiyua mbara, kpa Gehashi yô, gema soo ve kpishi.

Naaman ngur hiden yemen hen ya na yô, Gehashi gba zendan un ijime, a u ôron Elisha shio. Za zough a Naaman sha gbenda yô, u fa kwagh u Gehashi ôr a na kpa?— A kaa ér, ‘Elisha tindim ér m kaa u yô, iorov uhar va un inya hegen hegen. Nahan we u na un uriga uhar una na mbavannya mbara.’

 Kpa kwagh la lu aie! Ka Gehashi yange tema hen kwagh u mbavannya mba uhar mbara ken ishima na, za er aie nahan ye. Yange ôr kwagh la sha ci u sar un u zuan a akondo a Naaman soo u nan Elisha la. Kpa Naaman yô, fa awashima u Gehashi ne ga. Nahan doo Naaman kpishi u nan Gehashi uiyua mbara, je yô, a na un akaa ngee hemba er a pine la kpaa. U fa kwagh ugen u yange er kpa?—

Gehashi za hidi hen ya yô, Elisha pine un ér: ‘Ka han u yeme?’

Gehashi gema kaa ér: ‘M za mape ga.’ Nahan kpa, Yehova pase Elisha kwagh u Gehashi er la. Nahan Elisha kaa a na ér: ‘Ka shighe u ngohol inyaregh man akondo ne ga!’

Gehashi yange ngohol inyaregh man akondo aa lu sha ci na ga yô. Nahan Aôndo er imande i Naaman la hide sha Gehashi. U hen wer se fatyô u henen nyi ken kwagh nee?— Kwagh môm u se hen ken kwagh ne yô, doo u se eren mbaaie ga.

Hii nan ve Gehashi yange er aiee?— Yange er aie sha ci u a wa hua. Gehashi yange soo u zuan a akaa a a lu a na ga yô, nahan a er aie sha er una zua a akaa shon yô. Kwagh ne na yô, a hingir orimande zan zan ku na.

Jighilii yô, kwagh ugen yange er Gehashi, u hemba imande i gba la yô. U fa kwagh shon kpa?— Aôndo yange kera lumun Gehashi ga, shi kera doo Aôndo ishima kpaa ga. Mayange se er kwagh u una na ve imbakwagh la ia er se la ga! Kpa se eren nen kwagh a mbagenev kundu kundu shi se kegh iyol u nan iyua kpaa.

Ôr ken Bibilo you

2 Utor 5:5, 20-27; Yuda 21

Yohane 15:10

[Ngeren u shin kpe]