Iliam I Orpasenkwagh Vea Orwanndor​—Ior Mba Dedoo Cii mba Yemen Shaa?

KA I doo Mbashiada mba Yehova u timen ken Bibilo vea mbawanndor a ve kpishi. U ngu a mpin sha ma kwagh ken Bibilo, u a tsume u yôô? Sar u u̱ seer fan akaa a Mbashiada mba Yehova ve ne jighjigh a mi laa, shin sar u u̱ fan er i hii ve ve civir Aôndo sha gbenda u ve civir un laa? Aluer ka nahan yô, kwagen u zua a Orshiada u Yehova yô, de timbir u pinen nan ga. A doo nan u lamen a we sha ambaakaa la kpishi.

Iliam i i nger shin heen ne, ka iliam i alaghga Orshiada u Yehova nana lam vea or u nan we ndor a nan yô. Se tôô ser Orshiada ugen u i yer un ér Marcus yô, va hen ya u orwanndor a na, u i yer un ér Robert yô.

Ka Nyi Mba Yemen Sha Mbara Vea Za Ere?

Marcus: Ka wea hen sha kwagh u mlu u ken hemen la nahan, ka u nenge wer alaghga tsô akaa a va lu gudaa, shin ka u nenge wer aa hemba vihin, gayô aa gema kposo ga?

Robert: M nenge mer akaa aa va lu guda. M ver ishima u yemen za kohol Ter sha.

Marcus: Ishimaverenkeghen la ka i dedoo. Bibilo ôr akaa kpishi sha kwagh u mlu u sha, man er u yemen sha la i lu ian i civirigh yô. I lu nahan u gbidye kwar sha kwagh u mba ve yemen sha mbara vea za er la vee?

Robert: Ka u se za lu vea Aôndo, se wuese un gbem sha won.

Marcus: Ishimaverenkeghen la doo kpen kpen. Kwagh er doo yô, Bibilo ôr kwagh u ian i icivirigh i mba ve yemen sha mbara ve lu a mi la tseegh ga, kpa shi i ôr kwagh u tom u hange hange ugen, u vea za er la kpaa.

Robert: Ka nyi tomo?

Marcus: Ka tom u i ter ken Mpase 5:10 la. Ivur la kaa ér: “[We Yesu] U er ve, ve hingir tartor man upristi sha ci u Aôndo wase, vea tema tor sha tar.” Robert, u ungwa kwagh u Bibilo i kaa ér mba ve yemen sha mbara vea za er la kpa?

Robert: Ivur la kaa ér vea tema tor sha tar.

Marcus: Kwagh la ka kwagh u dedoo, shin ka nahan ga?

Vea Tema Tor sha Unô?

Marcus: Nahan u na jighjigh wer, aluer mba ve yemen sha mbara mba za teman tor sha tar yô, ior vea lu, mba vea tema tor sha a ve ga he? Aluer gomoti ngu a ior mba a hemen ve ga nahan, shi ka gomoti kpa?

Robert: M zua a kwagh u u lu ôron la.

Marcus: Sha nahan yô, doo u se pine ser, vea tema tor sha Unô?

Robert: M hen mer se za tema tor sha ior mba vea lu shin tar, vea lu a kpe ve kôndo ve yem sha ga la.

Marcus: Aluer ior mba dedoo cii yem sha, er u kaa nahan yô, a doo tsô. Kpa kwagh  ugen ngu u i doo u se time sha mi yô. Alaghga tsô, ior mba dedoo mbagenev vea lu yemen sha ga shinii?

Robert: Mayange m ngu a fa Mbakristu mba ve ne jighjigh a kwagh la ga.

Marcus: M pine mpin la nahan ka sha ci u kwagh u Pasalmi 37:29 a er la. Ôr ase ivur Bibilo shon.

Robert: Ka shami. I̱ kaa ér: “Mbaperapera vea ya dyako u tar, vea lu ken u gbem.”

Marcus: M sugh u. U ungwa ape ivur la i kaa ér ior mba dedoo kpishi vea lu la kpa?

Robert: Ivur la kaa ér vea lu sha tar.

Marcus: U ôr shami vough, man a lu hen anshighe kpuaa tseegh ga. Umbur, ivur la kaa ér: ‘Vea lu ken u gbem.’

Robert: Kwagh ne tese ér alaghga tsô ior mba dedoo vea ban shin tar ma shighe môm ga. Er se lu kpen yemen sha la, a lu maren ior mba dedoo mbagenev sha ityough yasegh.

Marcus: Ior kpishi vea pase ivur la er u pase nahan. Kpa alaghga tsô ivur ne ngi ôron kwagh ugen kposo shinii? Alaghga ngi kaan ér ior mba dedoo vea lu uma shin tar gbem sha won shinii?

Robert: Kam er m kav kwagh u ú lu ôron ga nahan.

Tar Ua Va Hingir Paradiso ken Hemen

Marcus: Ka shami, hen ase sha kwagh u ivur Bibilo igen i er sha kwagh u ior vea va lu uma shin tar ken hemen la. De se ôr Mpase 21:4. Ivur Bibilo la ôr kwagh u ior mba vea va lu uma hen shighe la ér: “[Aôndo] Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” Mlu u ken hemen la doo ga he?

Robert: A doo. Kpa m hen mer ivur ne ngi ôron er uma u mba vea yem sha la una lu la.

Marcus: Ka mimi, mba ve yemen sha mbara kpa vea zua a averen la. Kpa hide nenge kwagh u ivur la i ôr la. I̱ kaa ér ka nyi ia er ku?

Robert: Ivur la kaa ér “ku ua kera lu ga.”

Marcus: U ôr shami vough. Hegen m na jighjigh mer, aluer i kaa ér kwagh a kera lu ga yô, u lumun wer yange kwagh la vande lun.

Robert: Kape i lu je la.

Marcus: Kpa mayange ku ngu sha ga, shin nguu? Ka shin tar tseegh ior ve kpen ye.

Robert: Mimi yô, gba u me hen sha kwagh la.

Marcus: U nen kpa, Robert, Bibilo tese ér ior mba dedoo mbagenev vea yem sha, kpa ior mba dedoo mbagenev kpishi vea lu uma shin tar gbem sha won. M na jighjigh mer u vande ungwan mkaanem ma ior kpishi ve fe ne: “Saan mba ve lu a ishima i legh legh la iyol, gadia tar ua lu dyako ve je.”—Mateu 5:5.

Robert: Een, m ungwa i ôr ijiir la ken côôci yam kwa imôngo.

Marcus: Aluer mbaasemaleghlegh mba yan dyako u tar yô, kwagh la tese ér ior vea lu uma shin tar ga he? Ior mba vea lu uma shin tar la vea zua a mbamtsera mba i tsengeôron ken Mpase la. Vea nenge er tar ne ua gema cica cii yô, sha ci u Aôndo una kar a hanma kwaghbo kera, kua ku je kpaa.

Robert: M zua a kwagh u ú lu ôron la, kpa ivur Bibilo i môm shin avur ahar tseegh aa fatyô u tesen ér kwagh u ú er la ka mimi ga.

Marcus: U ôr ka aie ga. Avur a Bibilo nga kpishi, aa a tese er uma una va lu shin tar ken hemen yô. Wea lu a shighe yô, me fatyô u tesen we ivur i môm ken avur a a hembe doon mo yô.

Robert: Een, za hemen.

“Iferor Á Kera Lu Ga”

Marcus: Se vande ôron Pasalmi 37:29. De shi se ôr pasalmi la. Kwa ne se ôr ivur 10 man 11. U fatyô u ôron avur shon je he?

Robert: Een, me fatyô. “Gadia shi côhin  tsô iferor á kera lu ga; mimi je, ú nenge sha ijiir i nan, nan nan kpaa, kpa nana lu ga. Kpa mbaasemaleghlegh yô, vea ya dyako u tar, á saan ve iyol sha mngee u bem.”

Marcus: M sugh u. Nenge ivur i sha 11 la, i̱ kaa ér “mbaasemaleghlegh” shin ior mba dedoo vea lu hana?

Robert: I̱ kaa ér vea “ya dyako u tar.” Nahan kpa, m nenge mer ivur ne ngi ôron ka kwagh u hegen; kera kpa, ior mba dedoo mba shin tar nyian.

Marcus: U ôr ka mimi. Nahan kpa, fa wer ivur la shi kaa ér á saan ior mba dedoo iyol sha “mngee u bem.” A lu u nenge yô, bem ngu shin tar nyian kpishi ga, shin ngu?

Robert: Ei, ngu ga.

Marcus: Nahan ityendezwa la ia kure nena? De m tese ikyav: Tôô ase wer u maa ya, u na ior haya her. Mbagenev mba ve ker haya hen ya wou la ka ior mba dedoo, mba ve veren ishima sha ya shi ve nôngon ér vea eren kwagh a mbawanndor a ve doo doo yô. Doo u kpishi er ve ker haya hen ya wou nahan. Kpa mbagenev mba u ne ve haya la lan kwagh kpishi; mba vihin we ya shi nan mbawanndor a ve ican kpaa. Aluer mbalanenkwagh mban venda u geman inja nahan, u er nena?

Robert: Me zenda ve hen ya wam kera.

Marcus: Ka kwagh u Aôndo kpa una va er a ubombaiorov mba ve lu a vese nyian ne je la. Shi hide nenge ivur i sha 10 la. I̱ kaa ér: “Iferor á kera lu ga.” Shin se kaa ser, Aôndo una kar a ior mba ve ne mbagenev ican la kera. Nahan ior mba dedoo vea tema shin tar bem bem. M fa er mhen u ior mba dedoo va lun uma shin tar gbem sha won la a we kahan a kwagh u i vande tesen we la yô.

Robert: Een, mayange m ngu a ungwa kwagh la ken côôci yam ga.

Marcus: Shi, er u vande ôron nahan, ivur i môm shin avur ahar tseegh aa ta se iwanger sha itinekwagh ne a kuma ga. Sha kpôô yô, gba u se time sha kwagh u Bibilo jimin cii i̱ er sha kwagh u mlu u ior mba dedoo, u ken hemen la. Er ajiir a se er ken ruamabera nyian ne a tese nahan, u nenge wer ior mba dedoo mbagenev mba yemen sha, shi ior mba dedoo mbagenev kpishi mba va lun uma shin tar gbem sha won kpa?

Robert: M fa tsembelee ga. Kpa ajiir a u sember ôron ken ruamabera la tese ér kwagh ngu nahan. A gba u me seer henen sha kwagh ne.

Marcus: U nguren timen sha itinekwagh ne seer yô, alaghga mbampin mbagenev vea va u ken ishima. U tesen ikyav yô, ior mba dedoo mba ve kpe cii i mar se la di ye? Ve cii ve yem sha shinii? Aluer ve yem sha ga yô, ka han ve lu hegene?

Robert: Mbampin mbara doo tsô.

Marcus: Alaghga me fatyô u eren akaa a ahar ne sha ci wou. Hiihii yô, de m nger u avur a ruamabera kpuaa, aa a er kwagh sha itinekwagh ne yô. * Kwagh u sha uhar yô, m soo mer me hide me va time sha avur a ruamabera la vea we, zum u u zough a shighe u er a shi u hen sha a u bee kera yô. U nenge nena?

Robert: Een, mhen la doo. M sugh u.

[Ngeren u shin kpe]