Hen Kwagh Ken Mkaanem Ma Aôndo

Mbatyomov man Azôv Mba Eren Se Nyi?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Ka unô ve lu mbatyomovo?

Mbatyomov ka ior mba ken jijingi mba ve lu sha yô. Uma u ve lu a mi la hemba u uumace ve lu a mi la ica je. Aôndo u mimi, u un iyol kpa a lu jijingi la, yange vande gban mbatyomov cii ve gba tar ye. (Yobu 38:4, 7; Mateu 18:10) Yehova ngu a mbatyomov umiliôn imôngo mba ve ongo imo na yô.—Ôr Pasalmi 103:20, 21; Daniel 7:9, 10.

2. Mbatyomov mba wasen ior je he?

Mbatyomov yange ve wase orjighjigh ugen u i yilan un ér Loti la. Or ne lu ken gar ugen u Aôndo soo u timen un kera sha ci u asorabo a ior mba ve lu ker la yô. Mbatyomov uhar va ta Loti man tsombor na icin, kaa a ve ér ve due ken gar la sha. Kpa ior mbagenev yô, nenge icintan la beelee shi kwagh gba ve sha mi kpaa ga. Er Loti man ônov nav mba kasev ungwa icin i Aôndo ta ve sha ikyev i mbatyomov la yô, ve war mtim u i va a mi sha gar shon la.—Ôr Genese 19:1, 13-17, 26.

Shi Bibilo tese ér mbatyomov mba wasen ior nyian sha u hemen mba ve lu pasen loho u dedoo u Tartor u Aôndo la ken tom shon. (Mateu 24:14) Loho u dedoo ne kpa ngu a icintan ker. Er icin i i ta Loti la lu beerkwagh ga nahan, i ngin kpa ka beerkwagh ga. Ka Aôndo a lu tan icin ne sha ikyev i mbatyomov ye.—Ôr Mpase 1:1; 14:6, 7.

Aôndo una fatyô u tindin mbatyomov va taver se ishima shighe u se tagher a akaa a karen jighjigh wase u nan yô. Kera kpa yange vande tindin ortyom ugen va taver Yesu ishima.—Ôr Luka 22:41-43.

Shi ica a gba ga tsô, Aôndo una tindi mbatyomov vea va er kwagh ugen kpaa; vea va tim aferaior a a ne ior ve lu yan ican la cii kera. Kwagh ne una va uumace a mpeveryol kpishi.—Ôr 2 Mbatesalonika 1:6-8.

  3. Azôv nga eren se nyi?

Er ior kpishi ve hembe Aôndo ato, ve er aferakaa shin tar nahan, kape sha kpa mbatyomov kpishi ve hembe Aôndo ato je la. (2 Peteru 2:4) Mba yer mbatyomov mba hemban ato mbara ér azôv. Tor ve ka Satan Diabolo. Satan man azôv a na mba tsughun uumace.—Ôr Mpase 12:9.

Satan ngu hemen ior sha ikyev i mbakpengav mba wan anyighe man ugomoti mba uumace man ukwaghaôndo mba aiegh, nôngon ér ve de u civir Aôndo. Sha nahan yô, ka Satan jim je a ne uumace ve lu tagher a ipila man ican man ijirôron i sha mimi ga ye.—Ôr 1 Yohane 5:19.

4. Azôv nga tsughun ior nena?

Satan tsugh ior kpishi sha u tesen ér or ka nana kpe yô, nan hingir jijingi u una fatyô u lamen a ve yô. Kpa Bibilo kaa ér mbakpenev vea fatyô u eren kwagh môm ga. (Orpasenkwagh 9:5) Ashighe kpishi azôv nga a tsugh ior sha u lamen a ve sha ikyenge i or ve u nan kpe la. (Yesaia 8:19) Shi azôv nga a tsugh mbagenev sha ikyev i mbakpehen-ishor man mbapasen uivande man mbatsenganôron akaa man mbapasen kwagh u mtil u asan. Mkaanem ma Aôndo ta se icin ér se palegh aeren ne cii. Sha nahan yô, gba u se ta hanma kwagh u a gbe a zough a azôv man kwagh u mbaimev cii kera.—Ôr Duteronomi 18:10, 11; Aerenakaa 19:19.

Aluer Yehova doo se ishima yô, ityôkyaa ngi i se cia azôv ga. Ka sea hen Mkaanem ma Aôndo shi sea er kwagh u ma kaa la yô, se venda Diabolo, kpa se gema se kporom ikyua a Aôndo. Yehova hemba azôv tahav ica je. Shighe u kwagh a tser se yô, mbatyomov nav mba ve til sha jighjigh la vea na se ishimataver.—Ôr Pasalmi 34:7; Yakobu 4:7, 8.

Wea soo u seer zuan a iwanger yô, ôr takerada u Bibilo Tese Ér Nyi Jimi?, ityough 10, ka Mbashiada mba Yehova ve gber u ye.