We u nenge iyange i Disemba 21, 2012, i sha kalenda ugen u i yer ér kalenda u Maya, i ior kpishi ve ndera kaan ér akaa aa gema shin tar sha iyange shon la nena? Yange wea lu cian wer ma kwagh u vihin tsung una er yô, alaghga ishima gba u shimi er kwagh er ga yô. Kpa yange wea lu veren ashe wer ma kwagh u doon una er yô, adooga u va ahenge sha ci u kwagh môm er ga yô. Man yange wea lu keghen mkurtar ve va bunde di yô, alaghga kwagh kera gba u sha kwagh u ior ve kaan ér mkurtar ngu van la ga. Iyange la kpa ka di i môm ken ayange a ior ve tsengankaan ér mkurtar una va, kpa a ve ga la shinii?

Nahan gema ‘mkurtar’ u i er kwagh na ken Bibilo la di ye? (Mateu 24:3) Mbagenev ka ve cia ér a va tim tar sha usu. Mbagenev yô, doo ve kpishi u va nengen kwagh u una er shighe u mkurtar una va la. Mbagenev di vôr u ungwan kwagh u mkurtar u ka i shi ôron ér ngu van la. Kpa alaghga tsô ka er í zer eren ve mbaaie ve, i lu ve nahan ye shinii?

Alaghga u fa kwagh u Bibilo i er sha kwagh u mkurtar la yô, a kpiligh we iyol. Bibilo pase atôakyaa a a ne ve i doo u se ver ashe a mkur la tseegh tsô ga, i̱ pase er ishima ia nyian ior zum u vea nengen ér mkur timbir u van yum la kpaa. Nenge ase er Bibilo i ne mbamlumun sha mbampin mbagenev mba ior ve pinen sha kwagh u mkurtar la yô.

BIBILO NA MLUMUN ÉR: ‘Aôndo tim tar sha amagh a u, sha er u̱ de tenger mayange ga yô.’—PASALMI 104:5.

A tim tar sha usu shin sha ma kwagh ugen mayange ga. Bibilo tese ér, tar ka ya u uumace u tsôron. Pasalmi 37:29 kaa ér: “Mbaperapera vea ya dyako u tar, vea lu ken u gbem.”—Pasalmi 115:16; Yesaia 45:18.

Shighe u Aôndo gba tar kera la, a kaa ér tar lu kwagh “u doon tsung,” man kape hegen kpa a nengen tar je la. (Genese 1:31) Er a we ishima u timin tar ga yô, a tôndo zwa ér una “tim mba ve lu vihin tar la,” nahan una kura u sha er ua vihi a gba icaver ga yô.—Mpase 11:18.

Kpa alaghga mkaanem ma ma lu ken 2 Peteru 3:7 la ma a taver we. Ivur la kaa ér: ‘Usha mba ve lu hegen kua tar cii, mba kuran ve sha ci u usu.’ Nahan u pine wer, ‘Mkaanem man tese ér tar ua va hia kera ga zee?’ Jighilii yô, ashighe agen Bibilo ka i ter ishember i “Usha” man “tar” kua “usu” la sha injakwagh. U tesen ikyav yô, i ôr ken Genese 11:1 ér: “Tar cii lu zwa môm.” Ishember i “tar” i í ter heen ne ka uumace.

Kwagh u Peteru yange lu ôron ve va ôr mkaanem ma ken 2 Peteru 3:7 la kpa tese ér, a ôr kwagh u usha man tar kua usu ken ivur ne sha injakwagh. Ivur i sha 5 man 6 la tôô shighe wase ne kar sha Mngerem ma Deemee ma sha ayange a Noa la. Sha shighe la, Aôndo tim tar u sha ayange la, nahan kpa usha man tar kpôô kpôô u se lu ker ne kar kera ga. Nahan yô, ka aferaior a wan tswam a yange lu uma sha ayange a Noa la, a lu “tar” u Bibilo i kaa ér yange i tim u sha Mngerem ma Deemee la ye. Mngerem ma Deemee mara shi yange ma tim “usha,” ka uumace mba ve hemen tar sha ayange a Noa je la. (Genese 6:11) Ka sha gbenda shon môm 2 Peteru 3:7 a tsengeôron ér a va tim aferaior kua ugomoti vev mba aferev kera vindi vindi, er ka sha usu nahan ye.

BIBILO NA MLUMUN ÉR: ‘Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won’—1 YOHANE 2:17.

“Tar” u u lu karen kera la ka tar u inya man ikyon ne ga, kpa ka uumace mba ve eren ishima i Aôndo ga mbara cii. Vough er ortwer ka nan tôndo kyansa i i mende or mape la kera sha u waren oruange la nahan, kape Aôndo kpa una “tim” aferaior kera sha er ior mba dedoo vea ember uma sha tar gbem sha  won je la. (Pasalmi 37:9) Er i pase sha heen nahan la yô, “mkurtar” ka kwagh u dedoo.

Mbageman Bibilo mbagenev ôr kwagh u ‘mkurtar’ sha gbenda u doon ne, nahan ve gema ishemberti ne ér “mkur u tar u ainge.” (Mateu 24:3, NW) Er uumace kua tar cii ua war mkurtar yô, se fatyô u kuren ikyaa ser mkurtar una karen kera yô, tar u he ua va. Bibilo ôr kwagh u mve u “tar u he” la.—2 Peteru 3:13.

Yesu yange yila ayange a ken hemen la ér “mgbe u he.” Hen shighe la, una hide a uumace vea lu sha mlu u Aôndo yange wa ishima ér ve lu ker sha hiihii la. (Mateu 19:28) Hen shighe la,

• Se lu ken Paradiso shin tar, ape mciem ma a kera lu ga, shi a kpe hanma or iyol la.—Yesaia 35:1; Mika 4:4.

• Se er tom u injaa, u nan se mkom.—Yesaia 65:21-23.

• A bee hanma or nyityô uange cii.—Yesaia 33:24.

• Iyolbeen ia kera lu ga.—Yobu 33:25.

• A nder mbakpenev shin ku.—Yohane 5:28, 29.

Aluer se mba eren “ishima i Aôndo,” se mba eren kwagh u a soo hen a vese la yô, ityôkyaa ngi i se cia mkurtar ga. Kpa se ver a ver ashe a mkurtar.

BIBILO NA MLUMUN ÉR: ‘Shighe u né nenge akaa ne aa eren yô, fa nen ner, tartor u Aôndo mgbôghom ve.’—LUKA 21:31.

Profesô ugen nger takerada kaa ker ér, “mgem ka una va kpoo shi ior vea eren ayôôso yô, ior ve ker mbaahaba sha kwagh u mkurtar.” Ior ka ve hemba eren nahan, zum u i taver ve u pasen ityôkyaa i i ne ve mgem shon a ve, shi ior ve lu eren ayôôso yô.

Nahan cii kpa, uprofeti mba ve er kwagh u mkurtar ken Bibilo mbara, yange ve lu nôngon ér vea pase inja i akaa a vihin a a lu eren sha shighe ve la ga. Kpa Aôndo yange mgbegha ve, nahan ve pase akaa a aa va er ken hemen, a aa tese ér tar ne ngu sôôn kuren yô. Ôr ase akaaôron a profeti ne agen, nahan nenge iyol you aluer nga kuren sha mi sha shighe wase ne yô.

•   Ityav man ijen man ityartenger kua ubombauangev.—Mateu 24:7; Luka 21:11.

• Ifer ia seer kpishi.—Mateu 24:12.

• Uumace vea vihi tar ne.—Mpase 11:18.

• Ior vea lu mba wan ayol a ve ikyo tseegh man mba inyaregh ki doo ve ishima man mba iember i iyolough i hembe doon ve a Aôndo yô.—2 Timoteu 3:2, 4.

• Icombor ia vihi.—2 Timoteu 3:2, 3.

• Ior vea venda u wan ikyo sha akav a a lu tesen ér mkur zulum la.—Mateu 24:37-39.

• A pase loho u dedoo u Tartor u Aôndo sha tar cii.—Mateu 24:14.

Zum u sé “nenge akaa ne aa eren yô,” se fa ser mkur u tar ne zulum, vough er Yesu yange kaa nahan. (Mateu 24:33) Mbashiada mba Yehova na jighjigh ér, akav a tesen ér mkur zulum ne due wang, nahan mba pasen mbagenev kwagh u jighjigh u nan ve ne ken ityar 236.

BIBILO NA MLUMUN ÉR: ‘Zum u vea kaan er: Bem, man mkpeyol yô, ka zum la je mtim una ande sha a ve ibuv er martoghor ka a kôr kwase uya nahan ye, mayange vea kera war ga.’—1 MBATESALONIKA 5:3.

Bibilo tôô kwagh u mtim u tar ne kar sha mhii u martoghor. Martoghor ka u kôr kwase uya abu, shi ka u nyoon nan tsung. Ayange a masejime ne nga er iyav mbu wan nahan, gadia ka u zulum u kwase u keghen mar nana mar yô, nan hemban nengen a akav a tesen ér nan sôôn maren. Alaghga ortwer u a kar nan ikyaren la una tsengaveren werayange u nan hen ér kwase la nana mar yô; aluer werayange la va kar je kpa, kwase la nana lu veren ishima her ér ica a kera gba ga tsô nana mar. Kape kwagh u mkurtar kpa a lu je la, shin er mkur a ve sha shighe u ior yange ve ver ishima ér una va la ga nahan kpa, kwagh ne tese ér se mba ken “ayange a masejime” ga ze.—2 Timoteu 3:1.

Kpa alaghga u pine wer: ‘Aluer ikyav i i tese ér se mgbôghom a mkur la ngi tseer tseer yô, hii nan mbagenev ve nenge a i ga?’ Bibilo tese ér zum u mkur una mgbôghom yô, er ior ma ve nenge a ikyav i mkur la yô, akav la aa gba ve kwagh ga. Vea na jighjigh ér tar ngu hemban vihin gban a gba kera, shi se mba ken ayange a masejime ga, kpa vea gema a naha mba ve ne jighjigh la tar, vea kaa ér: “Hii sha shighe u uter kpe kera la  akaa cii nga her di er a lu sha mhii u igbetar la nahan.” (2 Peteru 3:3, 4) Inja na yô, ikyav i ayange a masejime la ngi myer ga, kpa ior kpishi wa i ikyo ga.—Mateu 24:38, 39.

Ngeren ne time sha akav a ken Ruamabera kpuaa, a a tese ér se mgbôghom a mkur di tsô. * U soo u seer fan akav nee? Yô, lam a Mbashiada mba Yehova ve va hen Bibilo a we gbilin. Vea va henen kwagh a we hen ya wou, shin hen ijiir igen i i hembe doon we yô, shin sha telefon je kpaa. Kwaghhenen ne ka gbilin. Ka shighe wou u ú eren akaa agen la tseegh i gbe u ú pande kpuaa u na, sha er u zua a ian i henen kwagh ye. U er nahan yô, u zua a mtsera ken kwaghhenen la je a gande ôron.