Aôndo yange gba Diabolo ga. Yange gba ortyom u dedoo, u ken masejime va hingir Diabolo la; mba yer un kpaa ér Satan. Yesu yange ôr kwagh u tesen ér, shighe ugen ngu u Diabolo ôron kwagh sha mimi shi lu a acôghor shio yô. Sha nahan yô, sha hiihii la, Diabolo lu môm ken mbatyomov mba ve lu ônov mba Aôndo mbaperapera la.—Ôr Yohane 8:44.

Ortyom u a hingir Diabolo la yange tsua a ishima na ér una hendan kwagh a Aôndo, nahan a tuur uumace mba hiihii mbara ken ityô ve dondo un ken ihyembeato na la. Nahan a hingir Satan, inja na yô, ka “Orhendankwagh.”—Ôr Genese 3:1-5; Mpase 12:9.

Ortyom u a hingir Diabolo la kpa yange lu a ian i tsuan kwagh u dedoo man kwagh u bo, di vough er mbatyomov mbagenev kua uumace kpa ve lu a mi nahan, kpa sar ortyom ne u mbagenev ma ve civir un yô. Yange hemba saren un u ma i civir un a u un eren ishima i Aôndo la.—Ôr Mateu 4:8, 9; Yakobu 1:13, 14.

Diabolo ngu tsughun uumace her nena? Doo u ú cia unu? U fatyô u zuan a mbamlumun sha mbampin mban ken Bibilo.